Şakir Ağayev: "Jurnalistlərin sosial təminatının yaxşılaşdırılması məqsədilə onları mənzillə təmin etmək çox gözəl işdir"
Jurnalistlərin sosial durumunun inkişaf etdirilməsi məqsədilə onlara dövlət tərəfindən xüsusi qayğı göstərilir. Bu qayğının bariz nümunələrindən biri də jurnalistlər üçün tikilən binadır. Bəlli olduğu kimi, iyulun 20-də artıq ikinci bina ev sahibi olmaq istəyən jurnalistlərin ixtiyarına verildi.
Sevindirici haldır ki, qələm əhlinin sosial durumunun yaxşılaşdırılması məqsədilə üçüncü binanın inşası üçün Azərbaycan Respublikasının Prezidentinin ehtiyat fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna ilkin olaraq 5 milyon vəsait ayrılıb.
Jurnalistlər üçün növbəti binanın inşa olunmasını media əhli müsbət qiymətləndirir.
"Novoye vremya" qəzetinin baş redaktoru Şakir Ağayev "Bakı-Xəbər"ə açıqlamasında qeyd etdi ki, jurnalistlər üçün tikilən ilk bina 2013-cü ildə təhvil veriləndə onların sosial durumunun yaxşılaşdırılması məqsədilə müxtəlif fikirlər səslənirdi. Belə ki, torpaq götürülüb ev tikilməsi, güzəştli şərtlərlə ipoteka kreditinin verilməsi kimi təkliflər müzakirə olunurdu. Ancaq ölkə Prezidenti jurnalistlərin sosial təminatını təmin etmək üçün təqdirəlayiq bir iş gördü. Bəllidir ki, ilk bina 2013-cü ildə təhvil verildi. Həmin il Prezident öz çıxışında qeyd etmişdi ki, bura jurnalist şəhərciyi olacaq. Təbii ki, ölkə başçısı öz sözünün üstündə durdu və ilk bina təhvil verilən zaman ikinci binanın təməli qoyuldu. 255 mənzil jurnalistlərə təhvil verildi. Prezident çıxışında üçüncü binanın tikintisinin 3 il müddətinə başa çatdırılmasının vacibliyini qeyd etdi. Jurnalistlərin sosial təminatının yaxışlaşdırılması məqsədilə onları mənzillə təmin etmək çox gözəl işdir. Ev həsrəti ilə yaşayan şəxslərin ailə üzvlərinə sevinc bəxş etməkdən gözəl heç nə yoxdur həyatda. Üçüncü binanın təməlinin qoyulması da bir daha sübut etdi ki, media əhlinin sosial təminatı daha da inkişaf edəcək. Uca Yaradan dövlətimizə elə imkanlar versin ki, 4 və 5-ci binanın da təməlləri qoyulsun. Bu xoş niyyət sayəsində insanların jurnalistikaya sevgisi artır".
Günel CƏLİLOVA
