ABŞ Prezidenti Donald Trampın kürəkəni və nümayəndəsi Cared Kuşner Qəzza sülh planının həyata keçirilməsi üzrə işinin bir hissəsi olaraq, radikal islamçı HƏMAS hərəkatının nümayəndələri ilə görüşüb. Görüş zamanı o, bir daha HƏMAS-ı tərksilah olmağa çağırıb və İsrailin yaraqlıların bu məsələdə öhdəliklərini yerinə yetirəcəyinə inanmadığını bildirib. Bu barədə Amerikanın Axios onlayn nəşri və AFP xəbər agentliyi mənbələrə istinadən məlumat yayıb. Axios-un məlumatına görə, Kuşner və HƏMAS nümayəndələri arasında görüş 90 dəqiqə davam edib və islamçı terror təşkilatının tərksilah istiqamətində konkret addımlar atmasını təmin etmək baxımından "çox məhsuldar" olub. Kuşner qeyd edib ki, amerikalılar HƏMAS-a bu öhdəliyə görə təşəkkür ediblər, lakin vurğulayıblar ki, onlar "sadəcə sözlər deyil, konkret səylər görmək istəyirlər". "Kuşner üçün onların bu öhdəlikləri şəxsən öz üzərlərinə götürdüklərini təmin etmək vacib idi", - mənbə əlavə edib. Kuşnerin HƏMAS ilə görüşündə Sülh Şurasının baş direktoru Nikolay Mladenov, Şuranın üzvü olan keçmiş Britaniya Baş naziri Toni Bleyer və Şuranın baş məsləhətçiləri Arye Laytstoun və Liran Tankman iştirak edib. Bundan əlavə, Axios-a görə, görüşdə HƏMAS-ın Siyasi Bürosunun rəhbəri Xəlil əl-Həyya, Misir Baş Kəşfiyyat İdarəsinin rəisi Həsən Rəşad, Qətər diplomatı Əli əl-Təvadi və adı nəşrdə qeyd olunmayan yüksək vəzifəli bir türk rəsmisi iştirak edib. Nəşrin mənbəyinə görə, Cared Kuşner HƏMAS nümayəndələrinə bildirib ki, İsrailin də eyni şeyi etməsini istəyirlərsə, tərksilah istiqamətində konkret addımlar atmalıdırlar. Nəşrin dəqiqləşdirdiyi kimi, HƏMAS-dan gözlənilən konkret addımlar arasında idarəetmə səlahiyyətlərinin Fələstin texnokratik hökumətinə ötürülməsi və HƏMAS-ın Qəzza zolağının gələcək idarəçiliyində heç bir rol oynamayacağına zəmanət verilməsi də var. SAMİRƏ
