Serbiya Milli Assambleyasının sədri və Serbiya Tərəqqipərvər Partiyasının (SNS) üzvü Ana Brnabiç, Aleksandar Vuçiçin vəzifəsindən ayrıldıqdan sonra yenidən prezidentliyə namizəd olmasına icazə vermək üçün ölkə Konstitusiyasında dəyişiklik edilməsini təklif edib.
Belqradda səfərdə olan partiya üzvlərinin stendində çıxış edən Brnabiç SNS tərəfdarlarını qarşıdan gələn parlament seçkilərində Vuçiçi baş nazir kimi dəstəkləməyə çağırıb. Daha sonra o, Vuçiçin baş nazir olaraq qaldığı müddətdə konstitusiyaya düzəliş edilməsini və onun yenidən prezident olmasına imkan verilməsini təklif edib.
"O, baş nazir olduğu müddətdə gəlin konstitusiyanı dəyişdirək ki, qayıdıb prezident olsun. Baxın, hər şey üçün bir həll yolumuz var" - Brnabiç sosial mediada paylaşılan videoda bildirib.
Son aylarda Vuçiç dəfələrlə növbədənkənar parlament seçkilərinin keçirilməsi ehtimalını qaldırıb. Avqustun 20-də o, seçkilərin 18 və ya 25 oktyabrda keçirilə biləcəyini və dəqiq tarixin yaxın günlərdə açıqlanacağını bildirib.
Vuçiç həmçinin prezidentlikdən ayrıldıqdan sonra baş nazir vəzifəsinə namizəd olacağını bildirib. O, prezident və parlament seçkilərinin ayrı-ayrılıqda keçiriləcəyini bildirib: prezident seçkiləri 2026-cı il dekabrın sonlarında və ya 2027-ci ilin fevralından gec olmayaraq baş tuta bilər.
Vuçiçin ikinci prezidentlik müddəti 2027-ci ildə bitir. Serbiya konstitusiyasında bir şəxsin iki dəfədən artıq prezident seçilə bilməsinə icazə verilmir, buna görə də mövcud qaydalara əsasən, Vuçiç üçüncü müddətə namizədliyini irəli sürə bilməyəcək.
Novi Sad qatar stansiyasında tavan örtüyünün uçmasından sonra 2024-cü ilin noyabr ayından bəri Serbiyada etiraz hərəkatına rəhbərlik edən tələbələr, 2025-ci ilin may ayında erkən parlament seçkilərinin keçirilməsini tələb edirlər.
Tahir TAĞIYEV
