Əsgəri xidmətimi başa vurub Bakıya üz tutduğumda böyük arzularım vardı. Elə mətbuata da o dönəmdə - 2001-ci ildə qədəm qoydum. 2003-də isə "Bakı-Xəbər"i yaratdıq və onun təsisçisi oldum. Bu yolda yürüdük, çətinliklərdən keçdik.
Fəaliyyətimizin ana xəttini isə hər zaman dövlətimizin mənafeyi, Vətənimizin gözəl sabahı ilə bağlı arzular təşkil etdi. Elə şəxsi həyatımla da bağlı gözəl xəyallarım vardı bütün gənclər kimi. Lakin illər ötdükcə, yaş üstünə yaş gəldikcə ən böyük arzumun - kirayələrdən qurtulacağımla bağlı ümidlərimin gerçəkləşəcəyi fikri sanki bir ilğım kimi məndən uzaqlaşırdı. Çünki gənclik xəyalpərəstliyilə qurduğum planlara getdikcə daha realist yanaşır və dərk edirdim ki, qəzetçiliklə məşğul olmaqla paytaxtda şəxsi mənzil sahibi olmaq mümkün deyil.
Azərbaycanda İpoteka Fondunun yaradılması barədə xəbəri oxuyanda bir qədər ümidləndim. Lakin çox keçmədən bunun da məndən ötrü əlçatan olmayacağını anladım. Axı bunun üçün ilkin ödəniş etmək, daha sonra aybaay vəsait ödəmək lazım idi, maaşının yarısını kirayə haqqına ödəyib yarısı ilə birtəhər yaşayan birinin bu yolla ev sahibi olması mümkün deyildi. Yaş isə ötürdü. Anamın toyumu görmək, nəvəsini oynatmaq arzusunu gözündə qoyduğumun fərqində idim, amma...
Ta ki, 2010-cu ilə kimi. Həmin ildə Milli Mətbuatımızın ildönümü günü Azərbaycan Mətbuat Şurasının yeni binasının açılışı oldu və cənab Prezident İlham Əliyev açılışda bütün ölkə jurnalistlərinin qəlbində ümid işığı yandıran bir qərarını dilə gətirdi - jurnalistlər üçün təmənnasız mənzillər tikiləcəyini bildirdi və hamı kimi mən də elə o vaxtdan bu ümidin işığına isindim, bir gün mənə də növbə çatacaq deyə səbrlə gözlədim. Artıq xəstə anamı sevindirmək olardı, çünki bu ümidi bizə şəxsən Prezidentimiz vermişdi!
2 il öncə - 39 yaşımda nəhayət anamı sevindirdim - ailə qurdum. Qızım Şəhlanın 1 yaşının tamam olmasından qısa müddət sonra isə həyatımın ən xoş xəbərini aldım - cənab Prezident məni də mənzil hədiyyəsinə layiq bilmişdi! İndi mənim balaca Şəhlam ÖZ EVİMİZİN pəncərəsindən dənizi görəcək, səhərlər Günəşin Xəzərdən doğmasını seyr edəcək, Xəzərin sahilində qürurla dalğalanan dünyanın ən gözəl Bayrağını izləyəcək - bundan daha böyük xoşbəxtlik varmı?
Bu sevinci bizə Siz yaşatdınız, cənab Prezident! Buna görə Sizə bütün ömrümüz boyu minnətdarıq və bilin ki, artıq anamın hər səhər namaz üstə etdiyi duaların bir ünvanı da artıb - o Sizsiniz!
Tahir TAĞIYEV
