Aydın Mirzəzadə: "Bu idman yarışını təşkil etmək hər bir ölkə üçün böyük uğurdur"
Zakir Rəhimli: "Belə yarışlar həm ölkəmizi tanıdır, həm də şəhərimizə gələn turistlərin sayını çoxaldır"
Dünyanın ən nüfuzlu idman yarışlarından olan Formula-1 üzrə Azərbaycan Qran-prisinə start verilib. Artıq bütün dünyanın gözü Azərbaycandadır.
Xatırladaq ki, 1982-ci ildə Formula-1-in keçmiş icraçı direktoru Berni Ekklstoun Moskvada keçmiş SSRİ-də bu yarışın təşkili ilə bağlı ilkin razılıq əldə edib. Bundan sonra ittifaqın idman mətbuatında bu idman növünə bir müddət geniş yer verilməsi Azərbaycan ictimaiyyətində də ona maraq yaradıb.
Daha sonra Formula-1 yarışını xarici ölkələrdə, KİV-də izləməyə nail olan yerli tamaşaçılar ötən ildən başlayaraq bu idman növünün həyəcanını Azərbaycanda yaşamaq imkanı əldə edib. Builki Azərbaycan Qran-prisi iyun ayının 25-nə qədər davam edəcək.
Məlumat üçün bildirək ki, uzunluğu 6 kilometrdən çox olan Bakı trekinin müəllifi bütün müasir Formula-1 treklərinin memarı olan Herman Tilkedir. Trek Bakının tam mərkəzində yerləşir və şəhərin ən gözəl yerlərindən keçir. Qeyd etmək lazımdır ki, elə yarış təşkilatçılarının hədəfi də məhz bu idi. Çünki bu amil Azərbaycanın, o cümlədən Bakı şəhərinin dünyada tanıdılmasında, görməli yerlərinin təbliğində xüsusi rol oynayır. Müqayisə üçün deyək ki, hər hansı bir ölkənin turizm baxımından dünyanın aparıcı KİV-ində təbliği üçün çəkilən xərclər layihənin büdcəsindən heç də az deyil. Bu baxımdan Formula-1 yarışına Azərbaycanın da ev sahibliyi etməsi yarış həyəcanına bir az da yaxın olmaqla yanaşı, ölkəmizə turist axınının daha da genişləndirilməsinə imkan verir.
Ötən il keçirilən Formula-1 yarışını çoxlu sayda insan izlədi. Tək yerli əhali deyil, dünyanın dörd bir yanından bu yarışı izləməyə gəlmişdilər.
Analoji vəziyyət bu il də təkrar olunur. Çünki Formula-1 digər idman yarışlarından fərqlənir. Burada həyəcan, sürət və adrenalinin birləşməsi insanların diqqətini cəlb edir.
Formula-1 Azərbaycan Qran-prisini kimlərin izləyəcəyini və bu yarış haqqında düşüncələrini öyrənmək məqsədilə sorğu apardıq.
Millət vəkili Aydın Mirzəzadə Formula-1 Qran-prisinin Azərbaycanda keçirilməsinin ölkəmiz üçün əhəmiyyətli olduğunu dilə gətirdi: "Bu yarış bütün dünyada populyar olan əyləncəli idman oyunudur. Bu idman yarışını təşkil etmək hər bir ölkə üçün böyük uğurdur. Cəmi 22 ölkədə keçirilir. Bu yarışın hər hansı bir ölkədə keçirilməsi hərtərəfli yoxlanışdan və həmin ölkənin yarışın tələblərinə cavab verməsi müəyyən edildikdən sonra mümkün olur. Azərbaycanın ötən il bu siyahıya düşməsi ölkəmizin həm dövlətçiliyində, həm də inkişafında qazandığı nailiyyətlərin nəticəsidir. Ölkəmizdə artıq ikinci ildir keçirilir. Ötən il Azərbaycan yüksək təşkilatçılıq qabiliyyəti və maraqlı bir yarış ortaya qoydu. 500 milyona qədər insan bu yarışı televiziyalar vasitəsilə izlədi. Eyni zamanda internetdə də milyonlarla insan bu yarışın videogörüntülərinə baxır".
Jurnalist Zakir Rəhimli bizimlə söhbətində bildirdi ki, beynəlxalq yarışların ölkəmizdə keçirilməsinin böyük faydası var: "Ötən ay ölkəmizdə IV İslam Həmrəyliyi Oyunları keçirildiyini nəzərə alsaq, belə yarışların Azərbaycana nə dərəcədə fayda gətirdiyini açıq şəkildə görmək mümkündür. Belə yarışlar həm ölkəmizi tanıdır, həm şəhərimizə gələn turistlərin sayını çoxaldır, həm də Azərbaycanın beynəlxalq aləmdəki imicini daha da yüksəldir. Formula-1 də ölkəmiz üçün vacib yarışlardan biridir. Aldığım məlumata görə, 60-dan çox ölkə bu yarışı izləyəcək. Bunun özü də mühümdür. Çünki yarışı izləyənlər şəhərimizin gözəlliyini gördükdə ölkəmizlə maraqlanacaq, bu da, nəticə etibarilə, Azərbaycana turist axınına təsir edəcək. Ümumiyyətlə, Formula-1 yarışı çox maraq kəsb edən idman növüdür. Mən də bu yarışda hansı ölkənin birinci olacağını səbrsizliklə gözləyirəm. Ötən il Formula-1 avtomobil yarışını həvəslə və maraqla izləmişəm. Eyni həyəcanı bu il də yaşayacağam".
Günel CƏLİLOVA
