"Bir sıra iri ticarət şəbəkələri yerli istehsalçıların məhsullarını satışa qəbul etmək üçün müxtəlif marketinq, yerləşdirmə və digər ödənişlər tələb edirlər. Məlumatlara görə, bəzi hallarda bu ödənişlərin məbləği 100 min manatdan başlayır, hətta daha yüksək rəqəmlərə çatır. Nəticədə kiçik və orta sahibkarlar keyfiyyətli məhsul istehsal etsələr də, bu yüksək maliyyə tələblərinə görə məhsullarını iri ticarət şəbəkələrində satışa çıxara bilmirlər".
"Yeni Sabah" xəbər verir ki, bu barədə Milli Məclisin növbədənkənar sessiyasının plenar iclasında deputat Razi Nurullayev Vergi Məcəlləsində dəyişiklik edilməsi layihəsinə münasibət bildirərkən deyib.
O vurğulayıb ki, belə ödənişlər yerli istehsalçıların daxili bazara çıxış imkanlarını əhəmiyyətli dərəcədə məhdudlaşdırır: pizza mizza
"Xüsusilə maliyyə imkanları böyük müəssisələrlə müqayisədə daha zəif olan kiçik və orta sahibkarlar üçün bu vəziyyət ciddi çətinlik yaradır. Ona görə də bazarda rəqabətin qorunması və sahibkarların maraqlarının müdafiəsi məqsədilə bu münasibətlərin daha ədalətli prinsiplər əsasında tənzimlənməsi vacibdir. Hazırkı vəziyyət həm yerli istehsalçı, həm də istehlakçı üçün mənfi nəticələr doğurur. Bir tərəfdən istehsalçı bazara çıxmaq üçün əlavə xərclərlə üzləşir, digər tərəfdən isə istehlakçı keyfiyyətli yerli məhsullara daha məhdud şəkildə çıxış əldə edir. Bu isə bazarda seçim imkanlarını azaldır və sağlam rəqabət mühitinə mənfi təsir göstərir. Belə praktikanın uzun müddət davam etməsi ticarət şəbəkələrində yerli məhsulların payının azalmasına, kiçik və orta sahibkarlığın zəifləməsinə, milli brendlərin rəqabət qabiliyyətinin aşağı düşməsinə, investisiyaların və yeni iş yerlərinin azalmasına, vergi daxilolmalarının zəifləməsinə, nəticə etibarilə isə ölkənin ərzaq təhlükəsizliyi və iqtisadi müstəqilliyinə mənfi təsir göstərə bilər".
Deputat əlavə edib ki, bu prosesə dövlət qurumları, sahibkarlar, ekspertlər və ictimaiyyət nümayəndələri cəlb edilməli, onların təklifləri nəzərə alınmalıdır:
"Bu məsələyə yalnız kommersiya münasibətləri prizmasından deyil, dövlətin iqtisadi siyasəti və milli istehsalın qorunması baxımından da yanaşmaq lazımdır. Hesab edirəm ki, qanunvericilik səviyyəsində iri ticarət şəbəkələrinin fəaliyyəti, yerli istehsalçıların bazara çıxış imkanları və mövcud problemlərlə bağlı geniş ictimai dinləmələrin keçirilməsi məqsədəuyğun olardı. Bu prosesə dövlət qurumları, sahibkarlar, ekspertlər və ictimaiyyət nümayəndələri cəlb edilməli, onların təklifləri nəzərə alınmalıdır. İnanıram ki, bu istiqamətdə atılacaq addımlar daxili bazarın daha sağlam prinsiplərlə tənzimlənməsinə, yerli istehsalın inkişafına və rəqabət mühitinin güclənməsinə mühüm töhfə verəcək".
