Avqustun 20-də "Dənizçilərə Sosial Dəstək" İctimai Birliyi (DSD İB) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən "Dənizçi şəhid ailələri ilə iş" layihəsi çərçivəsində növbəti, 4-cü tədbirini keçirib. Azərbaycan Xəzər Dəniz Gəmiçiliyinin (ASCO) İstehsalat Xidmətləri İdarəsinin akt zalında keçirilən tədbirdə idarənin əməkdaşları, şəhid ailələrinin üzvləri, müharibə iştirakçıları, ekspertlər və digər qonaqlar iştirak ediblər. DSD İB-nin Analitik-İnformasiya Bölməsindən verilən məlumata görə, tədbir Azərbaycanın ərazi bütövlüyü və suverenliyi uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb. Tədbiri giriş sözü ilə açan Azərbaycan Xəzər Dəniz Gəmiçiliyinin İstehsalat Xidmətləri İdarəsinin baş mühasibi və idarə rəisi vəzifəsini müvəqqəti icra edən Elməddin Əliyev iştirakçıları və qonaqları salamlayıb. O, Qeyri-Hökumət Təşkilatlarına Dövlət Dəstəyi Agentliyinə və "Dənizçilərə Sosial Dəstək" İctimai Birliyinə təşəkkürünü bildirərək, "Dənizçi şəhid ailələri ilə iş" layihəsinin əhəmiyyətindən və aktuallığından danışıb. Daha sonra tədbiri idarə etmək və layihənin məqsəd və məziyyətləri barədə məlumat vermək üçün söz DSD İB-nin İdarə Heyətinin sədri, layihə rəhbəri, gəmi kapitanı və şair Faiq Balabəyliyə verilib. Faiq Balabəyli çıxışında "Dənizçi şəhid ailələri ilə iş" layihəsinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirildiyini diqqətə çatdırıb. Layihənin əsas məqsədinin dənizçi şəhid ailələrinin sosial, mədəni və hüquqi baxımdan maarifləndirilməsi, onların problemlərinin və ehtiyaclarının öyrənilməsi, müvafiq ekspert rəylərinin dinlənilməsi və bu istiqamətdə ictimai məlumatlılığın artırılması olduğunu bildirib. Layihə rəhbəri qeyd edib ki, Azərbaycan dənizçiləri ölkə iqtisadiyyatının inkişafı və möhkəmlənməsində mühüm rol oynamaqla yanaşı, Azərbaycanın ərazi bütövlüyünün və suverenliyinin təmin olunması uğrunda mübarizədə də fədakarlıq və qəhrəmanlıq nümunələri göstəriblər. O, dənizçilərin Azərbaycanın müasir tarixinin mühüm mərhələlərində göstərdikləri xidmətlərin, xüsusilə şəhid və qazi dənizçilərin şücaətinin cəmiyyətə çatdırılmasının və gələcək nəsillərə nümunə kimi təqdim edilməsinin vacibliyini vurğulayıb. Faiq Balabəyli şəhid dənizçilərin xatirəsinin əbədiləşdirilməsi istiqamətində görülən işlərdən də danışıb. Bildirib ki, DSD İB tərəfindən bu istiqamətdə müxtəlif tədbirlər həyata keçirilir və layihə çərçivəsində keçirilən görüşlər dənizçi şəhid ailələri ilə daha yaxından ünsiyyət qurmaq, onların sosial və ictimai məsələlərini diqqətdə saxlamaq baxımından xüsusi əhəmiyyət daşıyır. Çıxışında İstehsalat Xidmətləri İdarəsinin Azərbaycan gəmiçiliyinin strateji əhəmiyyət daşıyan strukturlarından biri olduğunu qeyd edən Faiq Balabəyli idarə əməkdaşlarının ölkənin müdafiəsi və ərazi bütövlüyünün təmin olunması istiqamətində göstərdikləri xidmətlərdən bəhs edib. O, kollektivdə şəhid ailələrinin üzvlərinin və müharibə iştirakçılarının fəaliyyət göstərməsinin də xüsusi əhəmiyyət daşıdığını vurğulayıb. Tədbirdə ekspert qismində tanınmış şair, Prezident təqaüdçüsü Əkbər Qoşalı, Sabir adına Şəhər Mərkəzi Kitabxanasının direktoru Aliyə Hüseynli, Diaspor Fəaliyyətinə Jurnalistlərin Dəstəyi İctimai Birliyinin sədri, ekspert Fuad Hüseynzadə, eləcə də şəhid dənizçi ailələrinin üzvləri və qazi dənizçilər çıxış ediblər. Çıxışlarda şəhid ailələri və müharibə iştirakçılarına göstərilən dövlət qayğısının əhəmiyyətindən, bu istiqamətdə həyata keçirilən sosial siyasətin nəticələrindən, həmçinin ASCO tərəfindən şəhid ailələrinin və müharibə iştirakçılarının diqqətdə saxlanılması istiqamətində görülən işlərdən söz açılıb. Natiqlər "Dənizçilərə Sosial Dəstək" İctimai Birliyinin Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi "Dənizçi şəhid ailələri ilə iş" layihəsini yüksək qiymətləndirərək, bu cür təşəbbüslərin şəhid ailələrinin sosial-mədəni həyatında, onların maarifləndirilməsində və cəmiyyətlə əlaqələrinin daha da möhkəmləndirilməsində mühüm rol oynadığını bildiriblər. Tədbirin sonunda layihə rəhbəri Faiq Balabəyli bildirib ki, layihənin fəaliyyət planına uyğun olaraq dənizçi şəhid ailələrinin sosial, mədəni və hüquqi baxımdan maarifləndirilməsinə, onların üzləşdiyi məsələlərin diqqətdə saxlanılmasına və bu istiqamətdə ictimai müzakirələrin aparılmasına xüsusi önəm verilir. O, layihə çərçivəsində nəzərdə tutulan 4 tədbirin hər birinin uğurla həyata keçirildiyini qeyd edib. Faiq Balabəyli vurğulayıb ki, "Dənizçi şəhid ailələri ilə iş" layihəsi çərçivəsində keçirilən görüşlər dövlətin şəhid ailələrinə və müharibə iştirakçılarına göstərdiyi diqqət və qayğının, eləcə də dənizçilik sahəsində çalışan həssas qrupların daim diqqətdə saxlanılmasının vacibliyini bir daha nümayiş etdirir. DSD İB-nin layihə çərçivəsində fəaliyyətini davam etdirəcəyini bildirən layihə rəhbəri qeyd edib ki, mütəxəssis və ekspertlərin rəyləri dinlənilməklə, şəhid ailələri və müharibə iştirakçıları ilə bağlı sosial əhəmiyyətli məsələlər ictimaiyyətin diqqətinə çatdırılacaq. Eyni zamanda, dövlətimizin bu istiqamətdə həyata keçirdiyi sosial siyasət və görülən işlərin ictimaiyyətə təqdim olunması davam etdiriləcək. Tədbirin sonunda iştirakçılarla xatirə şəkilləri çəkilib, şəhid ailələrinə və tədbir iştirakçılarına hədiyyələr təqdim olunub. Tural Balabəyli "DSD" İB-nin layihə üzrə Analitik-İnformasiya Bölməsinin rəhbəri
