Moskva Türkiyənin bir neçə il əvvəl Rusiyadan aldığı S-400 hava hücumundan müdafiə (HHM) sistemlərini üçüncü bir ölkəyə satması ilə bağlı xəbərlərə münasibət bildirib. Əslində isə Kreml Türkiyənin S-400 sistemlərinin yenidən satışı ilə bağlı danışıqlar apardığını təsdiqləyib.
Ankaranın satış üçün icazə istəyib-istəmədiyi və Moskvanın buna necə cavab verdiyi barədə sualı cavablandıran Rusiya prezidentinin mətbuat katibi Dmitri Peskov bildirib ki, Rusiya Türkiyəyə tədarük etdiyi S-400 sistemləri ilə bağlı Ankara ilə əlaqə saxlayır.
"Burada bir şey deyə bilərəm: bu, çox həssas bir məsələdir. Bu məsələ ilə bağlı Türkiyə tərəfi ilə əlaqələrimiz olub. Və bu əlaqələrimizi davam etdirəcəyik" – deyə Kremlin sözçüsü bildirib.
Bundan əvvəl "Hürriyet" qəzeti Türkiyənin S-400 zenit-raket sistemlərini bir Fars körfəzi ölkəsinə satıldığını yazmışdı. Nəşrin köşə yazarı Əbdülkadir Selvi bu barədə razılaşmanın bu gün açıqlanacağını iddia edib: "Məndə olan məlumata görə, S-400-lər üçüncü bir ölkəyə satılıb. Saziş bu gün açıqlanacaq. S-400-lər Fars körfəzi ölkəsinə göndərilir. Dünən bəzi problemlərin həlli üçün işlər gedirdi və bildirilir ki, onlar gecə yarısına qədər həll olunub. Bəziləri Birləşmiş Ərəb Əmirliklərinin, digərləri isə Qətərin adını çəkir. Rəsmi açıqlamanı gözləmək ən yaxşısıdır".
"Oksijen" qəzeti isə S-400-ün mümkün alıcılarından birinin Birləşmiş Ərəb Əmirliklərini olduğunu bildirib. Məsələ ilə bağlı iyun ayının sonunda məlumat yayan “Euractiv” Türkiyənin S-400-ləri Rusiyaya qaytarmaq əvəzinə Cənubi Koreyaya sata biləcəyini bildirmişdi.
Türkiyə hakimiyyəti hələlik iddialara münasibət bildirməyib.
"Hürriyet" qəzet Ankaranın ABŞ-ı qane edəcək, CAATSA sanksiyalarının ləğvini təmin edəcək və F-35 yeni nəsil qırıcı təyyarələrinin istehsal proqramına qayıtmağa imkan tanıyacaq hüquqi həll yolu axtardığını bildirib. Türkiyənin F-35 təyyarələrinin istehsal proqramına qoşulmasında ən böyük problem isə Rusiyadan alınan S-400-lərdir.
Türkiyənin Amerikanın F-35 qırıcı təyyarələrini almaqda maraqlı olduğu bilinir, lakin Ankaranın Rusiyadan S-400 hava hücumundan müdafiə sistemini alması səbəbindən maneələrlə üzləşir. ABŞ Konqresi, Ankaranın S-400 sistemlərinə sahib olduğu müddətcə Türkiyəyə F-35 qırıcı təyyarələrinin satışını qadağan edən qanun qəbul edib. Hesab edilir ki, Rusiya sistemi Amerika döyüş təyyarələri üçün təhlükəsizlik təhdidi yaradır.
NATO-nun Ankarada keçirilən sammiti ərəfəsində ABŞ prezidenti Donald Tramp təyyarənin satışını asanlaşdırmaq üçün Türkiyəyə tətbiq edilən sanksiyaları ləğv edə biləcəyini bildirib .
S-400-ün mümkün alıcıları kimi üç ölkənin adı çəkilir - Birləşmiş Ərəb Əmirlikləri, Qətər və Cənubi Koreya. Ehtimal edilir ki, sistemlər satılacaq üçüncü ölkələr üzərindən Rusiyaya qaytarılacaq. Kremlin məsələ ilə bağlı Ankara ilə sıx təmasda olması da bu ehtimalın mümkünlüyünü göstərir.
Tahir TAĞIYEV
