Sevincimdən ürəyim köksümə sığmır. Fərəhimdən, şadlığımdan özümə yer tapa bilmirəm. Jurnalistikaya könül verdiyim ilk illərdə nə zamansa kirayə mənzillə "vidalaşıb", işıqlı, geniş, təmirli bir evə "xoş gördük" deyəcəyim günün yaxında olduğunu düşünmürdüm.
Ancaq belə bir mənzili xəyallarımda qurmuşdum. Ancaq xəyallarımda qurduğum o işıqlı, hər bucağı xoşbəxtlik saçan mənzili mənə, əziz Prezidentimiz, Siz hədiyyə etdiniz. Siz mənə təkcə ev bağışlamadınız, bir dünya səadət, xoşbəxtlik, fərəh, sabaha ümid, inam bəxş etdiniz. Mən uzun illər həyat yoldaşım və azyaşlı oğlumla Bakının müxtəlif yerlərində kirayənişin həyatı yaşamaq məcburiyyətində qalmışam. İllərlə o evdən bu evə köçmüşəm. Kirayədə yaşamağın nə qədər əzablı, zülmlü bir iş olduğunu hər kəs bilir. Amma mən və ailəm Sizin bizə hədiyyə etdiyiniz mənzildə keçmişdə yaşadığımız əzablı günlərə birdəfəlik nöqtə qoyacağıq. Çünki aydınlıq, işıq saçan mənzilimizdə həyatımızı davam etdirəcəyik.
Hörmətli Prezident! Mənim kiçik əməyimə böyük qiymət verərək ev-eşik, yurd-yuva, isti ocaq sahibi etdiyiniz üçün Sizə öz minnətdarlığımı çatdırıram. Mənim həyat yoldaşım da, 7 yaşlı oğlum da, valideynlərim də, digər doğmalarım da bu nəcib işinizə görə Sizə öz sonsuz təşəkkürlərini bildirirlər. Sizin ata qayğınız, təmənnasız dəstəyiniz öz həyatını, ömrünü jurnalistikaya həsr edən bir qadını həddən artıq fərəhləndirir, mənə qol-qanad verir, yaradıcılığa ruhlandırır. Yaradıcı adamın yaşamasına, yaradıcılıqla məşğul olmasına dövlət başçısının dəstək verməsindən gözəl nə ola bilər ki!
Bir yaradıcı insanın, xüsusən də cəmiyyətin ovqatını əks etdirən jurnalistin ağır vəziyyətdə yaşaması, evsiz-eşiksiz olması onun yaradıcılığının inkişafına da müəyyən qədər təsir göstərir. Amma o jurnalisti Sizin kimi qayğıkeş dövlət başçısı ağır həyatdan xilas edərək onu işıqlı həyata, aydın sabaha qovuşduranda ağrı da, acı da unudulur.
Çox hörmətli Prezidentimiz! Hər bir insan isti yuvaya, evə, doğma ünvana sahib olmaq istəyir. Ev insanın qüruru, arxa-dayağı, ümid və pənahıdır. Bu pənah yerini, ünvanını mənə Siz bəxş etdiniz. Evlər tikən, ailələr sevindirən, körpələrə qol-qanad verən Sizin kimi böyük şəxsiyyət yüzlərlə könülə işıq, nur verir. Bu nur bir ömürlük yolumuza, həyatımıza sirayət edəcək, bizi daha işıqlı əməllərə səsləyəcək. Azərbaycan jurnalistləri hər zaman vətənpərvər, dövlətə və dövlətçiliyə bağlı olub. Mən də bu yolda fəaliyyətimi həmişə davam etdirməyə hazıram. Bir qələm adamı kimi daim dövlətimizin, dövlət başçımızın yanındayam. Dövlətimə və Prezidentimə borcum çoxdur.
Cənab Prezident! Biz jurnalistlərə göstərdiyiniz qayğıya görə dayağınız Tanrımız olsun! O gün olsun ki, Sizin rəhbərliyinizlə qaçqın və məcburi köçkünlərimiz öz doğma ev-eşiklərinə qayıtsın və Siz onlara da öz ana torpaqlarında gözəl ev-eşik qurasınız. Siz on minlərlə ailəyə ümid, işıq, xoş sabah bəxş etmisiniz! Hər zaman xalqımızın dayağı, biz jurnalistlərin böyük dostusunuz! Cənab Prezident! Uca Yaradan Sizə yar olsun!
Böyük hörmət və ehtiramla Sizin mənzil hədiyyə etdiyiniz "Bakı-Xəbər" qəzetinin əməkdaşı, jurnalist İradə SARIYEVA
