Yadigar Məmmədli: "Bu, cənab Prezidentin jurnalistlərin sosial vəziyyətinin yaxşılaşdırılmasına göstərdiyi qayğının nəticəsidir" Elçin Mirzəbəyli: "Bu, ilk növbədə, jurnalistləri ən böyük qayğıdan azad edir və onların yaradıcılıq imkanlarının genişlənməsinə zəmin yaradır"
Məlum olduğu kimi, Prezident İlham Əliyev kütləvi informasiya vasitələri əməkdaşlarının sosial müdafiəsinin gücləndirilməsi ilə bağlı əlavə tədbirlər haqqında Sərəncam imzalayıb.
Sərəncama əsasən, Azərbaycanın kütləvi informasiya vasitələri əməkdaşlarının mənzil-məişət şəraitinin yaxşılaşdırılması və onlar üçün növbəti yaşayış evinin tikintisi ilə bağlı Azərbaycan Respublikası Prezidentinin ehtiyat fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna ilkin olaraq 5 milyon manat ayrılıb. Sərəncamın 1-ci hissəsində göstərilən məbləğdə maliyyələşmənin təmin edilməsi Maliyyə Nazirliyinə tapşırılıb.
Bu arada, Prezident İlham Əliyev jurnalistlər üçün tikilmiş növbəti binada Milli Mətbuat Günü münasibətilə mənzillərin paylanması mərasimindən sonra jurnalistlər üçün inşa ediləcək üçüncü yaşayış binasının təməlini qoyub. Dövlət başçısı binanın texniki-iqtisadi göstəricilərini əks etdirən stendə baxıb. Diqqətə çatdırılıb ki, Azərbaycan Prezidentinin Sərəncamına əsasən inşa ediləcək bu binada da 255 mənzil olacaq. Beləliklə, 2010-2017-ci illərdə tikilib istifadəyə verilmiş iki və hazırda təməli qoyulan üçüncü binada mənzillərin ümumi sayı 665-ə çatacaq.
Jurnalistlərlə bağlı bu layihənin davamlı olmasına media ekspertləri necə yanaşır?
Məsələyə münasibət bildirən media eksperti Yadigar Məmmədlinin sözlərinə görə, bu, cənab Prezidentin jurnalistlərin sosial vəziyyətinin yaxşılaşdırılmasına göstərdiyi qayğının davamlı olmasının göstəricisidir: "Hörmətli cənab Prezident çıxışlarının birində bildirmişdi ki, bu layihə davamlı olacaq və sözügedən ərazi jurnalistlər şəhərciyinə çevriləcək. Ölkə başçısı sözünü tutaraq bunu çox uğurla həyata keçirir. İkinci bina jurnalistlərə təhvil veriləndən sonra üçüncü binanın da əsası qoyuldu. Bu, dövlətin, cənab Prezidentin jurnalistlərin sosial vəziyyətinin yaxşılaşdırılmasına göstərdiyi qayğının nəticəsidir. Hər halda görünən odur ki, dövlət başçısının bu addımını təqdir edən çoxdur. Əsl, peşəkar jurnalistlər Prezidentin bu addımını dəstəkləyir. Ona görə ki, jurnalistlər sosial vəziyyəti aşağı olan kateqoriyaya daxildir. Onların başqa formada mənzil alması heç cür mümkün deyil. O üzdən, cənab Prezidentin bu humanist aksiyasının davamlı olması təqdirəlayiqdir".
"Xalq Cəbhəsi" qəzetinin baş redaktoru Elçin Mirzəbəyli də Prezidentin bu addımını dəstəklədiyini bildirdi: "Prezidentin jurnalistlərin mənzil şəraitinin yaxşılaşdırılması ilə bağlı son illər ərzində qəbul etdiyi qərarları və atılan addımları yalnız yüksək dəyərləndirmək olar. Bu, ilk növbədə, jurnalistləri ən böyük qayğıdan azad edir və onların yaradıcılıq imkanlarının genişlənməsinə zəmin yaradır. Sosial qayğılar nə qədər az olarsa, bu bir o qədər yaradıcılıq mühiti üçün müsbət zəmin yaradır. Dövlətin media nümayəndələrinə bu qədər həssas yanaşmasına və jurnalistlərin mənzil şəraitinin yaxşılaşdırılmasına görə cənab Prezidentə dərin minnətdarlığımı bildirirəm".
Vidadi ORDAHALLI
