Məlum olduğu kimi, dekabrın 8-də Türkiyə Prezidenti Rəcəb Tayyib Ərdoğan Azərbaycana gələcək. Türkiyə İkinci Qarabağ müharibəsində ölkəmizə ən güclü siyasi dəstək verən ölkə idi və bu dəstək indi də davam edir.
Bu səbəbdən də işğaldan azad olunan torpaqlarımızı əhatə edən, Türkiyə ilə birlikdə xüsusi iqtisadi zonanın yaradılması təklif olunur. Türkiyə ilə birgə iqtisadi zona yaradılarsa, bu hər iki ölkənin iqtisadi inkişafına səbəb olacaq.
“…Türkiyə ilə birlikdə xüsusi iqtisadi zonanın yaradılması məqsədəuyğundur”
Millət vəkili Vüqar Bayramov qeyd etdi ki, Azərbaycan və Türkiyə hər zaman birlikdə olacaq və buna heç kimin şübhəsi yoxdur: “Bütün bunların fonunda Azərbaycan-Türkiyə əlaqələrinin yeni mərhələdə daha da genişləndirilməsi məsələləri əsas prioritetlərdəndir. 2019-cu ildə iki ölkə arasında ticarət dövriyyəsi 4 milyard 405 milyon dollar olub. Bütövlükdə, son illər Azərbaycanla Türkiyə arasındakı ticari əlaqələrdə artan tendensiya müşahidə olunub. Belə ki, ötən il ticarət dövriyyəsi əvvəlki il ilə müqayisədə 33 faiz, 2017-ci il ilə müqayisədə isə 73 faiz artıb. Belə ki, ümumi ticarət dövriyyəsi 2018-ci ildə 3 milyard 403 milyon dollar, 2017-ci ildə isə 2 milyard 667 milyon olub. 2017-ci ildən etibarən Azərbaycan Türkiyə ilə xarici ticarət dövriyyəsində hər zaman müsbət saldoya malik olub. 2019-cu ildə bu saldo rekord şəkildə artaraq 1 milyard 200 milyon dollara çatıb. Son illər Azərbaycan Türkiyə iqtisadiyyatına ən çox investisiya yönəldən ölkələrdən birinə çevrilib. Azərbaycan Türkiyə iqtisadiyyatına 15 milyard dollardan çox, Türkiyə isə Azərbaycan iqtisadiyyatına 12.5 milyard dollar investisiya yatırıb. İmzalanmış müqavilələri nəzərə aldıqda Azərbaycanın Türkiyə iqtisadiyyatına sərmayə qoyuluşu yaxın zamanlarda 20 milyard dollaradək yüksələcək. Göründüyü kimi, son illər bütün iqtisadi istiqamətlərdə iki ölkə arasında əməkdaşlığın güclənməsi müşahidə olunub".
Həmsöhbətimiz hesab edir ki, işğaldan azad olunan torpaqları əhatə edən, Türkiyə ilə birlikdə xüsusi iqtisadi zonanın yaradılması məqsədəuyğun olardı. Azərbaycanın əsas hissəsi ilə Naxçıvan arasında quru dəhlizin olacağını nəzərə alsaq, bu, bölgəyə daha çox sərmayənin cəlb olunmasına imkan yarada bilər.
Günel CƏLİLOVA
