Akif Aşırlı: "Azərbaycan mətbuatının inkişafı, gələcək uğurları hələ qabaqdadır"
Xəbər verildiyi kimi, Azərbaycan Prezidenti İlham Əliyev "Jurnalistlərin dostu" mükafatına layiq görülüb.
Kütləvi informasiya vasitələri (KİV) arasında keçirilmiş sorğunun nəticələrinə əsasən, Azərbaycanda söz və mətbuat azadlığının təmin edilməsi, KİV-in müstəqilliyinin dəstəklənməsi, maddi-texniki bazanın möhkəmləndirilməsi, jurnalistlərin sosial müdafiəsinin gücləndirilməsi və mənzil-məişət şəraitinin yaxşılaşdırılması sahəsində yürütdüyü davamlı siyasətə görə Azərbaycan Prezidenti İlham Əliyev "Jurnalistlərin dostu" mükafatına layiq görülüb.
Qeyd edək ki, Mətbuat Şurası və "Ruh" Jurnalistlərin Müdafiəsi İctimai Birliyi 2017-ci ildə "Jurnalistlərin dostu" mükafatının təqdimatı üçün iyunun 20-dən iyulun 15-nə kimi kütləvi informasiya vasitələri arasında sorğu elan edib. Bu məqsədlə MŞ tərəfindən müvafiq işçi qrupu yaradılıb.
Mükafatın laureatını ölkənin tanınan, ictimai fikrə təsir göstərən televiziya, radio, qəzet, jurnal, informasiya agentliyi, internet informasiya resursu və jurnalist təşkilatlarının nümayəndələri müəyyənləşdirib.
Qeyd edək ki, "Jurnalistlərin dostu" mükafatı 1998-ci ildə təsis edilib. Mükafatın təsis edilməsində məqsəd cəmiyyətdə söz və məlumat azadlığını təbliğ və inkişaf etdirmək, media ilə dövlət qurumlarının, idarə, müəssisə və təşkilatların, ictimai birliklərin və siyasi partiyaların əlaqələrinin möhkəmləndirilməsinə kömək göstərmək, kütləvi informasiya vasitələrinə qayğı ənənələrini stimullaşdırmaqdır.
Ümumilikdə, Prezidentin jurnalistlərin dostu seçilməsi nəyə əsaslanır?
Məsələyə münasibət bildirən "Şərq" qəzetinin baş redaktoru Akif Aşırlının sözlərinə görə, Prezident İlham Əliyevə "Jurnalistlərin dostu" mükafatının verilməsi tamamilə düzgündür: "Əvvəla ölkə başçısına təşəkkür edirəm. Prezident İlham Əliyev Azərbaycan mətbuatına, jurnalistikasına məxsusi diqqət göstərir. Klassik media-mətbuat ənənələrinin yaşamasına cənab Prezident öz töhfələrini hər zaman verib. Eyni zamanda, öz dəstəyini hər zaman göstərib. Bu da növbəti bir dəstək idi. Qeyd edim ki, 2013-cü ildə 156 jurnalist evlə təmin olunmuşdusa, bu dəfə onların sayı 256 oldu. 256 jurnalist ailəsində bu gün sevinc, bayram ab-havası var. "Şərq" qəzetinin də iki əməkdaşı mənzillə təmin olundu. Ona görə də Prezidentə təşəkkür edirəm. Bütün bunların hamısı cənab Prezidentin jurnalistlərin ən səmimi, sadiq dostu olduğunun bariz göstəricisidir. Bu baxımdan da Prezident İlham Əliyevə "Jurnalistlərin dostu" mükafatının verilməsi tamamilə doğru və düzgün bir qərardır. Hesab edirəm ki, Azərbaycan mətbuatının inkişafı, gələcək uğurları hələ qabaqdadır".
Vidadi ORDAHALLI
