Azərbaycan Milli QHT Forumu (MQF) New Baku Hotelində Milli Mətbuat Günü münasibətilə tədbir keçirib.
Ölkədə fəaliyyət göstərən televiziya, qəzet və informasiya agentliklərinin nümayəndələrinin qatıldığı tədbiri giriş sözü ilə açan MQF-nin prezidenti Rauf Zeyni jurnalistləri bayram münasibətilə təbrik edib, 142 illik yubileyini qeyd edən Azərbaycan milli mətbuatının keçdiyi uzun və şərəfli yoldan danışıb. Milli mətbuatımızın ötən illər ərzində çox çətin şəraitdə fəaliyyət göstərməyinə rəğmən şərəfli yol keçdiyini, bütün dövrlərdə qabaqcıl ideyaların carçısı və daşıyıcısı olduğunu qeyd edib. Azərbaycan müstəqilliyini bərpa etdikdən sonra mətbuatımızın da bir sıra problemlərlə üzləşdiyi, lakin xalqımızın ümummilli lideri Heydər Əliyevin hakimiyyətə qayıdışından sonra mətbuatın problemlərinin həlli istiqamətində vacib addımların atılması, Azərbaycanın Konstitusiyasında mətbuat azadlığının təsbit olunması, senzuranın ləğvi xatırlanaraq, ulu öndərin siyasi kursunu ləyaqətlə davam etdirən Prezident İlham Əliyevin təşəbbüsü ilə sonradan qəzetlərin nəşriyyata olan borclarının dövlət büdcəsi hesabına ödənilməsinə, milli mətbaut günü münasibətilə 255 evin mətbuat nümayəndələrinə bağışlanmasına görə öz minnətdarlığını bildirib və bunu milli mətbuatın inkişafına olan bir qayğı kimi vurğulayıb. Rauf Zeyni, həmçinin, ölkəmizdə söz, fikir və məlumat azadlığının yüksək səviyyədə təmin edildiyini, kütləvi informasiya vasitələrinə dövlət tərəfindən mütəmadi olaraq maddi və mənəvi dəstək verildiyini qeyd edib.
Daha sonra Azərbaycan Mətbuat Şurasının sədri, millət vəkilləri Əflatun Amaşov, İlham Məmmədov, Beynəlxalq Avrasiya Mətbuat Fondunun sədri Ümid Rəhimoğlu, MQF idarə heyətinin sədri Qorxmaz İbrahimli və digər şəxslər çıxış edərək Azərbaycan milli mətbuatının tarixinin zəngin və keşməkeşli olduğunu bildirib, müasir mətbuatımızın bu gün uğurla inkişaf etdiyini və milli-mənəvi dəyərlərimizin, adət-ənənələrimizin qorunub saxlanması istiqamətində mühüm rol oynadığını vurğulayıblar.
Sonda Azərbaycan Mətbuat Şurasının sədri, millət vəkili Əflatun Amaşova milli mətbuatın və vətəndaş cəmiyyətinin inkişafı, Azərbaycan Mətbaut Şurasının yaranması, formalaşması və inkişafı, milli və dövlətçilik maraqlarının beynəlxalq aləmdə müdafiəsi sahəsində göstərdiyi xidmətlərə görə və 60 illik yubileyi münasibətilə plaket, həmçinin bayram münasibətilə bir qrup jurnalistə milli mətbuatın inkişafındakı xidmətlərinə, ölkə həyatındakı yeniliklərin ictimaiyyətə obyektiv və qərəzsiz şəkildə çatdırılmasında xidmətlərinə görə MQF tərəfindən fəxri diplomlar təqdim olunub.
