Azər Allahverənov: "Məsələ ondadır ki, bir sıra iqtisadi göstəricilərə görə, ölkədə inkişaf var"
Bakıda Beynəlxalq Miqrasiya Təşkilatı və Azərbaycan Dövlət Miqrasiya Xidmətinin dəstəyi ilə təşkil olunan "Miqrasiya idarəetmə sahəsində əhatəli və səmərəli siyasət və təcrübə" mövzusunda müzakirələr keçirilib.
Tədbirdə DMX-nin beynəlxalq əməkdaşlıq üzrə departament rəhbəri Kayan Hacıyev bildirib ki, miqrasiyanın tənzimlənməsi və miqrantların hüquqlarının müdafiəsi Azərbaycan üçün vacib məsələdir. Onun sözlərinə görə, hazırda öz tarixi vətəninə qayıdan vətəndaşların, həmçinin, xarici miqrantların sayının artması müşahidə olunur. K.Hacıyev son illər Azərbaycanda istirahət edən turistlərin sayının artmasının da müşahidə olunduğunu qeyd edərək, müvafiq miqrasiya xidmətlərinin təkmilləşdirilməsinin vacibliyini söyləyib. Departament rəhbəri eyni zamanda bu sahədə aparılan islahatlar, xüsusilə Azərbaycanda miqrasiya sahəsində elektron xidmətlərin yaradılması haqqında danışıb. Daha sonra beynəlxalq və müxtəlif idarələrdən yerli ekspertlərin iştirakı ilə "Miqrasiyanın idarə olunması", "Sərhədlərin idarə olunması", "Səmərəli əmək miqrasiyası üçün siyasət və praktik tədbirlər" mövzusunda panel müzakirələr keçirilib. Qeyd edək ki, müzakirələrdə irəli sürülən təkliflər 2016-cı il sentyabrın 19-də BMT-də qəbul edilmiş "Qaçqın və miqrantlar barədə Nyu-York Bəyannaməsi" adlı qlobal sənədə dəstək prosesində Azərbaycanın səyləri kimi təqdim olunacaq.
DMX rəsmisi ölkədə xarici miqrantların sayının artmasının səbəblərinə toxunmayıb. Maraqlıdır, bəs ekspertlər bunu hansı amillərlə əlaqələndirir?
Məsələyə münasibət bildirən miqrantlar üzrə ekspert Azər Allahverənov bunu bir sıra amillərlə əlaqələndirdi: "O zaman xarici miqrantların axını artır ki, həmin ölkə miqrantlar üçün maraqlı olur. Bu gün Azərbaycan 3 vacib səbəbə görə miqrantlar üçün maraqlıdır. Birincisi, ölkədə siyasi cəhətdən sabitlik var. Yəni ölkədə hər hansı bir qeyri-sabitlik yoxdur. Sülh və əminamanlıq olduğu üçün, xarici miqrantlar Azərbaycana üstünlük verir. İkinci səbəb ölkədəki iqtisadi sabitliklə bağlıdır. Məsələ ondadır ki, bir sıra iqtisadi göstəricilərə görə, Azərbaycanda inkişaf var. Azərbaycanda transmilli layihələr həyata keçirilməkdədir. Ölkədə perspektiv nöqteyi-nəzərdən çox maraqlı sahələrdə müxtəlif beynəlxalq proqramlar icra olunmaqdadır. Təbii ki, bu da miqrantlar üçün cəlbedici olduğu üçün, onlar Azərbaycana üz tutur. Müşahidələr göstərir ki, əsasən müsəlman dövlətlərindən miqrantlar gəlir. Bunun üçüncü səbəbi isə sosio-mədəni uyğunluqla bağlıdır. Azərbaycan müsəlman ölkəsi olsa da, mədəniyyət müxtəlifliyi nöqteyi-nəzərdən digər dinlərdən olanlara da tolerant münasibət var. Yəni din və dil faktoru təsir edir ki, Azərbaycana gələn miqrantların sayı artsın. Əsasən bu üç faktor sözügedən məsələdə ciddi rol oynayır. Digər faktorları da saymaq olar, amma onlar həlledici deyil".
Vidadi ORDAHALLI
