Oktyabrın 18-də Ermənistan Milli Şurasının vitse-spikeri Eduard Şarmazanov Azərbaycanın işğal etdikləri ərazilərində yaradılmış qondarma “respublika”dakı həmkarı ilə görüşüb.
“Armenpress” saytının xəbərinə görə, Şarmazanov deyib ki, qondarma “respublika”ya xarici ölkələrin parlamentlərindən deputatların səfərləri təşkil olunmalıdır ki, gəlib buradakı “demokratik mühit”in şahidi olsunlar.
Görünür, erməni yetkilisi bu sözləri deyərkən eyforiya vəziyyətində olub və xəyalında qurduğu “mühit”dən bəhs edib. Əks halda o bu sözü işlədib özünü lap elə soydaşlarının qarşısında özünü gülünc vəziyyətə qoymazdı. Maraqlıdır, parlamentində silah dililə danışılan, bütün qonşularının torpaqlarından pay uman, Azərbaycanın 20 faizlik ərazisini onilliklərlə işğal altında saxlayan, əsgər ölümləri üzündən vətəndaşları kütləvi şəkildə torpağını tərk edən, içindəki terrorçu qruplaşmaları zərərsizləşdirə bilməməsi nəticəsində günün günorta çağı polis idarəsində yüksək çinli məmurları girov götürülən və orada qətlə yetirilən bir ölkə işğal etdiyi torpaqlarda qurduğu qondarma rejimdə nə cür bir demokratiya yarada bilib ki, onu hətta xarici deputatların gözünə soxub qanunsuzluqlarına qanuni don geyindirmək həvəsinə düşüb? Bəlli ki, bu da bir erməni hiyləsidir və Şarmazanovun blef etdiyi ortadadır. Amma separatçı rejimin qondarma “demokratiyası” bir yana, görünür həmin o Şarmazanov yaxın keçmişimizdə baş verən “Lapşin olayı”nı unudub və ya unutmağa çalışır. Az qala bütün aparıcı ölkələrin şahidi olduğu bu olayları o ölkələrin parlament üzvlərinin bu tezliklə yaddan çıxaracağı isə qətiyyən inandırıcı deyil. O da inandırıcı deyil ki, hətta işğalçı ölkənin öz parlamentinin belə tanımağa cürət etmədiyi qondarma “DQR”ə özünə hörmət edən ölkənin legitim millət vəkili təşrif buyursun. Axı qanunun şah olduğu ölkələr bu torpaqların Azərbaycana məxsus olduğunu beynəlxalq hüquq çərçivəsində tanıyıb. Yox, Şarmazanovun sözünə aldanıb gəlmək istəyənlər olarsa, məhkəmələrimizin və İslah Əmək müəssisələrimizin qapıları onların üzünə hər zaman açıqdır.
Bu belə də bilinsin.
SAMİRƏ
