“Dilqəm Əsgərov və Şahbaz Quliyev ailələri ilə videoəlaqə imkanı verilib...”
Özünü dünya birliyinə “humanist” dəyərlər daşıyıcısı olaraq sırımağa cəhd göstərən və bir çox hallarda hətta buna nail olan ermənilər dünyanın gözünə növbəti dəfə kül üfürməyə çalışır.
Məlum olduğu kimi, azərbaycanlı Dilqəm Əsgərov, Şahbaz Quliyev və Həsən Həsənov 2014-cü ildə dədə-baba torpaqlarına gedərək yaxınlarının qəbirlərini ziyarət etmək istərkən ermənilər Həsən Həsənovu qətlə yetirib, digər iki nəfəri isə əsir alıb və bu günə kimi onların görmədiyi işgəncə qalmayıb. Maraqlıdır ki, hətta bu məsələyə müxtəlif səviyyələrdə beynəlxalq müdaxilə də heç bir nəticə verməyib.
Bu günlərdə isə Dilqəm Əsgərov və şahbaz Quliyevin həyat yoldaşları Firuzə Əsgərova və Albina Veysəlova onların erməni əsirliyindən qurtarılması üçün Avropa Məhkəməsinə müraciət edib. Elə bunun ardınca da erməni hiyləgərliyi bütün qüvvəsilə işə salınıb. Belə ki, qondarma “DQR”-in “baş naziri”nin mətbuat katibi Artak Beqlaryan mətbuata açıqlamasında bildirib ki, Dilqəm Əsgərov və Şahbaz Quliyevin ailələrilə videoəlaqə (!) vasitəsilə görüşmək imkanı var. Necə deyərlər, utanmasan oynamağa nə var ki? Axı bu əlaqə nə zaman yaradıldı ki, Beynəlxaiq Qırmızı Xaç Komitəsi olmasa, ayda-ildə bir dəfə onlardan gələn məktubları da heç kəs görməzdi. Üstəlik qondarma “baş nazirin” qondarma “mətbuat katibi” onu da deyib ki, guya Dilqəm və Şahbazın “təhlükəsizliklərini təmin etmək” məqsədilə onları qapalı rejimdə saxlayırlar. O halda Avropa Məhkəməsinin bu qondarmalar yığınına bir sual ünvanlamasını istərdim: azərbaycanlı əsirlərə belə nümunəvi “şərait” yaradılıbsa, niyə onların üzündən işgəncə yağır?!
SAMİRƏ
