Elşad Həsənov: "İsrailin əsas məqsədi ABŞ-la İran arasında olan razılaşmanı pozmaq idi"
İsrail liderləri Yaxın Şərqdəki münaqişələrə son qoymaq cəhdlərindən ehtiyat edərək ABŞ prezidenti Donald Trampa İranın ona qarşı yeni sui-qəsd hazırladığı barədə kəşfiyyat məlumatları veriblər.
Bu barədə "Wall Street Journal" qəzetinin xəbərində deyilir.
WSJ-nin məlumatına görə, İsrail Vaşinqton administrasiyası ilə İranın ABŞ prezidenti Donald Trampa qarşı yeni sui-qəsd planı hazırladığı barədə kəşfiyyat məlumatları paylaşıb. Ankarada çıxış edən Tramp bu təhdidə işarə edərək, "Mən iranlıların sui-qəsd siyahısının başındayam" deyib.
"Wall Street Journal" qəzetinin İsrail və Amerika rəsmilərinin məlumatlarına əsaslanaraq yazdığına görə, İsrail kəşfiyyatı İranın Trampa qarşı yeni sui-qəsd planı üzərində işlədiyi barədə məlumat alıb. Hesabatda bildirilir ki, bu kəşfiyyat məlumatları bu yaxınlarda Vaşinqtonla paylaşılıb, lakin Amerika hakimiyyəti bu məsələ ilə bağlı rəsmi açıqlama verməyib. Ağ Ev, İsrail hökuməti və İran tərəfi də bu məlumata münasibət bildirməyib.
Ankarada keçirilən mətbuat konfransında vəziyyətlə bağlı şərh verən Tramp İrandan gələn təhdidlərdən xəbərdar olduğunu bildirərək, keçmişdə də oxşar təhdidlərlə üzləşdiyini və təhlükəsizlik tədbirlərinin ən yüksək səviyyədə saxlanıldığını qeyd edib.
ABŞ kəşfiyyatına nə gəlib ki, Trampa qarşı olduğu deyilən sui-qəsd planını İsrail kəşfiyyatı açıb? Bəs ABŞ kəşfiyyatı nə işlə məşğuldur? Nə yaxşı Amerika kəşfiyyatı özü İran kəşfiyyatının Trampa qarşı sui- qəsd planını görmədi, İsrail kəşfiyyatı gördü? İran kəşfiyyatı bilmir ki, Trampın həyatına qəsd etmək o qədər də asan məsələ deyil?
Siyasi ekspert Elşad Həsənov baki-xeber.com-a bildirdi ki, ABŞ prezidenti Donald Trampa qarşı sui-qəsd planları var və bu planlar da təzə deyil. "Donald Trampın birinci prezidentliyinin son dövründə 2020-ci ilin yanvarın 3-də İraqda İranın güc təşkilatının rəhbəri general Qasım Süleymaninin öldürülməsi birbaşa Trampın göstərişi ilə olan hadisə idi. Elə o zamandan ona qarşı İranda ciddi işlər görülüb, əməliyyat tədbirləri hazırlanıb. Ancaq heç nə həyata keçirilməyib. Tramp hakimiyyətə gələndə elə seçkilər zamanı da ona qarşı olan sui-qəsdlər də bizim hamımızın yadımızdadır. Bütün bunlarda da İran izi axtarıldı, ancaq İran izi orada tapılmadı. Yəni İran kəşfiyyatının apardığı işlər o qədər də nəticə vermədi. Elə onlardan istifadə edə bilib nəyə isə nail ola bilərdilər. Ancaq onlar bunu edə, yəni iş apara bilmədilər".
E.Həsənov qeyd etdi ki, ABŞ/İsrail-İran müharibəsində İranın Ali dini rəhbəri Xameneinin və onun yaxın ətrafının, İran rəhbərliyinin öldürülməsi Trampa qarşı bu ölkənin hakimiyyəti qarşısında duran ən böyük məsələdir. "Yəni Trampın məhv edilməsi İran hakimiyyətinin, hakim qüvvələrinin, onların güc strukturlarının qarşısında duran ən ümdə vəzifədir. Bunu da təbii ki, Tramp bilir. ABŞ kəşfiyyatı da bilir ki, İran bu sahədə işləyir, ciddi iş aparır. Bunu bilməyən kimsə yoxdur. Bu sahə ilə maraqlanan insanların hamısı başa düşür ki, İranın ali dini rəhbərinin öldürülməsi birbaşa Trampın göstərişi ilə baş verib. Ona görə də İran onun cavabını verməlidir. Həm SEPAH, həm digər güc strukturlarının qarşısında duran ən ümdə məsələdir. Bir daha təkrarlayıram ki, bunu Tramp da, Amerika kəşfiyyatı da, İsrail də, Rusiya da, Azərbaycan da, digər ölkələr də bilir. Burada gizli bir şey yoxdur. Bu səbəbdən də Ankarada olarkən Tramp özü də bildirdi ki, İranın bir nömrəli hədəfi Trampdır. Ancaq bunu həyata keçirmək elə də asan məsələ deyil. Çünki Amerika prezidentinin qorunması ən güclü təşkilatdır. Sayları həddən artıq çoxdur.
Məsələn, Ankarada keçirilən NATO-nun 36-cı sammitində iştirak etmək üçün gələndə Trampa xüsusi bir otel ayrıldı. Həmin otelin pəncərələri güllə keçirməz, divarları raket zərbələrinə davamlı idi. Yəni belə otellər tikilir ki, ali dövlət rəhbərinin qəbulu zamanı onların təhlükəsizliyinə təminat verilsin. Eyni zamanda da Amerikanın təhlükəsizlik orqanlarının əməkdaşları həmin ərəfədən əvvəlcədən gəlib orada iş aparıblar Türkiyənin xüsusi xidmət orqanları, MİT ilə birlikdə təhlükəsizliyə tam təminat veriblər. Ondan sonra da Tramp sammitdə iştirak etdi. Sammitdən də çox razı getdi. Xüsusilə Türkiyənin son illərdə əldə etdiyi nailiyyətlər, Ərdoğanın rəhbərliyi ilə Türkiyənin hərbi sənayesinin inkişafında əldə edilən uğurlar dünya liderlərinə çatdırıldı. Yəni İsrail kəşfiyyatı da güclüdür, güclü kəşfiyyat orqanlarından biridir. Ancaq İsrailin kəşfiyyat orqanlarının məlumat verməsi ki, İran kəşfiyyatı Trampa sui-qəsd hazırlayır, bilinən bir məsələ haqqında məlumat verməyin mənası nədir?
İsrail olan-olmayan, yaxud hamının bildiyi məsələləri kəşfiyyat məlumatları adı ilə ötürməyə çalışır. Çünki İsrailin əsas məqsədi ABŞ-la İran arasında olan razılaşmanı pozmaq idi və buna da qismən nail oldu. Elə həmin proqramın ilk bəndini İsrail pozdu. Livandan qoşunlarını çıxarmadı və bildirdi ki, biz Amerikanın vasalı deyilik, biz müstəqil ölkəyik, Livanın cənubu bizim milli təhlükəsizliyimizdə təhdid yaradır, qırmızı zonadır və sair. Ona görə biz oradan çıxmırıq. Onlar öz fəaliyyətlərində də bildirdilər ki, biz öz milli maraqlarımızdan çıxış edirik. Ona görə də müəyyən mənada İsrail ilə ABŞ arasında müəyyən soyuqluqlar yarandı. Hətta Amerika vətəndaşının İrana casusluq edərək İsrail haqqında məlumatlar ötürdüyü haqqında da məlumat yayıldı. Həmin Amerika vətəndaşı həbs olundu. Yəni bütün bunlar ABŞ-İsrail arasında münasibətlərə sərinlik gətirdi. Ancaq təbii ki, İsrailin ən yaxın strateji müttəfiqi Amerikadır. Bu günə qədər Amerikadan imtina etsəydi çoxdan İsrail yox idi. Yəni buna İran və digər ölkələr çoxdan müvəffəq olmuşdurlar. İranın dilindən desək, İsrailin sionist dövləti çoxdan yox olmuşdu. Onları bu gün ayaqda saxlayan da Amerikadır. Ona görə də yenə deyirəm, belə bir sensasion informasiya ilə MOSSAD çıxış edir ki, İran ABŞ prezidentini öldürmək istəyir, ona qarşı sui-qəsd hazırlayır. Bu bilinən, barəsində iş aparılan bir şey haqqında məlumat verməyin elə də ciddi əhəmiyyəti olmadığını düşünürəm"-deyə E.Həsənov qeyd etdi.
İradə SARIYEVA
