Fransa və Böyük Britaniyadan təxminən 100 keçmiş diplomat və diplomatik xidmət nümayəndəsi iki hökuməti Fələstində beynəlxalq hüququn birgə tətbiqinə, o cümlədən İsrailə qarşı sanksiyalar tətbiq etməyə çağırıb.
Fransanın "Le Monde" qəzetində dərc olunmuş açıq məktubda keçmiş diplomatlar bildiriblər ki, BMT Təhlükəsizlik Şurasının daimi üzvləri olan Fransa və Böyük Britaniya müharibə cinayətləri və insanlığa qarşı cinayətlərə görə məsuliyyət daşıyanların məsuliyyətini təmin etmək vəzifəsinə malikdir. Məktub müəllifləri hər iki ölkənin 2025-ci ildə Fələstin Dövlətini tanıdığını vurğulayıblar, lakin təkcə bu addımın yetərli olmadığına inanırlar. Onlar Paris və Londonu fələstinlilərin öz müqəddəratını təyin etmək hüququnu qorumaq və müstəqil Fələstin dövləti yaratmaq imkanını qorumaq üçün təcili tədbirlər görməyə çağırıblar. Keçmiş diplomatlar İsrail hökumətini Qəzzanı məhv etməkdə və beynəlxalq hüququ pozmaqda günahlandırıb və İsrailin Beynəlxalq Ədalət Məhkəməsinin qərarlarına və BMT Təhlükəsizlik Şurasının çoxsaylı qətnamələrinə məhəl qoymadığını bildiriblər. Məktub müəllifləri, həmçinin, 7 oktyabr 2023-cü ildə HƏMAS-ın İsrailə hücumunu pisləyib və törədilən cinayətləri dəhşətli adlandırıblar. Lakin onlar bildiriblər ki, bu, "Qəzzanın və onun əhalisinin sistematik şəkildə məhv edilməsi siyasətini" əsaslandırmır. Məktub müəlliflərinin fikrincə, Fransa və Birləşmiş Krallıq birlikdə hərəkət etməlidir, çünki hər iki ölkə beynəlxalq hüquqa və həm israillilərin, həm də fələstinlilərin təhlükəsizliyinə sadiq olduqlarını bəyan edir.
SAMİRƏ
