Gürcüstan gələn payız Rusiyanın bir hissəsi ola bilər və yalnız keçmiş Gürcüstan prezidenti Mixeil Saakaşvili belə bir inkişafın qarşısını ala bilər. Saakaşvili daha əvvəllər özünü Odissey və Nelson Mandela adlandırıb. Bu dəfə isə Abxaziyaya yanacaq satışı belə bir fikrin meydana çıxmasına səbəb olub.
Gürcüstanda 33 ildən sonra Abxaziyaya ilk benzin tədarükü ilə bağlı qalmaqal yaranıb. Bu qalmaqal əvvəllər bütün tədarükünü Moskvadan alan Suxumidəki yanacaq böhranı fonunda başlayıb. Artıq ən azı 300 ton benzin çatdırılıb. Baş nazir İrakli Kobaxidze hökumətinin bu məsələ ilə heç bir əlaqəsi olmadığını - bunun sırf biznes məsələsi olduğunu bildirib:
“Yanacaq məsələsinə gəldikdə isə, biz onları ixrac etmədik; müəssisələr etdi. Əgər gələcəkdə orada yaşayan əhalinin - həm gürcü, həm də abxazların - vəziyyətini yüngülləşdirmək imkanımız olarsa, biz bunu davam etdirəcəyik”. Buna baxmayaraq, "Gürcü Arzusu" hökumətinin əleyhdarları hakimiyyətin "işğalçılara" kömək etdiyini bildirir və bununla Tiflisin Rusiyadan asılılığını qeyd edirlər. Xüsusilə Gürcüstan Milli Bankının keçmiş rəhbəri Roman Qotsiridze bəyan edir ki, Gürcüstanın benzin təchizatı Suxumini xilas etməyəcək, lakin rusiyalı turistlər ora gedə biləcəklər. O, həmçinin yanacaq satan şirkətin gəlirlərini bəyan etmədiyini və buna görə də məsuliyyətə cəlb edilməli olduğunu qeyd edib. “Dəyişiklik” Koalisiyasının nümayəndəsi Tenqo Tevzadze qeyd edib ki, Abxaziyaya yanacaq tədarükü humanitar yardım hesab edilə bilməz: "Bu, konkret abxazın ehtiyac duyduğu tibbi yardım deyil. Bu, konkret bir insanın ehtiyac duyduğu elektrik enerjisi ilə bağlı yardım deyil. "Gürcü Arzusu"nun banisi Bidzina İvanişvili cinayətkarlar, separatçılar və ruslarla birlikdə pul qazanır - onlar da eyni şeyi edirlər". Müxalifət üzvləri Abxaziya hakimiyyətinin Rusiya hərbi qulluqçularına gürcü yanacağını ötürməsi ehtimalını da istisna etməyiblər. “Droe” və “Lelo - Güclü Gürcüstan” partiyaları da “Gürcü Arzusu” partiyasına qarşı oxşar ittihamlar irəli sürüblər. Bu fonda İrakli Kobaxidze 1783-cü ildə Gürcüstanla Rusiya arasında imzalanmış “Georgiyevsk” müqaviləsinin Gürcüstan dövlətçiliyi tarixində müsbət rol oynadığını bildirib. Məlum olduğu kimi, bu sənəd Gürcüstanın Rusiya imperiyasına inteqrasiyası üçün başlanğıc nöqtəsi hesab olunur. Kobaxidze bildirib: “II İrakli “Georgiyevsk” müqaviləsini imzalayanda bu sənəd dövlətimizin və ölkəmizin xilasında mühüm rol oynadı. O dövrdə II İrakli bütün bunların və risklərin fərqində idi. O, bu müqavilənin imzalanmasının həmin anda ölkənin xilası üçün vacib olduğunu çox yaxşı bilirdi”. Xatırladaq ki, müqaviləyə əsasən, Rusiya İmperiyası Gürcüstanın şərq hissəsi üzərində protektorat qurmuşdu. Beləliklə, gürcü kralı özünü Osmanlı İmperiyası və İranın təcavüzündən qorumağa ümid edirdi. Eyni zamanda, II İrakli müstəqil xarici siyasət yürütməkdən imtina etsə də, Sankt-Peterburq ona və onun nəslinə taxt-tacı təmin etmişdi.
Bu fonda Gürcüstanın keçmiş prezidenti Mixail Saakaşvili bildirib ki, onun məlumatına görə, "Gürcü Arzusu" hökuməti Rusiya ilə diplomatik münasibətləri bərpa etməyə, Abxaziya və Cənubi Osetiya ilə güc tətbiq etməmək barədə saziş imzalamağa və ölkənin neytrallığını elan etməyə hazırlaşır. O əlavə edib ki, hakim partiyanın qurucusu Bidzina İvanişviliyə yaxın olanlar buna bu payızda nail oluna biləcəyinə inanırlar və bundan sonra bu siyasi qüvvə respublika üzərində hakimiyyətini birdəfəlik möhkəmləndirə biləcək: “Bu payız gürcülər üçün həqiqət anı olacaq: ya hamımız indi birləşəcəyik, hərəkətə keçəcəyik və azadlığa layiq olduğumuzu sübut edəcəyik, ya da bir millət olaraq yox olacağıq. Bu, həm də “Gürcü Arzusu” üçün həlledici andır: onlar bütün bunları təkcə rusların göstərişi ilə deyil, həm də gürcülər bunu udsa, İvanişvilinin irsi diktaturasının qarşıdakı onilliklər ərzində təhlükəsiz olacağını hesabladıqları üçün planlaşdırırlar”. Keçmiş prezident həmçinin qeyd edib ki, gürcülərin 80%-i "Gürcü Arzusu"na nifrət edir, eyni zamanda ondan qurtulmağın mümkün olmadığına inanır. Bundan əlavə, keçmiş prezidentin sözlərinə görə, insanlar hakim rejimi yalnız onun məhv edə biləcəyinə inanırlar, çünki müxalifətin qalan hissəsi tamamilə korrupsiyalaşıb. Saakaşvili kimi həbsdə olan “Dəyişiklik” Koalisiyasının liderlərindən biri olan Elene Xoştariya da kütləvi etirazlara çağırış edib. O bildirib ki, Gürcüstan hökuməti Abxaziyaya yanacaq tədarükünə razılıq verməklə öz ölkəsinə xəyanət edib: "Həqiqət budur ki, bu, humanitar akt deyildi. Kobaxidze özü bunun "ticarət aktı" olduğunu bildirib. Və bu, işğal qanunvericiliyinə uyğun olaraq həyata keçirilib. Bu "ticarət aktı" ölkəyə qarşı açıq-aşkar xəyanət idi. Düşünürəm ki, bu payız işğal əleyhinə genişmiqyaslı mitinq keçirməyin vaxtı gəlib çatıb". Gürcü siyasi analitiki Giya Abaşidze bildirib ki, radikal müxalifətin Kobaxidzenin son açıqlamalarına kəskin reaksiyası Abxaziya ilə münaqişənin dinc yolla həllini rədd etməsindən irəli gəlir. Hazırkı hökumətin əleyhdarları Gürcüstanın "Gürcü Arzusu" hökuməti altında çiçəklənmə ehtimalını daha çox tənqid edirlər: “Onlar Rusiya ilə ikinci cəbhə üçün səy göstərirlər və Qərb onları dəstəkləyir. İş o yerə çatıb ki, bəzi müxalifət nümayəndələri Ukraynanı Abxaziyaya yanacaq daşıyan yük maşınlarına hücum etmək üçün dronlardan istifadə etməyə çağırırlar. Tiflis humanitar məqsədlər üçün Suxumiyə 400 ton yanacaq satmağa razılıq verib və onlar iddia edirlər ki, benzin, guya Rusiya ordusunun əlinə keçəcək. Bu, sadəcə axmaqlıq deyil; bu, təxribat və xəyanətdir”.
Samirə SƏFƏROVA
