Akif Nağı: “Özlərini də, o mükafatı da biabır edirlər”
Çexiya Azərbaycana qarşı qərəzli münasibətini davam etdirir. Belə ki, Çexiyanın "Idnes.cz" nəşri separatçı Ruben Vardanyanın Vatslav Havel İnsan Hüquqları Mükafatına namizəd kimi göstərib. Bu azmış kimi hazırda Bakıda həbsxanada saxlanılan Vardanyanın taleyindən “nigaran” olduqlarını deyirlər. Hətta caninin, qatilin, separatçının hüquqlarını müdafiə edən üzdən iraq məqalə də dərc edilib.
Yazırlar ki, Vatslav Havel İnsan Hüquqları Mükafatının “potensial qalibi” Ruben Vardanyan da daxil olmaqla guya “Dağlıq Qarabağın” keçmiş “liderləri” Bakıda “ağır cəzalara məhkum ediliblər”, “bəziləri isə ömürlük həbs cəzası alıblar”. Separatçı məhkumların vəziyyətləri guya ağırdır, onlar guya qanunsuz saxlanılıblar, onlar guya azadlığa çıxmalıdırlar, guya “hərbi əsirdirlər” və sair.
Keçmiş Dağlıq Qarabağ “Dövlət Naziri” Ruben Vardanyanın may ayında bir qrup beynəlxalq insan hüquqları müdafiəçisi tərəfindən 2026-cı il Vatslav Havel İnsan Hüquqları Mükafatına namizəd göstərildiyini qeyd edirlər.
Demokratiya donu geyib, əslində isə insan hüquq və azadlıqlarına qarşı olan bu kimi qurumlar, hüquq müdafiəçiləri separatçını, canini müdafiə etməklə, onu bu cür mükafata namizəd göstərməklə demokratiyanın, insan hüquq və azadlıqlarını ələ salırlar.
Ruben Vardanyanı bu cür mükafata namizəd göstərməklə Vastslav Havel İnsan Hüquqları Mükafatını təhqir edirlər. Vardanyan Azərbaycan dövlətinə və xalqına qarşı ağır cinayətlər törədən, terroru və terrorçuluğu dəstəkləyən, maliyyələşdirən, qanunsuz silahlı dəstələr yaradıb dövlətimizin ərazi bütövlüyünə qəsd edən bir müharibə canisidir. Bütün bunları görmək əvəzinə durub ona mükafat verirlər. Bununla da onun cinayətlərinə şərik olduqlarını ortaya qoyurlar.
Guya Vardanyan əsarətdədir, guya təqib olunur və sair iddiaların özü gülüncdür və bununla Çexiya Azərbaycanın daxili işlərinə qarışmağa cəhd edir, eyni zamanda işğala, separatizmə dəstək verir. Çexiya niyə bu addımı atır? Vardanyana sülh mükafatı verilməsi özü o mükafatın özünə təhqir deyilmi?
Azad Vətən Partiyasının sədri Akif Nağı baki-xeber.com-a bildirdi ki, keçən əsrin 80-ci illərinin sonu 90-cı illərinin əvvəllərində Vatslav Haveli Avropada demokratik hərəkətləri ilə tanınınan bir sima idi. “Amma çox təəssüf ki, bugünkü Çexiya rəhbərliyi, Çexiya cəmiyyəti onun adına layiq mövqe tutmur. Ümumiyyətlə, Avropada Azərbaycana qarşı qərəzli və ədalətsiz mövqe tuturlar. İstər Avropa Parlamenti, istər Avropa Şurası Parlament Assambleyası, istər digər qurumlar olsun, hamısı Azərbaycana qarşı ədalətsiz mövqe tuturlar. Ədalətdən, demokratiyadan danışırlar, amma özləri demokratik prinsiplərə, haqq-ədalətə əməl etmirlər. Azərbaycana qarşı onların irəli sürdükləri bu iddiaların heç bir əsası yoxdur. Birincisi, Vardanyan bu mükafata layiq deyil. İddia edirlər ki, o mükafatı onun guya hansısa bir qrup hüquq müdafiətçisi təqdim edib. Bunların hamısı qurama işdir və Vardanyanın pulu hesabına ortaya gələn bir məsələdir. Onlar bir daha özlərini də, o mükafatı da biabır edirlər. Hər kəs üçün aydındır ki, Vardanyan və onunla birlikdə Azərbaycan məhkəməsi tərəfindən cəzalandırılan, cəza alan şəxslərin hamısı cinayətkardırlar. Çexiyanın tərkibində hansısa bir separat hərəkan baş qaldırarsa ona qarşı necə hərəkət edəcəklər? Onu yatırtmağa çalışacaqlar, yoxsa yox? Çexiyanın özü bu gün ciddi hakimiyyət böhranı keçirir. Bilinmir orada konstitusiyaya uyğun hakimiyyətdə olan kimdir, prezident yoxsa baş nazir?Biabırçı bir vəziyyət yaranıb. İstanbulda keçirilən NATO-nun son sammitində Çexiya həm baş nazirlə, həm də prezidentlə təmsil olundu. Hərəsi də özünə ayrıca nümayəndə heyəti ilə gəlmişdilər və o kollektiv şəkli çəkiləndə hərəsi bir küncdə dayanmışdı. Bir-birinə yaxın da daymamışdılar, düşmən kimi dayanmışdılar.
Yəni bunlar əgər hansısa bir nüfuzlu bir tədbirə getməyi müəyyənləşdilər bilmirlər ki, ölkəni kim təmsil edəcək, prezident yoxsa baş nazir? Bunlar nədən danışır? Bunların mövqeyinə biz nə cür münasibət bəsləməliyik? Ona görə hesab edirəm ki, onların irəli sürdükləri ittihamların heç bir əsası yoxdur. Güya Vardanyanla bağlı ədalətsiz qərar qəbul olunub.
Bu mükafat demokratiyanın, insan haqlarının müdafiətçilərinə verilir. Vardanyanın fəaliyyətində hansı insan haqlarından, hansı demokratiyadan danışmağa olar? Ora gələn gündən Azərbaycana qarşı təxribatçı şüarlar səsləndirir, Azərbaycan hakimiyyətinə qarşı çağrışlar edirdi, terror qruplarını maliyyələşdirirdi. Təxribatçı qrupları maliyyələşdirib özü də onların başında dayanırdı. Azərbaycan hakimiyyətinə qarşı idi. Vardanyanın cinayətlərinə, terroru maliyyələşdirdiyinə görə bu mükafatı verirlər?
Bunlar iddia edirlər ki, Azərbaycan hansısa təşkilatların çağrışlarına məhəl qoymayıb.
Azərbaycan müstəqil bir dövlətdir, öz qanunları ilə yaşayır. Məhkəmənin gedişində də kifayət qədər faktlar ortaya qoyulubdur. O faktlar da danılmaz faktlardır.
Vardanyan özünə o qədər arxayın idi ki, elə bilirdi Azərbaycan məhkəməsi qarşısına dayanmayacaq, cinayətlərinin cəzasını çəkməyəcək.
Ona görə də açıq şəkildə Azərbaycana qarşı cinayətlər törətdirdi və o cinayətləri törətdiyini deməkdən də çəkinmirdi. O faktların hamısı ortadadır.
Əgər Avropada, Çexiyada bir az da olsa ədalət prinsipi olsaydı belə bir əsassız mövqe sərgiləməzdi.
Onlar ədalət və demokratiya, insan hüquqları kimi prinsplərdən danışırlarsa hesab eidrəm ki, düzgün qərar qəbul etməlidirlər.
Çexiya nə üçün bu addımı atır? Yəni Avropa niyə Azərbaycana qarşı bu cür qərəzli mövqedədir. Çexiyada həmin təşkilatlar kimlərinsə sifarişini yerinə yetirir. Yenə deyirəm, orada vahid dövlət siyasəti yoxdur. Çexiyada müəyyən dəllallar, dələduzlar ortaya çıxıb və bu məsələ ilə bağlı kampaniya aparırlar. Vardanyanın arvadı heyətlə Bakıya da gəlmək istəyir. Gəlsin və şəhid anaları, şəhid ailələri, şəhidlərin həyat yoldaşları ilə görüşsün. 20-25 yaşında dul qalmış şəhid xanımlarını görsünlər, qazilərlə görüşsün... Hesab edirəm ki, Azərbaycan o heyəti rədd eləməlidir, onların istənilən təşəbbüsünə qarşı olmalıdır. Onlar bura dələduz dəstə ilə gəlmək istəyirlər”.
A.Nağı hesab edir ki, bu bir tərəfdən Çexiya və Avropanın siyasətində Azərbaycana qarşı təzyiq etmək istəyidir, onlar bu yolla nəyə isə nail olmaq istəyirlər. “Amma nəticəyə nail ola bilməyəcəklər. Digər tərəfdən isə müəyyən bir beynəlxalq dələduz qruplar var ki, onlar bu yol onlara pul qazandırır. İstəyirlər ki, Vardanyanın pullarını istifadə etsinlər. Bunun başqa bir izahı yoxdur. Çünki reallığa, həqiqətə uyğun deyil və heç bir nəticə də verməyəcək. Azərbaycan qərarını verib. Məhkəmə qərarı ədalətlidir. Bu ədalətli qərarı da heç kəs poza bilməz”-deyə A.Nağı qeyd etdi.
İradə SARIYEVA
