Rusiyada hakim "Vahid Rusiya" partiyası doqquzuncu çağırış Dövlət Dumasında konstitusion çoxluğu qazanıb. Mərkəzi Seçki Komissiyası (MSK) səslərin 82 faizindən çoxunu hesablayandan sonra bu barədə məlumat verib. Konstitusion çoxluq əldə etmək üçün partiyaya 301 yer lazımdır.
İkinci yerdə Rusiya Federasiyası Kommunist Partiyası – RFKP (13.89 faiz), üçüncü yerdə Rusiya Liberal Demokrat Partiyası – RLDP (8.77 faiz), dördüncü yerdə isə "Yeni insanlar" (7.97 faiz) qərarlaşıb. "Ədalətli Rusiya" 4.99 faiz səs toplayır. Rusiyada Dövlət Dumasına seçkilər sentyabrın 18-dən 20-dək üç gün keçirilib. Bir sıra sərhədyanı vilayətlərə səsverməni daha erkən keçirməyə icazə verilib. Həmin günlərdə bir çox regionda yerli hakimiyyət orqanlarına da seçkilər keçirilib. Mərkəzi Seçki Komissiyasının məlumatına görə, seçkilərdə ilkin iştirak göstəricisi 56.66 faiz olub. Bu, Moskva 2022-ci ildə Ukraynaya qarşı genişmiqyaslı işğala başlayandan Dövlət Dumasına ilk seçkilər idi. Seçicilər Ukraynada müharibənin dayandırılmasını və siyasi məhbusların azadlığa buraxılmasını açıq şəkildə tələb edən yeganə partiyaya – "Yabloko"ya səs verə bilməyiblər. Ali Məhkəmə "müəllif hüquqlarının pozulması" və "xaricdən maliyyə alınması" ittihamları əsasında "Yabloko"nun seçkilərdə qeydiyyatını ləğv edib. Partiya bu ittihamları əsassız, özünə qarşı təqibləri siyasi hesab edir. Məhkəmələr "Yabloko"nun birmandatlı dairələr üzrə namizədlərinin təxminən üçdə birini seçkilərdən kənarlaşdırıb. Onlar əsasən "ekstremist simvolların nümayiş etdirilməsi" inzibati maddəsi ilə təqibə məruz qalıblar. Məsələn, Aleksey Navalnının adının keçdiyi məqalənin təkrar paylaşılması və ya "Motörhead" rok qrupunun solisti Lemminin boynunda Prussiya xaçı ilə olan fotosunun illər öncə sosial şəbəkədə yerləşdirilməsi belə "ekstremist simvolların nümayişi" kimi qiymətləndirilib.
Seçkilərdə saxlanmalar və pozuntularla bağlı xəbərlər gəlib. Sentyabrın 20-də günorta saatlarında Moskvadakı bir neçə məntəqədə texniki nasazlıq bəhanəsi ilə seçicilərə kağız bülletenlərin verilməsi dayandırılıb. Onlara gözləmək və ya elektron qaydada səs vermək təklif olunub. Bir çox regiondan əsasən "Yabloko" və RFKP müşahidəçilərinin məntəqələrə buraxılmaması və saxlanması, "karusel səsverməsi", seçici fəallığı göstəricilərinin saxtalaşdırılması və digər pozuntular barədə məlumatlar daxil olub.
Tahir TAĞIYEV
