Türkiyə Prezidenti Rəcəb Tayyib Ərdoğan Ankarada keçirilən NATO sammitində liderləri qeyri-adi hədiyyələrlə - Türkiyə istehsalı olan fərdiləşdirilmiş revolverlərlə təəccübləndirdi. Lakin bu hədiyyə bəzi liderləri çətin vəziyyətə salıb.
Reuters-in xəbərinə görə, Ərdoğan 32 liderin hər birinə fərdiləşdirilmiş revolver və sursat hədiyyə etməklə Türkiyənin müdafiə sənayesini nümayiş etdirmək istəyib.
Lakin Ankara NATO sammitinin bütün iştirakçıları Türkiyə prezidentinin hədiyyəsini evə apara bilməyib. Belə ki, Hollandiya və İsveç baş nazirlərinin mətbuat xidmətləri revolverlərin Ankaradakı müvafiq səfirliklərinə çatdırıldığını bildirib.
Böyük Britaniyanın Baş naziri Keyr Starmer də Ərdoğanın hədiyyəsini Türkiyədə qoyub getməli olub, çünki hərbi odlu silahların Böyük Britaniyaya idxalı qanunla qadağandır.
Belçikanın Baş naziri Bart de Vever bağlamanın içindəkiləri yalnız vətənə qayıtdıqdan sonra öyrənib və revolveri hava limanında hüquq-mühafizə orqanlarına təhvil verməyə məcbur olub.
İtaliya Baş naziri Corci Meloniyə təqdim edilən tapança artıq digər dövlət hədiyyələri ilə birlikdə onun iqamətgahında saxlanılır.
Polşa prezidenti Karol Navrotskinin köməkçisi bildirib ki, onun revolveri Varşava hava limanında gömrük rəsmiləşdirilməsini gözləyir. Silah "birincisi, təhlükəsiz olması və ikincisi, hədiyyə kimi hörmətlə qarşılanması üçün" uyğun bir yerdə saxlanılacaq.
Avropa Komissiyasının prezidenti Ursula fon der Leyen şəxsi revolverini hərbi muzeyə bağışlamaq niyyətindədir, Yunanıstanın baş naziri Kiriakos Mitsotakis isə öz tapançasını Afinadakı Hərb Muzeyinə bağışlamağı planlaşdırır.
Kanadanın baş naziri Mark Karni zarafatla ağcaqayın siropu hədiyyəsinin Türkiyə hədiyyəsindən "bir qədər aşağı" olduğunu bildirib və tapançanı görmədiyini əlavə edib "Kanadalılara silahları məndən uzaq tutacaqlarına əmin olmaq istəyirəm", - deyə o, mətbuat konfransında bildirib və əlavə edib ki, revolver deaktiv edilib və milli müharibə muzeyinə veriləcək.
Əli TURABOV
