Elçin Mirzəbəyli: "Açıq şəkildə gedən bu prosesdə media iştirak edib və eyni zamanda bunu işıqlandırıb"
Xəbər verildiyi kimi, iyulun 20-də jurnalistlər üçün tikilmiş ikinci binada mənzillərin paylanması mərasimi keçirilib. Belə ki, 255 jurnalistə mənzillərin paylanması püşkatma yolu ilə olub.
Qeyd edək ki, Azərbaycan Prezidenti İlham Əliyevin "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" 2013-cü il 22 iyul tarixli Sərəncamı ilə tikilən 3 bloklu, 17 mərtəbəli bu binanın ümumi inşaat sahəsi 34 min kvadratmetrdir. Binada 9 birotaqlı, 144 ikiotaqlı, 93 üçotaqlı və 9 dördotaqlı olmaqla, 255 mənzil var.
Binada mənzillərin paylanmasının məhz püşkatma yolu ilə həyata keçirilməsi prosesin şəffaf olmasının ən yüksək göstəricisidir. Belə ki, jurnalistlərə mənzil paylanan zaman buna xüsusi önəm verilir. Hamının gözü qabağında mənzillər püşkatma yolu ilə paylanır.
Üç ay əvvəl Prezident İlham Əliyev də Bakı Ali Neft Məktəbinin yeni kampusunun açılışında iştirak edərkən püşkatmanın önəminə toxunub: "Bax, o binalar jurnalistlər üçün tikilmişdir. Hesab edirəm ki, bu da nadir təşəbbüsdür. Heç bir başqa ölkədə dövlət jurnalistlər üçün bina tikmir. Bu binalarda yaşayan və yaşayacaq jurnalistlər müxtəlif mətbu orqanların nümayəndələridir, burada mənzillərin bölgüsü də püşkatma yolu ilə aparılıb, yəni ədalət və obyektivlik tam təmin edilib".
O baxımdan bunun ən şəffaf və ədalətli metod olduğuna yanaşma necədir?
Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, püşkatma yolu ilə evlərin paylanması ən ədalətli yoldur: "Çünki hər kəsə eyni şans, eyni imkan tanınır. Artıq ikinci dəfədir jurnalistlərə mənzillərin paylanması püşkatma yolu ilə həyata keçirilir. 2013-cü ildə də mənzillər eyni qayda ilə bölüşdürülüb. Açıq şəkildə gedən bu prosesdə media iştirak edib və eyni zamanda bunu işıqlandırıb. Bu aspektdən də qənaətimə görə, jurnalistlərin mənzillə təmin edilməsində, komissiyanın fəaliyyəti kimi, mənzillərin bölüşdürülməsi prosesi də tam şəffaf şəkildə həyata keçirilib. Qənaətimə görə, cənab Prezidentin də məhz bu aspekti vurğulaması püşkatmanın ən optimal yol olduğunun göstəricisidir". Vidadi ORDAHALLI
