Arzu Nağıyev: “Bu prosesdə də onların havadarları da az rol oynamır”
Azərbaycan xarici işlər naziri Ceyhun Bayramovun Zəngəzur dəhlizi ilə bağlı verdiyi “Zəngəzur Dəhlizinin Ermənistandan keçən hissəsi ilə bağlı əldə edilən razılaşmaya əsasən, ABŞ da bu prosesdə iştirak edir. Bu məsələ Ermənistan ərazisinə aid olduğundan, danışıqlar əsasən ABŞ və Ermənistan arasında aparılır. Eyni zamanda, reallıq budur ki, bu dəhlizin həm giriş, həm də çıxış nöqtələri Azərbaycan Respublikası ərazisində yerləşir” bəyanatına Ermənistan Xarici İşlər Nazirliyi tam yersiz cavab verib.
Ermənistan Xarici İşlər Nazirliyinin sözçüsü Ani Badalyan deyib ki, may ayında Ermənistan və ABŞ arasında imzalanmış çərçivə sazişində parametrləri nəzərdə tutulan TRIPP layihəsi Ermənistan Respublikasında həyata keçiriləcək. O, C. Bayramovun Zəngəzur Dəhlizi haqqında dediklərinə yersiz şərh verib.
C.Bayramovun Zəngəzur Dəhlizi ilə bağlı söylədiyi sözlərdə qəribə nə var ki. Doğrudan da, Zəngəzur Dəhlizinin girişi də çıxışı da Azərbaycan ərazisindəndir. Ermənistan XİN buna niyə belə ağrılı reaksiya verib?
Millət vəkili, politoloq Arzu Nağıyev baki-xeber.com-a bildirdi ki, Azərbaycan xarici işlər naziri Ceyhun Bayramovun açıqlamasına ermənilərin reaksiyasında mübahisə coğrafiyadan çox hüquqi və siyasi məna ilə bağlıdır. “Doğrudan da, Zəngəzur dəhlizi dedikdə Azərbaycanın əsas hissəsini Naxçıvanla birləşdirəcək marşrut nəzərdə tutulur. Yəni burada coğrafi baxımdan doğrudur, marşrutun bir hissəsi, yəni bir ucu Azərbaycanın qərb rayonlarındadır, digərləri isə Naxçıvan Muxtar Respublikasındadır, o da Azərbaycanın tərkib hissəsidir. Bu baxımdan giriş və çıxış nöqtələri Azərbaycan ərazisindədir ifadəsi təbiidir və burada hər hansı bir polemikanın yeri də yoxdur. Ermənistanın reaksiyasına gələndə bu təbii ki, siyasi baxışlardır.
Seçkilərdən sonra da Ermənistan cəmiyyətində müəyyən fikirlərin formalaşması bunu deməyə əsas verir. Yəni bunlar belə fikirləşir ki, bu dəhliz Ermənistanın suverenliyi, yuridiksiyası və qanunları altında fəaliyyət göstərməlidir. Dəhliz, yəni ingilis dilində desək, korridor termini isə Ermənistan tərəfindən tez-tez ölkənin həmin hissəsinin suveren nəzarətin məhdudlaşdırılması kimi başa düşülür və buna etiraz edilir və bundan istər müxalif qüvvələr, digərləri istifadə edir. Yəni Azərbaycan birinci dəfə deyil, dəfələrlə bunu bəyan edib ki, Naxçıvanla maneəsiz və təhlükəsiz əlaqə təmin olunmalıdır, Zəngəzur dəhlizi açılmalıdır, tərəflər bunun necə həyata keçiriləcəyi barədə müəyyən komissiyaların, görüşlərin təzahürü olaraq bu yanaşmanı çözməlidirlər. Ona görə də xarici işlər nazirimizin “giriş və çıxış nöqtələri Azərbaycan ərazisindədir” fikri Ermənistan tərəfindən müxtəlif cür yozula bilər. Marşrutun Ermənistan hissəsi yalnız tranzit sahəsi kimi təqdim oluna, əsas nəzarət və marşrutun hüquqi məntiqi Azərbaycan tərəfinin baxışına uyğun qurula bilər”. A.Nağıyev hesab edir ki, bu isə “əsas nəzarət, yol Ermənistanın suverenliyi altında olacaq” mövqeyi ilə ziddiyyət təşkil edə bilər.
“Beləliklə, giriş və çıxış sözlərinin coğrafi mənası üzərində deyil, onlar çalışırlar bunun hüquqi-siyasi nəticələrini qabartsınlar. Buna görə də mübahisə predmeti deyil. Ermənistanın etirazı isə həmin ifadənin gələcək nəqliyyat rejimi, gömrük nəzarəti, sərhəd, eləcə də suverenlik məsələlərini daim mümkün siyasi mesaj daşıdığı qənaətindən qaynaqlanır. Düşünürəm ki, bu prosesdə də onların havadarları da az rol oynamır”-deyə A.Nağıyev qeyd etdi.
İradə SARIYEVA
