Abşeronda rayon icra hakimiyyətinin təşkilatçılığı və "Əlincə" İdman Klubunun təşəbbüsü ilə iyunun 15-dən 26-dək ümummilli lider Heydər Əliyevin anadan olmasının 94-cü ildönümünə və 1993-cü ildə xalqın tələbi ilə hakimiyyətə qayıdışının 24 illiyinə həsr olunmuş futbol turniri keçirilib.
"Qurtuluş" günündə başlayan yarışda rayon ərazisində fəaliyyət göstərən müxtəlif idman cəmiyyət və klublarını təmsil edən 14, eləcə də Masazır qəsəbəsində yerləşən Zəngilan Rayon Polis Şöbəsinin futbol komandası iştirak edib.
On gün davam edən yarşın finalında Zəngilan RPŞ-nin futbol komandası "Əlincə" idman klubu ilə qarşılaşıb. "Əlincə Arena"da keçirilən görüşün yekununda Zəngilan RPŞ-nin komandası 5:4 hesabı ilə qalib gələrək fəxri kürsünün ən yüksək pilləsinə qalxıb. Turnirin sonunda qalib komandalara xatirə hədiyyələri, yarışın kuboku təqdim olunub.
Tədbirin sonunda çıxış edən Zəngilan RPŞ-nin rəisi, polis polkovnik-leytenantı Ənvər Həsənov çıxış edərək, ümummilli liderin ölkəmiz və xalqımız qarşısındakı misilsiz xidmətlərindən danışıb, Heydər Əliyevin Daxili İşlər Nazirliyinin və onun ayrı-ayrı strukturlarının ölkədə ictimai asayişin qorunmasında, cinayətkarlıqla mübarizənin təşkilində, insan hüquq və azadlıqlarının təminatındakı rolunu və fədakar xidmətini həmişə yüksək dəyərləndirdiyini diqqətə çatdırıb.
O, yarış təşkilatçılarına öz təşəkkürünü bildirib.
