Məhərrəm Qasımlı: "Buna görə möhtərəm Prezidentimizə sonsuz təşəkkürümü bildirirəm"
Roza Cəlilova: "Cənab Prezident, əminəm ki, bizim yaxşı tanıdığımız İradə Sarıyeva..."
Jurnalistlərin mənzil şəraitinin yaxşılaşdırılması məqsədilə ölkə başçısının həyata keçirdiyi siyasət, 255 aparıcı media nümayəndəsinə mənzillərin verilməsi tanınmış elm və mədəniyyət xadimlərinin də ürəyindən olub.
Qeyd edək ki, Azərbaycan Respublikasının Prezidenti İlham Əliyevin böyük humanistlik göstərərək jurnalistlərin sosial rifahının yaxşılaşdırılması, onların evlə təmin olunması istiqamətində gördüyü uğurlu işlərin nəticələrindən biri olaraq 2013-cü ildə 156, 2017-ci ildə isə 255 jurnalist mənzil sahibi olub. Ölkə başçısının təmənnasız qayğısına hər kəs müsbət yanaşır, ona öz təşəkkürünü bildirir.
Uzun illər ağır şəraitdə, kirayə mənzildə yaşayan, həyat yoldaşı və azyaşlı övladı ilə bu evdən o evə köçmək məcburiyyətində qalan redaksiyamızın əməkdaşı İradə Sarıyevaya ölkə başçısının mənzil hədiyyə etməsinə ölkənin tanınmış, nüfuzlu elm və mədəniyyət xadimlərindən müsbət reaksiyalar gəlməkdədir.
Azərbaycan Aşıqlar Birliyinin sədri, əməkdar elm xadimi, professor Məhərrəm Qasımlı redaksiyamızla əlaqə saxlayaraq İ.Sarıyevaya mənzil hədiyyə etdiyi üçün ölkə başçısı İlham Əliyevə təşəkkürünü bildirdi: "Azərbaycan Respublikasının Prezidenti İlham Əliyevin jurnalistlərin mənzil şəraitinin yaxşılaşdırılması məqsədilə həyata keçirdiyi siyasəti dəstəkləyirik. İ.Sarıyevanı uzun illərdir tanıyıram. O həmişə öz yazılarında dövlətimizi, dövlətçiliyimizi, milli maraqlarımızı, mədəniyyət siyasətimizi, xüsusən də aşıq sənətini tərənnüm, təbliğ edib. Belə bir qələm adamına verilən dəyər məni ürəkdən sevindirdi. İradə xanım uzun illərdir ağır şəraitdə kirayələrdə yaşayırdı. Onun çəkdiyi əzablar mənə yaxşı məlumdur. Şükür Allaha ki, İradə xanım da daxil olmaqla, cənab Prezident ehtiyacı olan jurnalistləri sevindirdi. Buna görə möhtərəm Prezidentimizə sonsuz təşəkkürümü bildirirəm".
Azərbaycan Respublikasının xalq artisti, görkəmli rəqs ustadı Roza Cəlilova da İ.Sarıyevanın dövlət başçısı tərəfindən mənzillə təmin edilməsini sevinclə qarşılayır: "Mən əvvəlcə uzun illər yazılarını izlədiyim, rəqs mədəniyyəti və rəqs ustadlarımızla bağlı saysız yazılarını sevə-sevə oxuduğum İradəni ev alması münasibətilə təbrik edirəm. Əzizim İradə, nəhayət ki, canın ünvan dəyişməkdən, nəm, şəraitsiz kirayə mənzillərdən qurtardı. Sağ olsun əziz və möhtərəm Prezidentimiz İlham Əliyev. Prezidentimiz səni sevindirdi, səninlə birgə ailən, oğlun, yaxınların və dostların, oxucuların da sevindi. Bu sevinci sənə və bizə hörmətli Prezidentimiz İlham Əliyev yaşatdı. Var olsun xalqımızın böyük oğlu. Mən ona sənə və digər həmkarlarına təmənnasız ev bağışladığına görə böyük təşəkkürümü bildirirəm. Ocağın isti olsun, çırağın yansın. Bundan sonrakı yaradıcılığın da öz axarında davam etsin. Cənab Prezident, əminəm ki, bizim yaxşı tanıdığımız İ.Sarıyeva yenə də öz yaradıcılığını dövlətə, milli və dövlətçilik maraqlarının müdafiəsinə, Sizin mədəniyyət siyasətinizi təbliğ etməyə həsr edəcək".
Xəbər xidməti
