Fələstin xalqının hüquqlarının müdafiəsi Komitəsi və İslam Əməkdaşlıq Təşkilatı Əl-Aqsa məscidinin bağlanılmasına etiraz olaraq birgə kommünike qəbul edib. APA-nın məlumatına görə, Bakıda keçirilən Yerusəlim məsələsinə həsr olunan beynəlxalq konfransın iştirakçıları məscidin bağlanılması və cümə namazlarına qadağanın qoyulmasını pisləyiblər.
"İşğalçı qüvvə olan İsrailin bu və digər məhdudiyyətlərin tətbiq etməsi tarixi “status-kvo”nu və beynəlxalq hüququ pozur. Bu, Qüdsdə müqəddəs yerlərə səfər etmək istəyənlərə qarşı qəddar işğaldır, Fələstin xalqının hüquqlarına hücumdur", - deyə sənəddə bildirilir.
Kommünikedə deyilir ki, Fələstindəki dindarlara qarşı təxribatlar, hücum və qanun pozuntuları gərginliyi və dini həssaslıq mühitini mürəkkəbləşdirir və buna dərhal son qoyulmalıdır. Konfrans iştirakçıları beynəlxalq ictimaiyyətə İsrail hökumətinə təsir edərək onu tarixi “status-kvo”ya hörmət etməyə çağırıb, habelə metal detektorları sökməyi tələb edib.
Kommünikedə həmçinin bütün maraqlı tərəflərə gərginliyin azaldılmasına istiqamətlənmiş addımlar atmağa çağırış yer alıb.
Konfrans iştirakçıları hesab edirlər ki, İsrailin Fələstin torpaqlarının işğalına son qoyması davamlı sülhə gətirib çıxara bilər.
“Qüds məsələsinin uzun müddət həllini tapmaması beynəlxalq siyasətdə ikili standartların mövcud olduğunu göstərir”. Bunu isə xüsusi tapşırıqlar üzrə səfir Şahin Abdullayev deyib. Səfir bildirib ki, BMT-nin qətnamələrinin bəziləri dərhal həllin tapır, bəziləri isə illərlə kağız üzərində qalır.
“Azərbaycan da həmin vəziyyətdədir. Təhlükəsizlik Şurasında 1993-cü ildə Dağlıq Qarabağda işğala son qoyulmasına dair qətnamələr qəbul edilib. Amma indiyədək icrası mümkün olmayıb. Buna səbəb qətnamələrin icra mexanizmin olmamasıdır. Digər səbəb isə bəzi ölkələrin aktual məsələlərə passiv münasibət, işğalçıya təzyiq göstərməməsidir. İkili standartlar göz qabağındadır" – deyə, o bildirib.
Ş. Abdullayev deyib ki, Bakıda keçirilən beynəlxalq konfransın ərəb-müsəlman dünyasının müqəddəs şəhəri sayılan Qüds şəhərinin məsələsinin həllini gətirib çıxaracağını ümid edir.
