Ölkəmizdə keçirilən IV İslam Həmrəyliyi Oyunları artıq tarixə çevrilsə də, təəssüratları hələ uzun müddət yaddaşlarda yaşayacaq. Sevindirici haldır ki, yarışların həm yerli, həm də xarici iştirakçısı olan idmançılar, media mənsubları, məşqçilər bu yarışların təşkili, keçirilməsi, təhlükəsizlik tədbirləri barədə çox yüksək fikirlər bildirirlər. Bu sırada, yarışların qalibi olmuş ölkə kimi biz qürur hissi keçiririk ki, qazanılan qələbələrimiz həm də ölkəmizin dünya birliyində ən güclü idman dövlətlərindən biri olduğunu sübut etdi.
Ölkəmizin milli komandasında təmsil olunan daxili işlər orqanlarının əməkdaşlarının qazandığı yüksək nəticələr xüsusilə diqqətəlayiqdir. Həmsöhbətimiz, pəhləvan güləşi üzrə üçqat dünya kubokunun sahibi, üçqat Avropa çempionu, Sumqayıt Şəhər Polis İdarəsinin əməkdaşı, polis serjantı Tural Əliyev bu yarışda gümüş medal qazanıb. İyunun 3-də DİN-də keçirilən IV İslam Həmrəyliyi Oyunlarında uğurla iştirak edərək yüksək mükafatlar qazanan polis əməkdaşlarının, Daxili Qoşunların hərbi qulluqçularının və DİN İdman Cəmiyyətinin yetirmələrinin təltif olunma mərasimində T.Əliyevə "Əla xidmətlərinə görə" döş nişanı təqdim olunub. Bizimlə söhbətində o bildirdi ki, hər iki mükafatı ilə qürur duyur: - Azərbaycanın beynəlxalq səviyyəli tədbirlərə ev sahibliyi etməsi respublikanın inkişafından, iqtisadi potensialından və dünya dövlətləri arasında qazandığı etimaddan xəbər verir. Son bir neçə ildə ölkəmiz möhtəşəm beynəlxalq tədbirlərə ev sahibliyi edir. Yüksək səviyyədə təşkil edilmiş IV İslam Həmrəyliyi Oyunları bu mötəbər tədbirlərdən biri oldu. Ölkəmizdə həyata keçirilən uğurlu siyasət hər bir sahədə, o cümlədən idman sahəsində tərəqqiyə yol açır. Bu gün Azərbaycanın beynəlxalq arenada layiqli yer tutduğunu əminliklə söyləyə bilərik. Birliyə, həmrəyliyə, sülhə böyük töhfə olan İslamiada Azərbaycanı dünyaya bir daha tanıtdı. Bu əlamətdar tədbir Azərbaycan xalqının sülhsevər, tolerant xalq olmasını bir daha nümayiş etdirdi. İdmanın müxtəlif növlərində atletlərimizin qələbəsi, ölkəmizin birinci yeri tutması, bütün qeyd edilənlərlə yanaşı, respublikamızın yüksək idman potensialına malik olduğunu bir daha göstərdi. Mən pəhləvan güləşi yarışlarında qazandığım gümüş medulla, bu uğura görə təltif olunduğum nazirliyin mükafatı ilə qürur duyuram. Onların hər ikisi, məsuliyyətimi artırmaqla, məni daha böyük qələbələrə ruhlandırır.
Zeyni Hüseynov, DİN mətbuat xidmətinin əməkdaşı
