Yaqlanda məktub göndərməyin nə mənası…
Milli Məclisdə Ukraynadan olan deputatların Avropa Şurası Parlament Assambleyasında Azərbaycan əleyhinə səs verməsi məsələsi müzakirə olunub.
Avropa Şurasının (AŞ) baş katibi Torbyorn Yaqland Azərbaycana qarşı düşmən kəsilmiş adamdır. AŞ-nin tarixində 68 ildir tətbiq olunmayan Avropa Şurası Konvensiyasının 46.4-cü bəndini Azərbaycana qarşı tətbiq etmək istəyirlər.
Bunu Milli Məclisin sədri Oqtay Əsədov parlamentin plenar iclasında deyib.
O.Əsədov bildirib ki, bu gün Avropa Məhkəməsinin 10 mindən çox yerinə yetirilməyən qərarları var: “Avropanın böyük ölkələri içərisində mindən yuxarı, hətta 1500-dən çox qərarını yerinə yetirməyən ölkələr var. Hətta yerinə yetirilməyən qərarların cərimələrini də vermirlər. Ancaq Azərbaycanda bir neçə belə qərar var, cərimələri də ödənilir. Yaqland lotereya oyunu oynayırmış, 10 min işin içində əlinin altına Azərbaycanı çıxarıb. Yəni aydındır ki, bu, Azərbaycana qarşı tam ədalətsizlikdir. Əgər bu maddəni Azərbaycana tətbiq etmək istəsələr, biz Avropa Şurasında qalıb-qalmamaq haqqında fikirləşməliyik”.
Səməd Seyidov deyib ki, Milli Məclisin plenar iclasında səslənən fikirləri ümumiləşdirirək Avropa Şurasının Parlament Assambleyasına, o cümlədən Avropa Şurasının (AŞ) baş katibi Torbyorn Yaqlanda göndərməliyik. Milli Məclisin sədri Oqtay Əsədov isə bildirib ki, məktubu AŞ-nin baş katibinə göndərməyin xeyri yoxdur, lakin digər qurumlara göndərmək olar.
Rüfət Quliyevə verilən söz yerinə yetirilsə belə, nə xeyri…
Ukrayna ilə parlamentlərarası İşçi Qrupunun rəhbəri Rüfət Quliyev isə bildirib ki, qrupun Ukraynadan olan rəhbəri Maksim Kuryaçiy ilə danışıb: “O mənə söz verdi ki, gələn həftə işçi qrupun üzvləri bununla bağlı bəyanat verəcək. Hansı formada verəcəklər, ona baxacağıq”.
Bəzi deputatlar məhz Azərbaycana qarşı səs vermək üçün AŞ PA iclasına gəlir
Avropa Şurası Parlament Assambleyasının (AŞ PA) payız sessiyasında Azərbaycan nümayəndə heyəti ölkəmizin maraqlarını ən yüksək səviyyədə müdafiə etdi, ancaq bu sessiya bizim üçün asan keçmədi.
Bunu Azərbaycanın AŞ PA-dakı nümayəndə heyətinin rəhbəri, Milli Məclisin deputatı Səməd Seyidov Milli Məclisin dünən keçirilən iclasında deyib.
S.Seyidov bildirib ki, AŞ PA-nın bu sessiyasının bu şəkildə keçirilməsinin səbəbi yalnız Azərbaycanla bağlı bir neçə sənədin hazırlanması ilə əlaqədar deyil: “Bu sessiyanın bir neçə günü Azərbaycana sərf olunub. Yalnız böyük iclasda deyil, o cümlədən komitələrdə də, siyasi partiyalarda da Azərbaycanla bağlı məsələ müzakirə olunub. Bizim üçün tam şəkildə aydındır ki, bu məsələ haradan gündəmə gətirilib. Avropa Şurasının özündə gedən proseslər ona dəlalət edir ki, hansısa ölkəni hədəf seçərək öz problemini həll etməyə çalışır. Bizdən başqa, monitorinqdə 10-a yaxın ölkə var, ancaq bu ölkələrin problemləri bir kənara qoyulur, yalnız Azərbaycan hədəf seçilir. Çox təəssüflər olsun ki, sənədlərin qəbulu prosesində bəzi deputatlar öz işlərini kənara qoyub məhz Azərbaycana qarşı qeyri-obyektiv mövqe nümayiş etdirmək üçün AŞ PA-nın iclasına gəlmişdilər”.
Millət vəkili qeyd edib ki, ölkəmizə qarşı bu hücum Azərbaycanın uğurlu siyasəti ilə bağlıdır: "Həmin qüvvələr uğurlu siyasətə qarşı mübarizə aparırlar. Biz AŞ PA ilə münasibətlərimizi çox ciddi təhlil etməliyik. Əgər görsək ki, Avropa Şurasında Azərbaycana qarşı xoşagəlməz proseslər gedir, o zaman qəti mövqeyimizi ortaya qoymalıyıq”.
Oqtay Əsədovla Səməd Seyidovun fikirləri fərqləndi…
Avropa Şurası Parlament Assambleyasının (AŞ PA) payız sessiyasında Azərbaycanla bağlı qətnamələrin qəbulunda səsvermə zamanı bir sıra insanlar təsir altına düşərək səs veriblər. Burada ilk növbədə Ukraynadan olan deputatları qeyd etmək istəyirəm. Ukrayna deputatları Azərbaycan əleyhinə çıxış ediblər. Milli Məclisin deputatı Səməd Seyidov Milli Məclisin dünənki iclasında belə deyib.
S.Seyidov bildirib ki, Ukrayna-Azərbaycan əlaqələri inkişaf mərhələsini yaşayır: “Təəssüf ki, həmin deputatlar Azərbaycanın əleyhinə səs veriblər. Bu onların Ukraynaya qarşı çıxması deməkdir. Yalnız Poroşenkonun partiyasından olan deputatlar Azərbaycanın əleyhinə çıxmayıblar".
Milli Məclisin spikeri Oqtay Əsədov isə bildirib ki, AŞ PA-nın sessiyasında Azərbaycan əleyhinə sənədlərə Ukraynadan olan digər partiyaların nümayəndələri səs verdilər: "Təəssüflər olsun ki, hökumət partiyasının üzvləri də səsvermədə bitərəf qaldılar. Bütün bu metodları biz hamımız yaxşı bilirik. Bu bizi fikirləşməyə vadar edir”.
Biz niyə əxlaqsızlıqdan dağılan imperiyaların diqtəsi ilə yaşamalıyıq?
Avropa Şurası (AŞ) Azərbaycanı öz sıralarından çıxartmaq istəyirsə, onda Azərbaycan özü o qərarı gözləmədən AŞ-dən çıxmaqla bağlı qərarını verməlidir.
“Trend”-in məlumatına görə, bunu Milli Məclisin deputatı Tahir Kərimli bu gün parlamentin plenar iclasında deyib.
O qeyd edib ki, Avropa bizim bayrağımızdakı nə göy, nə də yaşıl rəngi görmək istəyir: “Biz niyə əxlaqsızlıqdan dağılan imperiyaların diqtəsi ilə yaşamalıyıq? Kimi azad etməliyiksə, özümüz azad etməliyik, heç vaxt böyük qüvvələrin diqtəsi ilə yaşamamalıyıq. Kor-koranə o qüvvələrin qərarlarını icra etməməliyik”.
Milli Məclisin sədri Oqtay Əsədov isə bildirib ki, biz AŞ-yə kor-koranə itaət etsəydik, bizə qarşı belə davranmazdılar: “Söhbətin kökü erməni diasporunun təsiri və Azərbaycanın tutduğu mövqe ilə əlaqədardır”.
Baki-xeber.com
