Şəmsəddin Əliyev: “Hesab edirəm ki, məlum əməliyyat bu niyyətdə olan insanlara bir görk olmalıdır”
Xəbər verildiyi kimi, Dövlət Təhlükəsizliyi Xidməti tərəfindən son illərin ən iri mütəşəkkil qaçaqmalçılığı ifşa olunub. Belə ki, Azərbaycan ərazisində valyuta dövriyyəsində manipulyasiya və valyuta qaçaqmalçılığı faktları ilə bağlı davam edən cinayət işi üzrə 15-18 yanvar 2018-ci il tarixlərində həyata keçirilmiş kompleks əməliyyat-istintaq tədbirləri nəticəsində “qara bazar” adlandırılan alternativ valyuta dövriyyəsi iştirakçılarından ibarət cinayətkar şəbəkə ifşa edilib, qanunsuz fəaliyyətlərinin qarşısı alınıb.
Müəyyən edilib ki, qeyd olunan şəxslər tərəfindən 2017-ci il ərzində Azərbaycanın gömrük sərhədindən, gömrük nəzarətindən gizli, bəyan edilmədən, hissə-hissə ümumilikdə 80 milyon 731.282,0 ABŞ dolları, 5 milyard 270.227.972,0 Rusiya rublu, 248 min 915 avro məbləğində xarici valyuta nağd formada, qaçaq yolla ölkədən çıxarılıb.
Azərbaycan Cinayət Məcəlləsinin 206.3.1, 206.3.2, 192.2 və digər maddələri ilə istintaqı aparılan cinayət işi üzrə Azərbaycan vətəndaşları Məmmədov Aqil Kamandar oğlu, Mustafayev Mustafa Abuzər oğlu və Babayev Vüqar Ədalət oğu, habelə Gürcüstan vətəndaşı İzmailov Mamed Həşim oğlu və qeyd olunan silsilə cinayət əməllərinin digər iştirakçıları saxlanaraq cinayət məsuliyyətinə cəlb ediliblər. Hazırda istintaq-əməliyyat tədbirləri davam etdirilir.
Göründüyü kimi, kifayət qədər böyük məbləğdə vəsait qanunsuz olaraq ölkədən çıxarılıb. Məbləğin yetərincə böyük olduğunu nəzərə alsaq, görünür, bunun arxasında müəyyən məqsədlər olub. O baxımdan maraqlıdır, bu qədər vəsaitin çıxarılmasında nə məqsədlər ola bilərdi? Hansı siyasi niyyətlər gizlənir? Bütün bunları təhlükəsizlik sahəsi üzrə ekspertlər necə dəyərləndirirlər?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyev buna bir neçə rakursdan yanaşdı: “Əvvəla, sözün həqiqi mənasında, Azərbaycan vətəndaşı olan, dövlətçiliyə, xalqa xidmət edən adam həmin vəsaiti ölkədən çıxarmaz. Bu vəsaiti qanuni yolla qazanıbsa, pulu ölkənin inkişafına sərf edər. O üzdən, məlum addımı atmaqla çox böyük səhvə yol veriblər. Əslində, bunun özü vətəndaşlıq xəyanətidir. Çünki vəsaitin bu cür qanunsuz formada ölkədən çıxarılmasının arxasında müəyyən çirkin niyyətlər dayana bilər. Bunun konkret nədən ibarət olduğunu birmənalı iddia etmək çətindir. Çox güman ki, araşdırmalardan sonra bu niyyətlər bəlli olacaq. Ancaq, bütün hallarda, belə bir qanunsuz fəaliyyətin ifşa olunması təqdirəlayiq haldır. O da məlumdur ki, ölkədə vəzifədən sui-istifadə, korrupsiya halları ilə bağlı ölkə Prezidentinin qətiyyətli mübarizəsi və səyi var. Bəzi insanlar düşünürlər ki, bu cür zəhmətsiz gəlirləri xarici ölkələrdə saxlamaq daha məqsədəuyğundur. Ona görə də hər vəchlə qeyri-leqal yollarla ölkədən küllü miqdarda vəsait çıxarmağa cəhd edirlər. Görünən odur ki, daxil olan məlumatlar əsasında müvafiq qurumlar çox çevik addım ataraq həmin dəstəni ifşa ediblər. Hesab edirəm ki, məlum əməliyyat bu niyyətdə olan insanlara bir görk olmalıdır. Çünki məlum hərəkəti cinayət olmaqla yanaşı, Azərbaycan xalqına, dövlətinə xəyanət kimi dəyərləndirirəm. Belə hallara qarşı bundan sonra da qətiyyətli mübarizə aparmaq lazımdır. Qanun belə hallara qarşı özünün sərt əli ilə cavab verməlidir. Başqa cür mümkün deyil. Nəzərə almaq lazımdır ki, belə qanunsuz hallarla məşğul olanlar bunu, bir növ, şüurlu şəkildə həyata keçirirlər. Halbuki, xalqın sərvətinə bu şəkildə yanaşmağın özü həm insani dəyərlərə, həm Konstitusiyaya, həm də qüvvədə olan qanunvericiliyə tam ziddir. Ona görə də bu kimi iqtisadi cinayətkarlara qarşı mübarizə daha da kəskinləşməlidir. Çünki mövcud reallıqlar bunu tələb edir”.
Vidadi ORDAHALLI
