Azər Həsrət: “Bunun ən böyük geosiyasi nəticəsi Azərbaycanın öz suverenliyini tam təmin etməsi oldu”
Məlum olduğu kimi, 2023-cü ilin 19-20 sentyabrında həyata keçirilən lokal xarakterli antiterror əməliyyatının 3 ili tamam oldu. Azərbaycan suverenliyini tam bərqərar etdi.
Ümumilikdə, antiterror əməliyyatlarının hansı geosiyasi və geoiqtisadi nəticələri oldu? Əgər bu əməliyyatlar keçirilməsəydi Azərbaycan bir sıra qlobal layihələrdə və digər bu kimi məsələlərdə indiki kimi yer ala bilərdimi?
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, o zaman Azərbaycan torpaqlarının bir qisminin işğal altında qalması əlbəttə, dövlətimizin qlobal səviyyədə tanınması və qəbul edilməsində problemlər yaradırdı: “Düzdür, rəsmi şəkildə Azərbaycan ərazisi dünyada hər zaman tanınıb, lakin bu, xüsusilə ölkəmizlə iş birliyi qurmaq istəyən, böyük pullar yatırmaq istəyən güclər üçün əlavə risk faktoru təşkil edirdi. Ona görə də Azərbaycan öz ərazi bütövlüyünü nəyin bahasına olursa olsun bərpa etməli idi. Həmçinin suverenliyini bütün ərazi boyunca təmin etməli idi. O baxımdan Azərbaycan dövləti 2020-ci ilin 44 günlük Vətən savaşından sonrakı mərhələdə Ermənistana və onun havadarlarına izah etməyə çalışdı ki, artıq bu məsələni kökündən həll etmək lazımdır. Yəni Azərbaycanın bütün ərazisində suverenliyini təmin etmək nəyin bahasına olursa olsun baş verməlidir. Azərbaycan əlbəttə ki, dinc yolu seçmişdi və Ermənistana, havadarlarına izah etməyə çalışırdı ki, biz bu məsələni dinc yolla həll edə bilərik. Lakin biz bunun qaşlığında onu gördük ki, sülhməramlı adı altında yerləşdirilmiş Rusiya hərbi kontingenti yerli əhalini silahlandırmağa, onlara hərbi təlimlər keçirməyə başladı. Separatçılardan ibarət 17 min nəfərlik ordu quruldu. Rusiyadan ora ermənilər köçürüldü. Əlavə olaraq bu prosesə İran da kömək etdi. Yəni Rusiya ilə İran Ermənistanın Qarabağda qalan bölücülərinə, silahlılarına yardım etdilər. Azərbaycan təmkinlə ermənilərə və havadarlarına izah edirdi ki, biz hər şeyi görürük. Dayanmalısınız və bunu etməyin”.
A.Həsrət onu da qeyd etdi ki, xəbərdarlıqlara məhəl qoyulmadığı üçün Azərbaycan antiterror əməliyyatlarına başladı: “Azərbaycan 19 sentyabr 2023-cü ildə lokal antiterror əməliyyatları keçirməli oldu. Bununla bizə pərdəarxası hədə gələn ermənilər, onların havadarları bir sutka belə duruş gətirə bilmədilər. Ağ bayraq qaldırıb təslim oldular. Düzdür, şəhidlər verdik və bu, çox acıdır. Lakin Azərbaycan xalqı və dövləti öz qətiyyətini növbəti dəfə nümayiş etdirdi. Yenə də buna baxmayaraq Azərbaycan Qarabağda yaşayan ermənilərə təklif etdi ki, qalıb yaşasınlar. Onlar isə Azərbaycan Respublikasını tərk etməyi seçdilər. Bunun üçün Azərbaycan humanitar dəhliz yaratdı və onların sakit şəkildə ölkəni tərk etməsini təmin etdi. Bunun ən böyük geosiyasi nəticəsi Azərbaycanın öz suverenliyini tam təmin etməsi oldu. Həmçinin ərazi bütövlüyünü təmin etdi. Azərbaycan son 200 ildə ilk dəfə öz torpaqlarını işğaldan azad etmiş dövlətdir. Bu da bizim gələcəyə inamlı addımlarımız üçün əlavə imkanlar yaradır. Bunun geoiqtisadi nəticələri o oldu ki, Azərbaycan önəmli tranzit logistika mərkəzinə çevrilib. Əgər antiterror əməliyyatları olmasaydı bütün bunlar risk altına düşə bilərdi. Kənar oyunçular ermənilərin əli ilə təxribatlar törədərdilər. Bütün bunların kökü kəsildi”.
Vidadi ORDAHALLI
