Xarici işlər naziri Elmar Məmmədyarov Polşanın xarici işlər naziri Vitold Vaşçikovski ilə görüşüb. XİN-nin mətbuat xidmətindən APA-ya verilən məlumata görə, görüşdə iki ölkə arasında münasibətlərin hazırkı səviyyəsi, gündəlikdə olan məsələlər, habelə müqavilə-hüquq bazası və baxılmaqda olan sənədlərin vəziyyətinə nəzər salındı və yüksək səviyyəli qarşılıqlı səfərlərin əməkdaşlığın genişləndirilməsi baxımından önəmi vurğulanıb.
Nazirlər iki ölkə arasında Hökumətlərarası birgə Komissiya, Azərbaycan-Polşa parlamentlərarası əlaqələr üzrə işçi qrupun fəaliyyətinə, o cümlədən XİN-lərarası siyasi məsləhətləşmələrə toxunub, müxtəlif formatlarda əməkdaşlıq formalarının intensivləşdirilməsinin vacibliyini qeyd ediblər.
Tərəflər, həmçinin, beynəlxalq təşkilatlar çərçivəsində, o cümlədən Avropa İttifaqı, xüsusən də Şərq Tərəfdaşlığı proqramı, NATO, ATƏT, habelə Vişeqrad qrupu çərçivəsində əməkdaşlığı təqdir ediblər.
Nazirlər regional enerji və nəqliyyat layihələri, o cümlədən Xəzər dənizinin Azərbaycan sektorundan hasil edilən neft və qazın Avropaya nəqli, eyni zamanda Şimal-Cənub, Şərq-Qərb nəqliyyat marşrutlarının imkanları, iqtisadi və vaxt baxımından üstünlükləri ilə bağlı fikir mübadiləsi aparıblar.
E. Məmmədyarov Ermənistan-Azərbaycan Dağlıq Qarabağ münaqişəsinin həllində cari vəziyyətdən danışıb.
Görüşdə vurğulanıb ki, gələn il Azərbaycanda Polşa məskənlərinin salınmasının 100 illiyi qeyd olunacaq və bu xüsusda, bir sıra ictimai-mədəni tədbirlərin keçirilməsi üçün birgə fəaliyyət proqramı üzərində iş gedir. Eyni zamanda, Polşa prezidenti Andjey Dudanın Azərbaycana səfər edəcəyinə dair məlumat verilib.
Nazirlər humanitar, turizm, mülki aviasiya və digər qarşılıqlı maraq doğuran sahələrdə əməkdaşlıq, o cümlədən Yaxın Şərqdəki vəziyyət və miqrant məsələlərinə dair fikir mübadiləsi aparıblar.
“Azərbaycanla Polşa arasında 10-dan çox sənəd baxılma mərhələsindədir”. Bunu Azərbaycanın xarici işlər naziri Elmar Məmmədyarov Bakıda səfərdə olan polşalı həmkarı Vitold Vaşşikovski ilə birgə mətbuat konfransında deyib.
Nazir indiyədək iki ölkə arasında 41 sənədin imzalandığını xatırladıb: "Hazırda 10-dan çox sənəd baxılma mərhələsindədir".
E.Məmmədyarov bildirib ki, Azərbaycan və Polşa dərin və qədim əlaqələrə malikdir: "İki ölkə NATO, ATƏT kimi beynəlxalq təşkilatlar çərçivəsində sıx əməkdaşlıq edirlər".
O, Polşanın Dağlıq Qarabağ münaqişəsi üzrə hər zaman birmənalı mövqe sərgilədiyini, Azərbaycanın mövqeyini dəstəklədiyini bildirib.
Polşanın xarici işlər naziri Vitold Vaşşikovski isə deyib ki, Azərbaycan Polşa üçün mühüm ölkədir. Nazir bildirib ki, Polşa üçün Azərbaycanla energetika, turizm və digər sahələrdə əməkdaşlıq vacibdir.
