Anar Yusifoğlu: "Prezident tərəfindən qiymətləndirilmək qürurvericidir" Arzu Şirinova: "Mənzillə təmin olunan bütün həmkarlarımı təbrik edirəm" Azər Nuriyev: "Ev sahiblərinin çoxunu tanıdığım üçün, tam əminliklə deyə bilərəm ki, çox ədalətli seçim olub, əməyimizin boşa getmədiyinin şahidi olduq" Zülfiyyə Quliyeva: "Cənab Prezidentin bu qayğısı bir daha sübut etdi ki, ölkəmizdə jurnalistlərin sosial problemlərinin həllinə dövlət səviyyəsində qayğı var" İradə Sarıyeva: "Dövlətin media mənsublarına təmənnasız mənzil verməsi olduqca nümunəvi bir işdir" Fərəh Sabirqızı: "Mənzil-məişət şəraiti ağır olan bir jurnalist ailəsini sevindirdiyi üçün cənab Prezidentə minnətdarlığımızı bildiririk"
Azərbaycan Prezidenti İlham Əliyevin qayğısı ilə jurnalistlərin sosial durumunun yaxşılaşdırılması məqsədilə tikilən ikinci bina mənzil gözləyənlərin ixtiyarına verildi. Dünən 255 mənzildən ibarən olan binanın açılışı oldu.
Məlumat üçün bildirək ki, Azərbaycan Respublikası Prezidentinin "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" 2013-cü il 22 iyul tarixli Sərəncamı ilə tikilən 3 bloklu, 17 mərtəbəli bu binanın ümumi inşaat sahəsi 34 min kvadratmetrdir. Binada 9 birotaqlı, 144 ikiotaqlı, 93 üçotaqlı və 9 dördotaqlı mənzil var. Binanın həyətində idman meydançası yaradılıb, geniş abadlıq işləri görülüb.
Mənzil sahibi olan həmkarlarımız sevinc hisslərini qəzetimizlə bölüşdülər.
"Bakı-Xəbər" qəzetinin əməkdaşı İradə Sarıyeva bizimlə söhbətində bildirdi ki, Azərbaycan dövlətinin jurnalistlərə qayğısı illərdir ənənə halını alıb. Media təmsilçiləri bu hərtərəfli qayğını öz həyatında hiss edir: "Azərbaycan jurnalistikasının inkişafı naminə atılan hər bir addım təqdirəlayiqdir. Ölkəmizdə jurnalistlərin mənzillə təmin olunması, dövlətin media mənsublarına təmənnasız mənzil verməsi olduqca nümunəvi bir işdir. Uzun illər kirayələrdə həyat sürən jurnalistlərin evlə təmin olunması doğrudan da onların sosial-məişət qayğılarından uzaqlaşaraq yaradıcılığa daha möhkəm bağlanmasına səbəb olacaq. Artıq yuvası olan jurnalist gücünü ancaq yaradıcılığa verəcək, dövlətə, dövlətçiliyə daha çox fayda verməyə çalışacaq. Bizə bu sevinci yaşadan, başda ölkə başçısı İlham Əliyev olmaqla, əməyi keçən hər bir kəsə təşəkkür edirik".
"Xalq Cəbhəsi" qəzetinin redaktoru Arzu Şirinova qəzetimiz vasitəsilə bildirdi ki, Azərbaycan Prezidenti İlham Əliyevin sərəncamı ilə jurnalistlər üçün tikilmiş ikinci binada mənzillə təmin olunması qürurvericidir: "Bu sevinci mənə, ailəmə yaşatdığı üçün cənab Prezidentə təşəkkür edirəm. Mənzillə təmin olunan bütün həmkarlarımı təbrik edirəm. Yeni evlərində xoş günlər yaşasınlar, ruzuları bol olsun. Bu siyahıdan kənarda qalan, ancaq haqqı çatan dostlarıma da səbrli olmağı tövsiyə edirəm. İnşallah, 3 ildən sonra onlar da sözlə ifadə olunmayan bu sevinci yaşayar".
Sevinənlər arasında "Azadinform.az" xəbər agentliyinin əməkdaşı Azər Nuriyev də var. O bizimlə söhbətində bildirdi ki, dünən 255 jurnalist evlə təmin olundu: "Həmin 255 həmkarımın arasında adımın olmasından bir qürur və sonsuz sevinc hissi keçirirəm. Qənaətimcə, cənab Prezident bu evi bizlərə təqdim etməklə tək bizləri deyil, yaxınlarımızı, bizi sevən qohum və tanışlarımızı da sevincə qərq etdi. Düzdür, bu barədə çox deyilsə də, amma təkrarlamağa məcburam, nə MDB məkanında, nə də dünyada jurnalistlərə ev verilməsi təcrübəsi yoxdur. Prezident İlham Əliyevin də tədbirdə qeyd etdiyi kimi, ölkəmiz artıq bu kimi layihələri reallaşdırmaqla sosial bir dövlətə çevrilir. 20 ilə yaxın müddətdə mətbuatda çalışıram. Ailəmlə birlikdə mənə yaşatdığı bu sevincə görə ölkə Prezidentinə dərin təşəkkürümü bildirirəm. Hədiyyəni necə qiymətləndirmək olar? Əlbəttə, ilk növbədə jurnalistlərə verilən dəyər kimi. Evsizlik, kirayənişinlik həyatı həm maddi, həm də mənəvi əzabdır. Bir faktı da qeyd edim ki, yeni binada ev sahiblərinin çoxunu tanıdığım üçün, tam əminliklə deyə bilərəm ki, çox ədalətli seçim olub, əməyimizin boşa getmədiyinin şahidi olduq. O cümlədən Prezident Administrasiyasına, Prezidentin ictimai-siyasi məsələlər üzrə köməkçisi, PA-nın İctimai-siyasi məsələlər şöbəsinin müdiri Əli Həsənova və digər dəyərli insanlara minnətdaram! Onların gərgin əməyi nəticəsində, sözün əsl mənasında, evsiz olan həmkarlarım evlə təmin olundu. Arzu edirəm ki, gələcəkdə digər həmkarlarım da ev sahibi olsun".
"Mövqe.az" saytının müxbiri Zülfiyyə Quliyeva qəzetimizə açıqlamasında bunları dedi: "Çox sevincliyəm. Cənab Prezidentə öz və ailəmiz adından minnətdaram. Bəllidir ki, jurnalist maaşı ilə şəhərin nəinki belə mərkəzə yaxın bir yerində, kənarda da ev almaq bizim üçün əlçatmazdır. Prezidentin bu qayğısı neçə-neçə ailənin canını kirayələrdən qurtardı. Bu elə ən böyük savab əməldir. Cənab Prezidentin bu qayğısı bir daha sübut etdi ki, ölkəmizdə jurnalistlərin sosial problemlərinin həllinə dövlət səviyyəsində qayğı var. Bu qayğıdan bizə də pay düşdüyü üçün çox minnətdaram. Cənab Prezidentin bizə hədiyyə etdiyi mənzildə onun Ali Baş Komandanı olduğu Azərbaycan Ordusunun iki gələcək əsgəri böyüyəcək. Cənab Prezidentin hədiyyə etdiyi mənzilin mənəvi dəyəri maddi dəyərindən dəfələrlə üstündür mənim üçün. Biz o mənzildə yaşayaraq hər gün ölkə başçısının qayğısını öz üzərimizdə hiss edəcəyik. Bu bizim peşə fəaliyyətimizə də bir dəstəkdir. Ev kimi vacib problemi həll olunan jurnalistlər özlərindən çox cəmiyyətin yükünü çəkəcək".
"Yeni Azərbaycan" qəzetinin müxbiri Aqşin Şahinoğlu qeyd etdi ki, dövlətimiz tərəfindən evlə təmin olunan jurnalistlər sırasına onun da adı yazılıb: "Dövlətimiz və Prezidentimiz tərəfindən belə yüksək mükafatla təltif olunduğumuz üçün sonsuz sevinc hissi yaşayırıq. Uzun illərdir bir yerdə çalışdığımız dostların da bu gün eyni sevinci yaşaması adamı ikiqat xoşbəxt edir. Belə gözəl təşəbbüsə, hər birimizə böyük xoşbəxtlik bəxş etdiyinizə və mətbuata, sözün həqiqi mənasında, böyük dost münasibətinizə görə təşəkkürlər, cənab Prezident!
Həmçinin, bu prosesin şəffaf və ədalətli şəkildə həyata keçirilməsini təmin etmiş, böyük zəhməti olan Azərbaycan Prezidentinin ictimai-siyasi məsələlər üzrə köməkçisi Əli Həsənova və İctimai-siyasi şöbənin bütün əməkdaşlarına, mənə və həmkarlarıma dəstək olan "Yeni Azərbaycan" qəzetinin kollektivinin hər bir üzvünə, sevincimizə şərik olan və təbrik edən bütün həmkar və dostlara sonsuz təşəkkürlərimi çatdırıram.
Nəhayət, ev almış bütün həmkarlarımı ürəkdən təbrik edirəm.
İnşallah, qalanlara da qismət olsun".
İctimai Televiziyanın departament direktoru Anar Yusifoğlu bildirdi ki, Azərbaycan Prezidenti jurnalistlərə hər zaman qayğı və diqqət göstərib: "Son illər jurnalistlərə göstərilən qayğı və diqqət, onların mənzillərlə təmin edilməsi, jurnalistlərə adların verilməsi, onlara müxtəlif orden və medalların təqdim edilməsi mətbuata və sözə verilən bir dəyərdir. Prezident tərəfindən qiymətləndirilmək qürurvericidir.
Siyahı göstərdi ki, evlərin verilməsində ədalət prinsipləri hər şeydən üstün tutulub. Bu həm də media siyasətinin düzgün və vicdanlı aparılmasıdır. Buna görə də ayrıca təşəkkür!".
CBC telekanalının əməkdaşı Fərəh Sabirqızı da sevinir, deyir ki, həyat yoldaşı Məğrur Əliyevlə 20 ildən çoxdur mətbuatda çalışır: "Əməyimizi qiymətləndirdiyi, mənzil-məişət şəraiti ağır olan bir jurnalist ailəsini sevindirdiyi üçün dövlətimizə və cənab Prezidentə minnətdarlığımızı bildiririk. Çox ədalətli seçim olub, əməyimizin boşa getmədiyinin şahidi olduq".
Günel CƏLİLOVA
