"Məni mənzillə təmin etdiyiniz, ailəmə sonsuz sevinc yaşatdığınız üçün Sizə minnətdaram"
Deyirlər ki, sevinc paylaşılanda çoxalır, artır, bir ürəkdən digər ürəyə işıq aparır, nur çiləyir. Mən son günlər yaşadığım və həyat yoldaşımın, üç balamın ürəkdən yaşadığı, könüldən hiss etdiyi bir dünyaya bərabər sevincimi sizinlə bölüşmək istəyirəm.
Bu sevinci, şadlığı mənim sadə, zəhmətsevər ailəmə, cənab Prezident, Siz yaşatdınız. İllərdir ürəyimdə məskən salan arzum Sizin iradəniz, kütləvi informasiya vasitələrində çalışan çoxsaylı insana göstərdiyiniz qayğı nəticəsində gerçəyə çevrildi.
Cənab Prezident! Sizin mətbuat işçilərinin mənzil şəraiti və sosial rifahının yüksəldilməsi naminə atdığınız addımlar, həyata keçirdiyiniz çoxsaylı uğurlu layihələr bizlərin həyatına birbaşa təsir edir, bizi daha da öz peşəmizə bağlayır.
Sizin rəhbərliyinizlə həyata keçirilən miqyasa gəlməyən uğurlu işlər sırasında jurnalistlərin mənzil-məişət şəraitinin yaxşılaşdırılması, evsiz jurnalistlərin mənzillə təmin olunması, onların həyatının, sosial durumunun yaxşılaşdırılaması da var. Milli Mətbuat Günü ərəfəsində mənzillə təmin edilən 255 nəfər media nümayəndəsinin içində mən də vardım. Sizə necə təşəkkür edəcəyimi bilmirəm. Sevincimin, şadlığımın həddi-hüdudu yoxdur. İndi mən üç balamın bizimlə bərabər çəkdiyi ev qayğısından uzağam. Sizin nəcib, xeyirxah addımlarınız nəticəsində mən də mənzil sahibi oldum. O mənzili böyük səxavət göstərərək mənə Siz hədiyyə etdiniz. Buna görə öz adımdan, həyat yoldaşım və övladlarımın adından Sizə sonsuz təşəkkürümü bildirirəm. Mənə mənzil verdiyiniz üçün Sizə valideynlərim, doğmalarım da böyük minnətdarlıqlarını bildirir.
Çox hörmətli cənab Prezident! Sizin media nümayəndələrinə dost münasibətiniz, bizi özünüzün ən yaxın köməkçiniz adlandırmağınız bizi hədsiz sevindirir. Fəxr edirik ki, Sizin kimi böyük, qüdrətli, səxavətli, humanist və comərd dostumuz var. Biz həmişə fəaliyyətimizi dövlətimizin maraqlarına xidmət istiqamətində qurmuşuq, bu gün də o yolu tutub irəliləyirik. Bu yolda bizə Sizin kimi cəsarətli, müdrik rəhbərimiz bələdçilik edir.
Azərbaycan mediası dövlətçi, vətənçi, milli maraqlarımızın keşiyində duran əsl vətənpərvər mediadır. Vətənə, dövlətə xidmət etmək bizim həm vətəndaşlıq, həm də peşə borcumuzdur.
Cənab Prezident, məni mənzillə təmin etdiyiniz, ailəmə sonsuz sevinc yaşatdığınız üçün Sizə minnətdaram. Tanrı Sizi və ailənizi qorusun! Dualarımız Sizinlədir!
Hörmət və böyük ehtiramla:
Namiq Quliyev
"Bakı-Xəbər" qəzetinin əməkdaşı
