Gələn il ATƏT-in sədri kimi İtaliya Ermənistan-Azərbaycan, Dağlıq Qarabağ münaqişəsinin həllinə töhfə vermək üçün çalışacaq. Azərbaycanın İtaliyadakı səfirliyindən Trend-ə verilən məlumata görə, bunu İtaliya xarici işlər və beynəlxalq əməkdaşlıq nazirinin müavini Benedetto Della Vedova Azərbaycanın İtaliyadakı səfirliyi və İtaliya Parlamentində Azərbaycanın Dostları Parlamentlərarası Assosiasiyasının birgə təşkilatçılığı ilə İtaliya Senatının "Palazzo Giustiniani" sarayında "Azərbaycan və İtaliya arasında 25 illik əməkdaşlıq: strateji tərəfdaşlığa aparan yol" konfransda çıxışında deyib.
Azərbaycanla İtaliya arasında diplomatik münasibətlərin qurulmasının 25-ci ildönümü münasibətilə il ərzində təşkil olunmuş silsilə tədbirlərdən biri olan və Azərbaycanın Dövlət Müstəqilliyi Gününə təsadüf edən bu konfransda İtaliya parlamentinin, hökumətinin üzvləri, elmi-akademik dairələrin, ölkədə akkreditə olunan diplomatik korpusun, kütləvi informasiya vasitələrinin nümayəndələri iştirak ediblər.
Tədbiri giriş sözü ilə İtaliya Senatının vitse-prezidenti Linda Lançilotta açaraq iki ölkə arasında təşəkkül tapmış strateji tərəfdaşlıqdan məmnunluğunu bildirib, əlaqələrin siyasi, iqtisadi və mədəniyyət sahəsində inkişafı dinamikası, iki ölkə arasında əməkdaşlığın daha da genişləndirilməsi imkanları, habelə parlamentlərarası təmasların Azərbaycan-İtaliya münasibətlərinə verdiyi töhfələrdən danışıb.
İtaliya Parlamentində Azərbaycanın Dostları Parlamentlərarası Assosiasiyasının sədri senator Sercio Divina iki ölkə arasında münasibətlərin hazırkı yüksək səviyyəsinə nail olunmasında parlamentlərarası əməkdaşlığın, xüsusilə də rəhbərlik etdiyi assosiasiyanın verdiyi töhfələrdən söz açıb, eləcə də Azərbaycanın geostrateji önəmi, xüsusilə də İtaliya üçün əhəmiyyəti, ölkəmizdə müxtəlif sahələrdə əldə olunan uğurlardan bəhs edib.
Milli Məclisdə Azərbaycan-İtaliya parlamentlərarası əlaqələr üzrə işçi qrupunun sədri millət vəkili Azər Kərimli çıxış edərək Azərbaycan-İtaliya münasibətlərinin tarixindən, iki ölkə arasında müxtəlif sahələrdə əməkdaşlıqdan, qarşılıqlı səfərlərdən, Heydər Əliyev Fondunun əlaqələrin inkişafına verdiyi töhfələrdən, parlamentlərarası əməkdaşlığın əhəmiyyətindən, habelə ölkəmizin müstəqlillik dövründə əldə etdiyi nailiyyətlər, eləcə də Ermənistanın Azərbaycana qarşı hərbi təcavüzündən danışıb.
Tədbirə Bakıdan video-konfransla qoşulan İtaliyanın Azərbaycandakı səfiri Auqusto Massari tədbir iştirakçılarını salamlayaraq iki ölkə arasında strateji tərəfdaşlığın önəmini vurğulayıb, Azərbaycanın İtaliya üçün əhəmiyyəti, əlaqələrin daha da dərinləşdirilməsi üçün mövcud imkanlardan bəhs edib.
Ardınca Azərbaycanın İtaliyadakı səfiri Məmməd Əhmədzadə çıxış edərək Azərbaycanla İtaliya arasında əlaqələrin strateji tərəfdaşlıq səviyyəsinə yüksəlməsinə aparan yol, həyata keçirilmiş yüksək səviyyəli səfərlər, o cümlədən Prezident İlham Əliyevin 2014-cü ildə İtaliyaya rəsmi səfəri vaxtı qəbul olunmuş strateji tərəfdaşlıq haqqında birgə bəyanat, geniş iqtisadi gündəlik, mədəniyyət, elm, təhsil sahələrində önəmli mübadilələr, bu xüsusda Heydər Əliyev Fondunun töhfələri, əlaqələrin perspektivləri, Trans Adriatik Boru Kəməri (TAP), gələn il İtaliyanın ATƏT-ə sədrliyinin Ermənistan-Azərbaycan, Dağlıq Qarabağ münaqişəsinin həllinə verə biləcəyi töhfələrlə bağlı gözləntilərimiz, Azərbaycan-İtaliya əlaqələrinin 25 illiyinin qeyd edilməsi çərçivəsində təşkil olunmuş tədbirlər barədə danışıb.
Bundan sonra konfrans iki ölkə arasında siyasi, iqtisadi və mədəniyyət sahələrində münasibətlərə dair panellərlə davam etdirilib.
Siyasi paneldə ilk olaraq çıxış edən İtaliya xarici işlər və beynəlxalq əməkdaşlıq nazirinin müavini Benedetto Della Vedova iki ölkə arasında bütün sahələrdə təşəkkül tapmış yüksək səviyyəli əlaqələr, İtaliya-Azərbaycan strateji tərəfdaşlığı, əlaqələrin daha da dərinləşməsi üçün İtaliya hökumətinin göstərdiyi səylər, TAP-ın İtaliya üçün strateji əhəmiyyəti, onun nəzərdə tutulan qrafik üzrə realizasiyası üçün hökumətin atdığı addımlar, Azərbaycanın Avropa İttifaqı ilə əməkdaşlığının daha da dərinləşməsinin İtaliya tərəfindən tam dəstəklənməsi barədə danışıb, habelə gələn il ATƏT-in sədri kimi İtaliyanın Ermənistan-Azərbaycan, Dağlıq Qarabağ münaqişəsinin həllinə töhfə vermək üçün çalışacağını bildirib.
İtaliya Senatının Avropa İttifaqı Siyasəti daimi Komissiyasının sədri Vanino Kiti də öz çıxışında Azərbaycan-Avropa Birliyi əlaqələri və bu əlaqələrin genişlənməsinə İtaliyanın verə biləcəyi töhfələrə toxunub, ötən il rəhbərlik etdiyi komissiyanın üzvləri ilə birgə Azərbaycana etdiyi səfər və səfər vaxtı keçirdiyi görüşlər, ölkəmizlə bağlı müsbət təəssüratları barədə danışıb.
Ardınca çıxış edən Azərbaycan Respublikası Xarici İşlər Nazirliyinin Mətbuat Xidmətinin rəhbəri Hikmət Hacıyev müstəqilliyinin ilk illərində Azərbaycanın üzləşdiyi çətinlikləri, Ermənistanın Azərbaycana qarşı təcavüzü və münaqişənin həlli prosesi, ölkəmizin beynəlxalq münasibətlərdə artan nüfuzu, Azərbaycanın ikitərəfli və çoxtərəfli əsasda yürütdüyü müstəqil xarici siyasəti, siyasi, iqtisadi, sosial və digər sahələrdə ölkəmizin əldə etdiyi uğurları barədə danışıb. O, Azərbaycanın radikalizm, ekstremizm, terrorizm və qanunsuz miqrasiyaya qarşı mübarizənin ön xəttində yerləşdiyini və regionun sabitlik və təhlükəsizliyinin təmin olunmasında mühüm rol oynadığını qeyd edərək Avropa İttifaqı və İtaliya ilə əməkdaşlığın inkişaf perspektivlərinə toxunub. Avropa İttifaqı ilə Strateji tərəfdaşlığa dair saziş layihəsi üzrə danışıqların intensiv şəkildə davam etdirildiyini diqqətə çatdırıb.
İqtisadi sahədə əlaqələrlə bağlı paneldə ilk olaraq çıxış edən SOCAR şirkətinin vitse-prezidentinin müavini Vitaliy Bəylərbəyov əsas etibarilə iki ölkə arasında enerji sahəsində əməkdaşlıq, Cənub Qaz Dəhlizi və onun tərkib hissəsi olan TAP layihəsi, bu layihənin İtaliya üçün əhəmiyyəti, habelə Azərbaycanın neft-qaz, neft-kimya sahələrində İtaliya şirkətlərinin fəaliyyəti mövzularına toxunub.
Ardınca çıxış edən SNAM şirkətinin baş icraçı direktoru Marko Alvera TAP layihəsinin realizasiyası çərçivəsində görülən işlər, bu layihənin İtaliya və Avropanın enerji təhlükəsizliyinə verəcəyi töhfələr, SNAM ilə SOCAR arasında strateji tərəfdaşlıq mövzularına toxunub.
Mədəniyyət sahəsində əlaqələrlə bağlı paneldə çıxış edən İtaliyanın Mədəniyyət Nazirinin müavini Antimo Çezaro Azərbaycan-İtaliya arasında mədəniyyət sahəsində əməkdaşlıq, bu xüsusda Heydər Əliyev Fondunun verdiyi töhfələr, Bakıda IV Ümumdünya Mədəniyyətlərarası Dialoq Forumunda iştirak üçün bu il Azərbaycana səfəri və səfərlə bağlı xoş təəssüratları barədə danışıb.
Azərbaycanın Dostları Parlamentlərarası Assosiasiyasının üzvü senator Maria Rizzotti Azərbaycanın zəngin mədəniyyəti, müsəlman aləmində ilk dəfə olaraq məhz Azərbaycanda Avropa mədəniyyəti irsinin formalaşması, ölkəmizdə qadınların önəmli rolu, ölkəmizin multikultural ənənələri barədə danışıb.
Ardınca çıxış edən senator, sabiq təhsil naziri Stefania Ciannini ötən il İtaliyanın təhsil naziri qismində ölkəmizə həyata keçirdiyi səfər, səfər vaxtı Azərbaycanda təhsil sahəsində həyata keçirilən dövlət siyasəti ilə tanış olması, iki ölkə arasında təhsil, elmi-tədqiqat sahələrində əməkdaşlıq və onun daha da genişləndirilməsi imkanları barədə fikirlərini bölüşüb.
Sonra çıxış edən İtaliya Daxili İşlər Nazirliyinin İtaliya İslam Şurasının müşaviri, İtaliya İslam Dini Şurasının (CO.RE.İS.) sədr müavini, İSESKO-nun Qərbdə Təhsil və Mədəniyyət Şurasının sədri Yəhya Pallaviçini Azərbaycanın multikulturalizm modeli və bu modelin dünya üçün nümunə olduğundan danışıb, ölkəmizin dünyada dinlər və mədəniyyətlararası dialoqun təşviqindəki önəmli rolundan, bu xüsusda ölkəmizdə təşkil olunan beynəlxalq tədbirlərdən bəhs edib.
Tədbirdə son olaraq danışan İtaliya Senatının Maliyyə və Xəzinə daimi Komissiyasının sədri, Azərbaycanın Dostları Parlamentlərarası Assosiasiyasının sədr-müavini Mauro Marino konfransın yekunları ilə bağlı fikirlərini bölüşərək, iki ölkə arasında əməkdaşlıqda əldə edilmiş nailiyyətərin davamlılığının təmin edilməsi üçün müxtəlif sahələrdə mövcud böyük potensialdan faydalanmağın vacibliyini, o cümlədən İtaliya üçün prioritet əhəmiyyət kəsb edən TAP layihəsinin realizasiyasının önəmini qeyd edib.
