Azər Həsrət: "Ölkə başçısının jurnalistlərə xitabən etdiyi bu çağırış bizi mübariz olmağa və heç kimdən çəkinmədən peşə borcumuzu yerinə yetirməyə səsləyir"
İyulun 20-də Azərbaycan jurnalistləri üçün Prezident sərəncamı ilə tikilən ikinci binanın rəsmi açılış mərasimi keçirilib. Bakı şəhərinin Səbail rayonu ərazisində, Yeni Salyan yolunun kənarında reallaşan açılış mərasimində Azərbaycan Prezidenti İlham Əliyev iştirak edib.
Ölkə başçısı mətbuatın cəmiyyətdəki rolunu yüksək qiymətləndirib və çox mühüm mesajlar verib. Prezident deyib: "Jurnalistlər fəaliyyətləri ilə inkişafa öz töhfələrini verirlər. Cəmiyyəti incidən, narahat edən problemləri üzə çıxarırlar. Sizə deyə bilərəm ki, mən bəzi hallarda hansısa xoşagəlməz hadisə ilə bağlı məlumatı mətbuatdan əldə edirəm. Düzdür, mənə müxtəlif mənbələrdən hər gün müxtəlif məlumatlar gəlir. Yəni əlbəttə ki, mənə həm xarici, həm daxili siyasətlə, həm də təhlükəsizlik məsələləri ilə bağlı əsas məsələlər məruzə edilir. İnsanları narahat edən məlumatlar haqqında mən mətbuatdan da xəbər tuturam, dərhal reaksiya verirəm. Dövlət məmurları, yaxud digər şəxslər, qüsurlara yol verən şəxslər bilirlər ki, Azərbaycanda söz və mətbuat azadlığı imkan verməyəcək ki, onlar işdə hansısa qüsurlar buraxsınlar. Ona görə jurnalistlər bəlkə də özləri də bilmədən mənim köməkçilərimdir. Buna görə də mən sizə minnətdaram. Əminəm ki, siz gələcəkdə də bütün cəmiyyəti narahat edən, incidən məsələlər haqqında yazacaqsınız, harada hansı ədalətsizlik var, qanunsuzluq var, dərhal operativ reaksiya verəcəksiniz, cəmiyyətin və dövlət orqanlarının diqqətini bu məsələlərə cəlb edəcəksiniz".
Prezident İlham Əliyev bildirib ki, jurnalistlər həqiqəti, obyektivliyi başlıca meyar götürməli, yüksək məsuliyyətli olmalı, xarici təsir altına düşməməlidirlər. Azərbaycanın dünyada nüfuzunun durmadan artdığını, multikulturalizmin mərkəzi sayıldığını deyən Prezident bu sahədə də Azərbaycan mediasının töhfələrini xüsusi vurğulayıb: "Azərbaycan jurnalistikası daha da vətənpərvər olmalı, xaricdən ölkəmizə təsir cəhdlərinin qarşısının alınmasında fəal iş görməlidir. Milli maraqlar hər şeydən üstün tutulmalı, Azərbaycanın informasiya məkanı xarici təsir cəhdlərindən qorunmalıdır".
Göründüyü kimi, Prezident jurnalistlərə ədalətsizlik, qanunsuzluqlarla bağlı məsələlərə dərhal operativ reaksiya verməyi, cəmiyyətin və dövlət orqanlarının diqqətini həmin məsələlərə cəlb etməyi tapşırdı. Prezidentin bu tövsiyəsi media nümayəndələri tərəfindən necə dəyərləndirilir?
Azərbaycan Mətbuat Şurası İdarə Heyətinin üzvü, əməkdar jurnalist Azər Həsrət qəzetimizə bildirdi ki, bu, cənab Prezidentdən gələn ilk çağırış deyil: "Mən xatırlayıram, 2 il əvvəl o bizi - MŞ idarə heyətinin üzvlərini qəbul edəndə də belə bir çağırış etdi və dedi ki, alternativ informasiyalar əldə etmək üçün jurnalistlərdən tənqidi materiallar gözləyir. Jurnalistlər üçün istifadəyə verilən ikinci binanın açılışında da Prezident eyni mesajları verdi. Şəxsən mən yazdığım tənqidi materialları həmin çağırışa əsaslanaraq verirəm. Tənqid yazmaq heç də müxaliflik etmək anlamına gəlmir. Ölkə başçısı bunu tələb edirsə, biz jurnalistlər mütləq əməl etməliyik. Çünki bunun bizim ölkənin inkişafına xeyri var. Əks halda, Prezident belə tələbi qarşımıza qoymazdı. Hesab edirəm ki, Prezidentin bu çağırışından yalnız jurnalistlər deyil, eyni zamanda məmurlar da ciddi nəticə çıxarmalıdır. Onlar jurnalistikada işıqlandırılan normal tənqidin üzərinə inzibati vasitələri işə salmaqla getməməli, əksinə, həmin qeydlərdən nəticə çıxarmalıdır. Ölkə başçısının jurnalistlərə xitabən etdiyi bu çağırış bizi mübariz olmağa və heç kimdən çəkinmədən peşə borcumuzu yerinə yetirməyə səsləyir".
Məhəmmədəli QƏRİBLİ
