Şəmsəddin Əliyev: “Bu istiqamətdə əldə olan uğurların kökündə polisin peşəkar fəaliyyəti, öz vəzifəsinə çevik, operativ yanaşması kimi amillər dayanır”
Ötən 6 ayda əməliyyat-axtarış və istintaq fəaliyyətinin subyekti olan bütün dövlət qurumları üzrə 15.420 cinayət qeydə alınıb və onların 95,4 faizi daxili işlər və prokurorluq orqanları tərəfindən prosessual qaydada araşdırılan hüquqazidd əməllər olub, 87 faizini böyük ictimai təhlükə törətməyən və az ağır növləri təşkil edib. Bu barədə Daxili İşlər Nazirliyində keçirilən 2026-cı ilin 6 ayında əməliyyat-xidməti fəaliyyətin yekunlarına və qarşıda duran vəzifələrə həsr olunmuş Kollegiya iclasında bildirilib.
Qeyd olunub ki, 2025-ci ilin 6 ayı ilə müqayisədə ümumi cinayətlər 8,6, ağır və xüsusilə ağır cinayətlər 6,5, mülkiyyət əleyhinə olanlar 15,3, onlardan oğurluqlar 11,5, dələduzluqlar 16,8, soyğunçuluqlar 8,8, quldurluqlar 44,2, hədə-qorxu ilə tələb etmələr 10,5, habelə xuliqanlıqlar 12,5, yetkinlik yaşına çatmayanların cinayətləri 15,3, ailə münaqişəsi zəminində törədilənlər 3,5, qrup halında baş verənlər 16,6 faiz, odlu silahın tətbiqi ilə törədilənlər 3 fakt, yol-nəqliyyat hadisələrinin sayı 7,6 faiz, qəzalarda xəsarət alanların sayı 19 faiz, həlak olanların sayı 9 faiz azalıb.
Cinayətlərin açılması 1,1 faiz, qeyri-aşkar şəraitdə törədilənlərin açılması 2,5 faiz, mülkiyyət əleyhinə olanların açılması 4,4 faiz, onlardan oğurluqların açılması 10,7 faiz, dələduzluqların açılması 1,2 faiz yaxşılaşıb, adam oğurluğu və avtonəqliyyat vasitəsinin qaçırılması cinayətlərinin açılması tam təmin edilib.
Həyata keçirilmiş istintaq hərəkətləri və əməliyyat tədbirləri ilə cinayətlərin 93,9 faizi, o cümlədən prokurorluq orqanları ilə birgə keçmiş illərdən bağlı qalmış 218 və görülmüş operativ cavab tədbirləri ilə 3.013 cinayət açılıb, eləcə də 4.474 hüquqazidd əməlin qarşısı alınıb. Müxtəlif cinayətlər törətmiş 6.887 şəxs məhkəmə məsuliyyətinə verilib. İstintaqdan və təhqiqat orqanlarından yayınan 4.282, o cümlədən ağır və xüsusilə ağır cinayətlərə görə 645 təqsirləndirilən şəxs tutulub. Axtarış işinin nəticələri 3 faiz yaxşılaşaraq 82,7 faizə yüksəlib.
Mütəşəkkil cinayətkarlıqla mübarizə tədbirləri çərçivəsində 288, o cümlədən ağır və xüsusilə ağır cinayətlər törətmiş 104 kriminal qrup zərərsizləşdirilib, qanunsuz olaraq odlu silah saxlayan və daşıyan 70 nəfər cinayət məsuliyyətinə cəlb edilib. Eyni zamanda 3.088 odlu silah, 337 qumbara və 99 mindən çox patron aşkarlanıb.
Qeyri-leqal dövriyyədən ötən ilin müvafiq dövrü ilə müqayisədə 1 ton 360 kiloqram çox, yəni 4 ton 318 kiloqram narkotik vasitə çıxarılıb, qanunsuz kultivasiya edilən və yabanı halda bitən 254 tondan artıq çətənə və xaş-xaş kolu aşkarlanıb məhv edilib. Bu növ əməllərə görə 41 cinayətkar qrup zərərsizləşdirilib, 2.652 şəxs cinayət məsuliyyətinə cəlb olunub.
Bunlar necə baş verib?Bu nəticə necə əldə olunub? Buna necə və hansı üsullarla nail olunub?
“Polisə Dəstək” İctimai Birliyin sədri Şəmsəddin Əliyev baki-xeber.com-a bildirdi ki, dünənki kollegiya iclasında müzakirə olunan məsələ cəmiyyət, ölkə əhalisi, hətta diplomatik korpusların, yəni Azərbaycanda akkreditə olunan diplomatik nümayəndəliklərinin təhlükəsizliyi baxımından olan təhlükəsizliyin təmin olunması üçün kifayət qədər əhəmiyyət kəsb edir. “Bir sözlə, daxili işlər naziri Vilayət Eyvazovun çıxışında ötən illərlə müqayisədə son 6 ay ərzində qeydə alınan 1542 cinayətin 95 faizinin açılması diqqətə çatdırıldı. Əslində, ötən illərin müvafiq dövrü ilə müqayisədə həm cinayətlərin üstünün açılması vəziyyəti yaxşılaşıb və ümumi cinayətlərin sayında da azalma müşahidə olunur. Məlumat üçün deyim ki, bu ilin yanvar ayında ötən illərin yekununa dair həsr olunmuş kollegiya iclasında da ümumilikdə ümumi cinayətlərin sayında azalma müşahidə olunması ilə bağlı fikirlər söynəlildi. Ağır və xüsusilə ağır cinayətlərin statistikasında da azalma müşahidə olunmuşdur. 6 ay müddətində həm ağır cinayətlər 6, 5, xüsusilə ağır cinayətlər 15 faiz azalıb. Oğurluqların, dələduzluqların, zorakılıqların, quldurluqların sayında da kifayət qədər azalma var. Hətta son zamanlar sosial şəbəkələrdə təhqiredici xarakterli yayılan məlumatların, ailə münasibəti zəmində törədilən cinayətlərin faizi də azalıb. Bunların sayında da 3, 5 faizin azalma müşahidə olunduğu deyilib. Təsəvvür edin, ümumilikdə 6 ay müddətində 104 kriminal qrup zərərsizləşdirilib. Ümumilikdə qrup halında törədilən cinayətlərin sayında da 16 faiz azalma var. Odlu silahların tətbiqi ilə törədilən cinayətlərin sayında da 3 dəfə azalma var. Bütün bunlara nail olmağı sıradan bir sözlə ifadə etmək çox çətindir. Polisin fəaliyyəti, xidməti Azərbaycan xalqına, ölkənin əhalisinə təhlükəsiz xidmətin təşkili ilə bağlıdır. Polis hökumətin yeganə səlahiyyətli qurumlarından biridir ki, bu qurumun əməkdaşlarına verilən səlahiyyət digər qurumlara verilmir. Ona görə burada prinsiplilik, içilən anda sədaqət, peşəkarlıq, çeviklik, yəni daxil olan məlumatlara, müraciətlərə çevik reaksiya var. Bu istiqamətdə əldə olan uğurların kökündə polisin peşəkar fəaliyyəti, öz vəzifəsinə çevik, operativ yanaşması kimi amillər dayanır.
Həm də tam səmimi ifadə edim ki, ölkə Prezidentinin daxili işlər orqanlarının qarşısına qoyduğu o vəzifələrin icrasında tamamilə fərqli bir yanaşma, fərqli bir peşəkarlıq, fərqli bir prinsipal mövqenin tutulması var. Ona görə daxili işlər orqanları dövlətin bu sahədə siyasətinin formalaşdırılmasında çox peşəkar şəkildə iştirak edirlər, onun həyata keçirilməsini də peşəkar şəkildə təmin edə bilirlər. Bu səbəbdən də deyə bilərəm ki, beynəlxalq tədbirlərin Bakıda keçirilməsinin də əsas səbəblərindən biri ölkədə təhlükəsizliyin təmin olunması və sabitliyin dayaq, dayanıqlı olmasının təzahürüdür. Bu olmasaydı Bakı da beynəlxalq tədbirlərə ev sahibliyi edə bilməzdi”-deyə Ş.Əliyev vurğuladı.
İradə SARIYEVA
