Ira9-2
Azər Həsrət: “İranın vurulmasının NATO-nun toplantısı ilə...”
Tramp Türkiyədə keçirilən NATO sammitində İrana zərbələr endirməyi əmr edib. “Axios” ABŞ rəsmisinə istinadən xəbər verib ki, ABŞ prezidenti Donald Tramp Türkiyədə keçirilən NATO sammitində iştirak edərkən İrana zərbə endirmək planını təsdiqləyib və onun icrasına əmr verib.
Bundan əvvəl Tramp Ankarada Pentaqon katibi Pit Heqset, Dövlət katibi Marko Rubio, Maliyyə naziri Skott Bessent və Birləşmiş Qərargah Rəisləri Komitəsinin sədri general Den Keyn ilə məsləhətləşmələr aparmışdı.
Tramp İranı NATO zirvəsində olarkən vurdu. Bir az gözləyə bilməzdi? Bununla nə demək istəyir? Yəni Tramp deyir ki, bundan sonra İran müharibəsində bütün NATO mənim yanımda olacaq?
Siyasi şərhçi Azər Həsrət baki-xeber.com-a bildirdi ki, o, Trampın durduğu yerdə, səbəb olmadan İranı vurmasına inanmır. “Tramp ümumiyyətlə bu müharibəni tezliklə bitirmək, İranı yenidən qurmaq marağı güdür. Yəni onun üçün normal dünyəvi bir İran dövləti məqbuldur. Buna nail ola biləcəyi təqdirdə Tramp, əlbəttə ki, adını bu tərəfdən də tarixə yazdırmağı bacarmış olacaq. Yəni belə bir şeyi də İranın dindar kəsimi qəbul etmir. Yəni onlar dini dövlətin davam etməsində maraqlıdırlar. Ona görə də xalqın seçdiyi prezidentin başçılıq etdiyi İranın Amerika Birləşmiş Ştatları ilə danışıqlarına qarşı sərt ritorikadan imtina etmirlər. Hətta bunların öldürülmüş dini liderinin dəfn mərasimində belə Amerikaya ölüm şüarları çıxardılar. Donald Trumpın küçələrdə şəkillərini asıb daşladılar, yəni qisas çağırışları etdilər. Tramp nə etməli idi? Əlbəttə ki, onların cavabını və payını verməli idi və düz də edir. Yəni Donald Tramp onlara imkan tanıyıb, şans verib, masa arxasına cəlb edib, danışıqlar aparıb bərabərə. Belə bir şəraitdə İranın əslinə qalanda vəziyyətdən istifadə etməsi, yararlanması lazım idi. Amma bunlar nə edir? Yenə də yatıb qalxıb Amerikanı guya məğlub ediblər. Amerika Birləşmiş Ştatları guya İranın qarşısında geri çəkilib. Belə bəyanatlar verirlər. Verirlər, buyursunlar, qatlansınlar. Yəni fikrimcə, Donald Tramp İranı vurmaq üçün sırf NATO görüşü gününü seçməyib, sadəcə vəziyyət ona gətirib çıxardı ki, İranı vurmaq zərurəti yarandı və İranın cavabını da gördünüz də. Yenə də Amerikaya bir güllə atılmadı. Körfəzdəki müsəlman ərəb ölkələri atəşə tutuldu. Adını qoydular ki, Amerika bazalarını vururuq. Nə Amerika bazası? Vurulan müsəlman ölkələridir. İran yenə də Amerikaya heç nə edə bilməzkən müsəlman ölkələrini vurur. Yəni bunlarınki islam aləmini əbədi parçalamaq məqsədidir. İran buna xidmət edir. Şeytan yuvasına dönüb İran. Ona görə də Donald Tramp İranı vurursa və orada məsələni bitirəcəksə, onu yalnız alqışlamaq olar. Burada mən düşünmürəm ki, durub durduğu yerdə Tramp İrana atəş açsın. Əlbəttə ki, İran cızığından çıxır. Çixanda hər dəfəsində də Amerika onu cəzalandırır. Ötən dəfə də belə olmuşdu. Ondan öncə də belə olmuşdu. Amerika onlara danışıqlar qapısını göstərir, masasını göstərir və bunlar da bunu Amerika Birləşmiş Ştatlarının zəifliyi kimi qəbul edir. Zəifiksə, buyurun sizə gücümüzü göstərək demək məcburiyyətində qalıb Donald Tramp”.
A.Həsrət qeyd etdi ki, Rusiyanın Interfax mediasının qoyduğu başlıq konkret məqsəd güdür, yəni bu təbliğat məqsədlidir. “Mən düşünmürəm ki, biz də burada Bakıda oturub ona uyğun şərh verməliyik. Yəni, bir növ bunlar fikir yayındırmaq üçün guya NATO-nun zirvə görüşünün başladığı gün “Tramp məqsədli şəkildə İranı vurdu” deyib dünya ictimaiyyətini aldatmaq istəyirlər. İranın vurulmasının NATO-nun toplantısı ilə yaxından uzaqdan heç bir əlaqəsi yoxdur. Zatən Amerika Birləşmiş Ştatları bu müharibəni təkbaşına edir. Yəni NATO üzvlərini də dəvət etmişdi, gəlmədilər. Onsuz da NATO-nun maliyyəsinin bütövlükdə gücünün az qala 90 faizi Amerika Birləşmiş Ştatlarına aiddir...”-deyə A.Həsrət qeyd etdi.
İradə SARIYEVA
