Əli Mustafa: “Bu, o deməkdir ki, Moskva Vaşinqtonla münasibətlərin korlanmasından qorxur”
Rusiya hesab edir ki, Kiyevə Amerika silahlarının davamlı tədarükünə baxmayaraq, ABŞ-ın Ukraynadakı münaqişənin sülh yolu ilə həllini asanlaşdırmaq istəyi səmimidir. Bu barədə Rusiya Prezidentinin mətbuat katibi Dmitri Peskov brifinqdə bildirib.
O, ABŞ-nin “Patriot” sistemləri də daxil olmaqla silah və hərbi texnologiya tədarük etməyə davam etdiyini, eyni zamanda sülh prosesini asanlaşdırmaq istəyini qoruduğunu bildirib: “Qoy onlar bəzən yanlış addım atsınlar, bəzən səhv etsinlər, amma bu istək bizə səmimi görünür və biz bunu alqışlayırıq”.
ABŞ Prezidenti Donald Trampın Ukraynaya “Patriot” sistemi üçün raket istehsalı lisenziyası verilməsi ehtimalı ilə bağlı açıqlamasına münasibət bildirən Kremlin sözçüsü qeyd edib ki, Moskvanın silah tədarükünün davam etdirilməsi ilə bağlı heç bir illüziyası yoxdur. Donald Trampın Ukrayna üzərindəki səmanın təhlükəsizlik zəmanəti kimi bağlanması ehtimalı ilə bağlı açıqlamasına da münasibət bildirən Dmitri Peskov qeyd edib ki, bu cür təkliflər əvvəllər müzakirə olunmayıb.
Peskov ABŞ-ın Ukraynaya “Patriot” sistemi üçün raket istehsalı lisenziyası verilməsini elə şərh edir ki, sanki ciddi bir şey baş vermir. Eyni zamanda bəyan edir ki, ABŞ sülhün əldə edilməsində səmimidir. Bütün bunlarla Peskov nə demək istədi?
Sözügedən məsələni baki-xeber.com-a şərh edən siyasi ekspert Əli Mustafanın fikrincə, bütün bunlar onu deməyə əsas verir ki, ABŞ Rusiya ilə münasibətləri korlamaq istəmir: “Birləşmiş Ştatların hazırda Ukraynanı dəstəkləməsi, ona silah verməsi, həmçinin “Patriot” sistemi üçün raket istehsalı lisenziyası verilməsi və s. məsələləri Rusiya sanki görməzdən gəlməyə çalışır. Bu da onunla bağlıdır ki, Rusiya sonuncu ümid yerini itirmək istəmir. Yəni ABŞ-ın bu savaşı dayandırmaq gücünü ciddiyə alır. Bir sözlə, Moskva Vaşinqtonla münasibətlərin korlanmasından qorxur. Ona görə də Peskov diplomatik metodlardan, yumuşaq jarqonlardan istifadə edir. O üzdən, çalışırlar Trampı əsəbləşdirməsinlər. Ümid edirlər ki, ABŞ vasitəsi ilə müharibənin dayandırılması, yaxud da sülh sazişi mümkün ola bilər. Başqa bir tərəfdən Tramp da Rusiyaya qarşı açıqlamalarında son dərəcə korrekt davranır. Hansısa sərt açıqlamalarla çıxış etmir. Ola bilsin ki, ABŞ Rusiya ilə kommunikasiyanın açıq saxlanılmasında maraqlıdır. Digər tərəfdən mümkündür ki, həqiqətən ABŞ atəşkəsin olmasını istəyir. Tramp səmimi olaraq bunu istəyir, amma dünyadakı güc balansı, dövlətlər, beynəlxalq münasibətlərin digər aktorları buna imkan vermir. Ola bilsin elə məsələlər var ki, Trampın da boyunu aşır. ABŞ da burada birmənalı mövqe tuta bilmir. Hər halda anlaşılan odur ki, Rusiya ABŞ-ın gücünün fərqindədir. Rusiya anlayır ki, Ukrayna müharibəsi fonunda Qərb ilə qarşıdurma bu ölkəyə yaxşı heç nə vəd etmir. O üzdən Rusiya rəsmiləri yumuşaq və diplomatik tərzdə danışırlar”.
Vidadi ORDAHALLI
