Almaniya təhlükəsizlik qüvvələrinin paytaxt Berlin yaxınlığında gizli silah anbarı aşkar etdiyi bildirilir. İddia edilir ki, təhlükəsizlik qüvvələri bir il əvvəl meşəlik ərazidə peşəkarcasına hazırlanmış gizli anbar aşkar ediblər və orada iki dolu odlu silah aşkarlanıb.
Almaniyanın daxili kəşfiyyat agentliyi olan Konstitusiyanın Mühafizəsi üzrə Federal İdarəsi yerin Rusiya kəşfiyyat xidmətinə məxsus gizli silah anbarı olduğunu güman edir. Bildirilir ki, Almaniya təhlükəsizlik orqanları silahların Moskvanın Almaniyada "kinetik əməliyyatlar (sui-qəsdlər və hücumlar)" adlandırdığı əməliyyatları həyata keçirmək vəzifəsi daşıyan agentlər üçün saxlanıldığına inanır.
Silah anbarı aşkar edildikdən sonra mütəxəssislər silahlara GPS izləmə cihazları qoşublar, onlar istifadəyə yararsız hala salınıb. Silahlarla əlaqəli potensial şübhəliləri və ya onları əldə edənləri aşkar etmək üçün anbarın olduğu kimi saxlanıldığı və texniki vasitələrlə uzaqdan izlənildiyi bildirilir. Lakin bir neçə ay ərzində heç kim silahları götürməyə cəhd etməyib. Müstəntiqlər gizli əşyaların təşkilatçılarının onun tapılmasından xəbər tuta biləcəyi qənaətinə gəliblər.
Almaniyanın daxili işlər naziri Aleksandr Dobrindt xəbərləri təsdiqləyib. Nazir Dobrindt bildirib ki, Konstitusiyanın Mühafizəsi üzrə Federal İdarə 2025-ci ilin oktyabr ayında Berlin yaxınlığındakı meşəlik ərazidə silahların gizlədildiyi ehtimal olunan yerdən xəbərdardır.
Daxili işlər naziri federal prokurorluğun milli təhlükəsizliyə təhdid yaradan ağır cinayətə hazırlıq şübhəsi ilə işi araşdırdığını açıqlayıb. O, bu işin Almaniya üçün yüksək səviyyədə təhdid olduğunu göstərdiyini bildirib.
Nazirin açıqlamasından aydın olur ki, bununla bağlı bir şübhəli şəxs var. Almaniya Berlin yaxınlığındakı meşədə aşkarlanan silah anbarı ilə əlaqəli şübhəlinin Rumıniyadan ekstradisiyasını tələb edir.
Nazirin sözlərinə görə, hazırda Rumıniyada olan şübhəli "aşağı səviyyəli agent"dir. Onun vətəndaşlığı açıqlanmır. Dobrindt qeyd edib ki, bu il Almaniyada bir neçə oxşar agent artıq saxlanılıb.
"Der Spiegel" isə yazır ki, silah anbarı ilə Almaniya hakimiyyətinin Rusiya ilə əlaqələndirdiyi Ukrayna logistika marşrutlarına qarşı təxribat kampaniyası arasında mümkün əlaqəni araşdırır.
Son aylarda Almaniya kəşfiyyat orqanları dəfələrlə Rusiya kəşfiyyat fəaliyyətinin artması barədə xəbərdarlıq ediblər. Süddeutsche Zeitung, NDR və WDR-ə görə, Rusiya əməliyyatlarının potensial hədəfləri müdafiə sənayesi rəhbərləri, sürgündəki müxalifət liderləri və Ukraynanın digər tanınmış tərəfdarları ola bilər.
Bu fonda Avropada törədilməsi iddia edilən bir sıra digər təxribat əməliyyatları da araşdırılır. Xüsusilə, 2025-ci ildə Polşa hakimiyyəti yandırıcı qurğular və detonatorlar olan bağlamaların göndərilməsinin hazırlanmasında şübhəli bilinənləri saxlayıb. 2024-cü ildə isə DHL vasitəsilə göndərilən yandırıcı bağlama Leypsiq hava limanının yük terminalında partlayıb. Rusiya dəfələrlə bu cür əməliyyatlarda iştirakını təkzib edib.
Tahir TAĞIYEV
