"Jurnalist şəhərciyi"nin yol problemi də həll olundu
Prezident İlham Əliyev iyulun 20-də jurnalistlər üçün tikilmiş növbəti binada Milli Mətbuat Günü münasibətilə mənzillərin paylanması mərasimində iştirak edib.
Prezidentin ictimai-siyasi məsələlər üzrə köməkçisi Əli Həsənov, Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və Azərbaycan Mətbuat Şurasının sədri Əflatun Amaşov dövlət başçısına məlumat veriblər ki, jurnalistlər üçün inşa edilən ikinci binada 255 mənzil var. Azərbaycan Respublikası Prezidentinin "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" 2013-cü il 22 iyul tarixli Sərəncamı ilə tikilən 3 bloklu, 17 mərtəbəli bu binanın ümumi inşaat sahəsi 34 min kvadratmetrdir. Binada 9 bir otaqlı, 144 ikiotaqlı, 93 üçotaqlı və 9 dördotaqlı mənzil var. Binanın həyətində idman meydançası yaradılıb, geniş abadlıq işləri görülüb.
Dövlət başçısı nitq söyləyib. Dövlət başçısı qeyd edib: "22 iyul - Milli Mətbuat Günü münasibətilə Azərbaycan jurnalistlərini ürəkdən təbrik edirəm, onlara yeni uğurlar arzulayıram. Bu gözəl peşə bayramı ərəfəsində jurnalistlər üçün tikilmiş yaşayış binasının açılışına toplaşmışıq. Bu, sayca ikinci binadır. Birinci binada artıq neçə ildir ki, jurnalistlər yaşayırlar. İndi də ikinci binanın açılışını qeyd edəcəyik. Birinci binada 156, ikinci binada isə 255 mənzil var. Eyni zamanda, biz bu gün üçüncü binanın təməlini qoyacağıq. Üçüncü binada da 255 mənzil nəzərdə tutulur".
İlham Əliyev bildirib ki, beləliklə, qısa müddət ərzində yüzlərlə jurnalistə dövlət tərəfindən mənzil verilir və bu, dövlət tərəfindən Azərbaycan jurnalistikasına göstərilən növbəti diqqətin təzahürüdür.
Prezident vurğulayıb ki, Azərbaycan jurnalistikası inkişaf edir və cəmiyyətdə çox müsbət rol oynayır: "Azərbaycanda bütün azadlıqlar, o cümlədən söz azadlığı təmin olunub və siz jurnalistlər bunu yaxşı bilirsiniz. Azərbaycanda minlərlə mətbuat orqanı var ki, sərbəst fəaliyyət göstərir, qeydiyyatdan keçir. Bu gün Azərbaycan jurnalistikası cəmiyyəti narahat edən problemləri üzə çıxarır, çox dəyərli təhlillər aparır və ümumiyyətlə, ölkəmizin inkişafında çox müsbət rol oynayır. Mən həmişə çalışırdım və çalışıram ki, jurnalistlərə öz dəstəyimi göstərim. Mənim jurnalistlərlə çoxsaylı görüşlərim, səmimi söhbətlərim bunu göstərir. Xüsusilə jurnalistlər üçün binaların tikintisi də bu siyasətin bir təzahürüdür".
Dövlət başçısı xatırladıb ki, bu təşəbbüs bir neçə il bundan əvvəl irəli sürülmüşdü: "Jurnalistlər belə məsələ qaldırmışdılar. Mən də buna müsbət reaksiya verdim. Nəticə etibarilə biz burada artıq ikinci binanın açılışını qeyd edirik. Xatırlayıram ki, birinci binanın açılışında - 4 il bundan əvvəl mən demişdim ki, yəqin ki, gələcəkdə bu əraziyə "jurnalistlər şəhərciyi" deyiləcək və bu, belə də oldu. Artıq bu gözəl yer jurnalistlər şəhərciyidir. Burada üçüncü bina da tikiləcək. Əlbəttə ki, gələcəkdə biz jurnalistlərin məişət problemlərinin həlli üçün əlavə tədbirlər görəcəyik. Mənə deyiblər ki, burada yeni yola ehtiyac var, çünki indi bir tərəfdən yol çəkilib. Ona görə müvafiq göstəriş verilib ki, hər iki tərəfə çıxış olsun ki, insanlar burada daha da rahat yaşasınlar.
Hər bir şəhərin ən qiymətli, ən prestijli yerləri var. Adətən, bu, şəhərlərin mərkəzi olur və dəniz kənarında yerləşən şəhərlərdə dənizə mənzərəsi olan binalar daha da prestijli sayılır. Bu binalar həm dəniz mənzərəlidir, həm də şəhərin mərkəzində yerləşir. "Azneft" meydanına buradan cəmi 5 dəqiqəlik yoldur. Bu bir də onu göstərir ki, biz jurnalistlər üçün ən yaxşı şərait yaratmağa çalışırıq. Binalar da çox gözəldir, genişdir, işıqlıdır, rahatdır".
Prezident İlham Əliyev əmin olduğunu bildirib ki, burada jurnalistikada böyük xidmətlər göstərmiş, Vətən qarşısında böyük xidmətləri olmuş insanlar rahat yaşayacaq: "O ki qaldı jurnalistikanın gələcək inkişafı ilə bağlı məsələlərə, sizə deyə bilərəm ki, Azərbaycan dövləti azad mətbuatın inkişafında bundan sonra da fəal olacaq. Jurnalistlər üçün bütün şərait yaradılıb. Bu gün Azərbaycan cəmiyyəti rahat, təhlükəsizlik və sabitlik şəraitində yaşayır. Bu, indiki zamanda özlüyündə bir nailiyyətdir. Biz ölkəmizi bütün mümkün olan risqlərdən qoruyuruq. O ki qaldı daxildə mövcud olan risq mənbələrinə, bunlar demək olar ki, yoxdur. Xaricdən özümüzü qorumaq üçün kifayət qədər ciddi siyasət aparılır - həm ideoloji sahədə, həm də sərhədlərimizin qorunmasında. Ümumiyyətlə, biz həmişə Azərbaycanı mümkün olan risklərdən qorumağa çalışırıq ki, Azərbaycan xalqı rahat, sülh şəraitində yaşasın. Hesab edirəm ki, buna nail olmuşuq".
Dövlət başçısı qeyd edib ki, bu binalarda yaşayan və bundan sonra yaşayacaq jurnalistlər müxtəlif siyasi spektrə aiddir: "Burada da heç bir ayrı-seçkiliyə yol verilmədi. Müxtəlif siyasi baxışları olan şəxslər, müxtəlif partiyaların üzvləri burada bir yerdə, bir ailə kimi yaşayacaqlar. Əslində Azərbaycan cəmiyyəti də bu istiqamətdə inkişaf edir, Azərbaycanda həmrəylik var. Azərbaycan cəmiyyəti vahid amal ətrafında birləşib. Bizdə olan inkişaf, sabitlik, əmin-amanlıq, əlbəttə, bu gün siz də yaxşı bilirsiniz ki, dünyanın bir çox yerlərində öyrənilir, bəzən təəccüblə qarşılanır və bunun çox sadə səbəbi var. Çünki Azərbaycanda çox gözəl demokratik şərait var, Azərbaycanda iqtisadi inkişaf var, Azərbaycan müstəqil siyasətini apararaq həm bölgədə, həm də dünyada öz mövqelərini möhkəmləndirir, bizim təsir imkanlarımız genişlənir, böyüyür və Azərbaycan xoşniyyətli siyasət yürüdür. Bizim siyasətimizin mərkəzində Azərbaycan vətəndaşının maraqları və Azərbaycan dövlətinin maraqları dayanır. Hesab edirəm ki, bu iki əsas amil Azərbaycanda artıq çox güclü dayaqlara malikdir. Həm sosial, həm də iqtisadi siyasətlə bağlı, xarici siyasətlə bağlı atdığımız addımlar bizə böyük uğur gətirib və dünyada Azərbaycana çox böyük rəğbət var. Mən tam əminəm ki, hər bir ölkənin inkişafı üçün demokratik inkişaf xüsusi rol oynayır. Ölkə iqtisadi cəhətdən, təbii resurslarla zəngin ola bilər, amma cəmiyyətdə gözəl ab-hava yoxdursa, azadlıqlar yoxdursa, bu inkişaf yarımçıq ola bilər və ya dayanıqlı olmaya bilər. Bizim üstünlüyümüz ondan ibarətdir ki, biz siyasi və iqtisadi islahatları paralel şəkildə aparırıq. Hesab edirəm ki, bu da çox düzgün və düşünülmüş siyasətdir. Çünki demokratiya baxımından inkişaf etmiş ölkələrə nəzər salsaq görərik ki, onların mütləq əksəriyyəti iqtisadi cəhətdən də inkişaf etmiş ölkələrdir. Yəni maddi rifah, iqtisadi və sosial inkişaf demokratik inkişaf üçün əsas şərtdir. Azərbaycanda həm demokratik inkişaf, həm də sosial-iqtisadi inkişaf paralel gedir. Hesab edirəm ki, buna görə də bizim cəmiyyətimizdə təkamül yolu ilə islahatlar aparılır, dərinləşir və siyasi və iqtisadi islahatlar daha da dərinləşməlidir".
İlham Əliyev vurğulayıb ki, söz azadlığı Azərbaycanda tam təmin edilibdir, heç bir məhdudiyyət yoxdur: "Mənə verilən son məlumata görə, Azərbaycan əhalisinin təxminən 80 faizi internet istifadəçisidir. Belə olan halda söz azadlığı ilə bağlı heç bir problem ola bilməz. Düzdür, bəzi hallarda bizi bəzi qeyri-hökumət təşkilatları tənqid edir, hətta ittiham edirlər. Amma bu ittihamların heç bir əsası yoxdur və bu, sadəcə olaraq qərəzli mövqedir. Bunun səbəbi də bəllidir. Amma real vəziyyətə baxdıqda biz hamımız görürük ki, Azərbaycanda söz azadlığı və bütün başqa azadlıqlar tam təmin olunub. Azərbaycanda sərbəst toplaşma azadlığı, siyasi fəaliyyət azadlığı, vicdan azadlığı, mətbuat azadlığı təmin olunub və təmin olunacaq. Bundan sonra da Azərbaycan iqtisadi və siyasi inkişaf yolu ilə getməlidir. Hesab edirəm ki, bizim qısa müstəqillik tariximiz onu göstərir ki, bu, yeganə düzgün yoldur. Çünki o qədər də asan olmayan geosiyasi vəziyyətdə Azərbaycan ilk növbədə öz müstəqil siyasətini qoruya və möhkəmləndirə bilib, heç bir xarici təsir altına düşmür".
Prezident deyib ki, Azərbaycan dövlətinin inkişafı Azərbaycan xalqının əlindədir. Azərbaycan xalqının iradəsi ilə ölkəmiz idarə olunur: "Biz böyük iqtisadi inkişafa nail olduq, meqa layihələri icra etdik. Biz dünyada özümüzü artıq multikulturalizmin mərkəzi kimi tanıda bildik və bu gün bu sahədəki uğurlarımız bir çox ölkələrdə öyrənilir. Bütün bu əldə edilmiş uğurların təməlində bizim düşünülmüş siyasətimiz, o cümlədən demokratik cəmiyyətin formalaşması dayanır.
Jurnalistlər isə, əlbəttə ki, öz fəaliyyətləri ilə bu inkişafa töhfələrini verirlər, cəmiyyəti incidən, narahat edən problemləri üzə çıxarırlar. Mən sizə deyə bilərəm ki, bəzi hallarda hansısa xoşagəlməz hadisə ilə bağlı məlumatı mətbuatdan əldə edirəm. Düzdür, mənə müxtəlif mənbələrdən hər gün müxtəlif məlumatlar gəlir, yəni həm xarici siyasət, həm də daxili siyasətlə və təhlükəsizliklə bağlı əsas məsələlər əlbəttə ki, məruzə edilir. Ancaq elə bir məsələ var ki, bu çox ciddi məsələ sayılmaya bilər, ancaq insanları narahat edən məsələdir. Bu məlumatlar haqqında mən hərdən mətbuatdan da xəbər tuturam, dərhal reaksiya verirəm. Dövlət məmurları və yaxud digər şəxslər bilirlər ki, Azərbaycanda söz azadlığı, mətbuat azadlığı imkan verməyəcək ki, onlar hansısa işlər görsünlər, qüsurlar buraxsınlar. Ona görə, jurnalistlər bəlkə özləri də bilmədən mənim köməkçilərimdir. Buna görə də mən sizə minnətdaram. Əminəm ki, gələcəkdə də siz bütün cəmiyyəti narahat edən, incidən məsələlər haqqında - harada ki hansısa ədalətsizlik, qanunsuzluq var - dərhal operativ reaksiya verəcəksiniz, cəmiyyətin və dövlət orqanlarının diqqətini bu məsələlərə cəlb edəcəksiniz".
Azərbaycan Prezidenti əlavə edib: "Bugünkü peşə bayramı ərəfəsində jurnalistikanın inkişafı ilə bağlı bəzi fikirlərimi bildirmək istərdim. Əlbəttə ki, hər bir ölkədə olduğu kimi, Azərbaycanda da jurnalistika həqiqəti əks etdirməlidir. Bu gün siz də yaxşı bilirsiniz ki, dünya miqyasında bu barədə danışmaq lazımdır, çünki heç də hər zaman belə deyil və biz görürük ki, dünyanın bir çox ölkələrində informasiya kampaniyaları aparılır. Bu kampaniyalar həm xarici, həm də daxili xarakter daşıyır - baxır gündəlikdə hansı məsələ dayanır. Təşkil edilmiş informasiya kampaniyaları, əlbəttə ki, hansısa məqsədləri güdür və bu məqsədlər bir çox hallarda həqiqətdən daha da önəmli faktor kimi qəbul edilir. Ona görə də hesab edirəm ki, jurnalistikada ilk növbədə həqiqət prinsipləri üstünlük təşkil etməlidir. Azərbaycan jurnalistikasına gəldikdə, mən deyə bilərəm ki, bizim jurnalistikamızda yoxlanmamış, yaxud da yalan, qərəzli məlumatların sayı kəskin şəkildə azalıb. Bunu cəmiyyət də, jurnalistlər də görür, əlbəttə ki, bu onların fəaliyyəti nəticəsində mümkün olur. Bu, ilk növbədə jurnalistlərin məsuliyyətinin artırılması nəticəsində baş verib. Eyni zamanda, hər bir mətbuat orqanı yaxşı başa düşür ki, bir dəfə, iki dəfə, üç dəfə yalan danışmaq olar, amma ondan sonra o mətbuat orqanına heç kim inanmayacaq və o, hörmətdən düşəcək. Ona görə də jurnalistikada həqiqət prinsiplərinin bərqərar olması prosesi, əlbəttə ki, diqqətə layiqdir və bu istiqamətdə, hesab edirəm ki, son illərdə Azərbaycanda müsbətə doğru irəliləyiş var. Əlbəttə ki, jurnalistika nə qədər mümkündürsə obyektiv olmalıdır, çünki tam obyektivliyə nail olmaq da çətindir, hər bir insan istər-istəməz subyektivliyə də yol verir və jurnalistlər də istisna deyil. Ancaq bu böyük məsuliyyəti dərk edərək jurnalistlər üzərində çox böyük məsuliyyət var, onların sözü incidə də bilər, problem yarada da bilər və yaxud məsələni həll edə də bilər. Ona görə də xahiş edirəm ki, jurnalistikada məsuliyyət məsələlərinə daha böyük diqqət göstərilsin. Bu da həqiqətlə, obyektivliklə paralel istiqamətdə gedən proseslərdir. Bu istiqamətdə son illərdə mən görürəm ki, Azərbaycan jurnalistikası daha da məsuliyyətli olub, daha da təmkinli olub, artıq nadir hallarda hansısa məsuliyyətsiz məlumatlara rast gəlmək olar, nadir hallarda insanları alçaldan, ləyaqətini aşağılayan, təhqiredici yazılara rast gəlmək olar. Bu baxımdan bizim jurnalistlərimiz bəzi dırnaqarası siyasətçilərdən daha da öndədir və hesab edirəm ki, jurnalistikamızda bax bu istiqamətdə müşahidə olunan islahatlar gedir. Biz 90-cı illəri, o vaxt jurnalistikamızda hansı meyllərin hökm sürdüyünü yaxşı xatırlayırıq. O vaxt, deyə bilərəm ki, çox üzücü bir mənzərə ilə üzləşmişdik. Təhqir, böhtan və şər faktoru bəzi mətbuat orqanlarında əsas rol oynayırdı. Artıq bu istiqamətdə həm cəmiyyət, həm jurnalistikamız inkişaf edib, həm də hesab edirəm ki, bu gün jurnalistlərin məsuliyyəti yüksək səviyyədədir. Bu gün Azərbaycan jurnalistikasının mütləq əksəriyyəti sağlam jurnalistikadır. Digər məsələlərə gəldikdə, hesab edirəm ki, jurnalistikamız xarici təsirdən azad olmalıdır, xarici təsir altına düşməməlidir".
İlham Əliyev vurğulayıb ki, Azərbaycan getdikcə daha da güclənir, Azərbaycanın rolu nəinki bölgədə, dünyada da artır: "Bölgədə bizim iştirakımız, razılığımız olmadan heç bir layihə və ya təşəbbüs reallaşa bilməz. Biz müstəqil siyasət aparırıq, ona görə də bizim siyasətimizə heç bir kənar qüvvə təsir edə bilməz. Azərbaycan daha da önəmli ölkə olduğu üçün bizə təsir etmək cəhdləri də artır və onlar da yeni formalarda özünü büruzə verir. Siyasi hakimiyyətə təsir etmək mümkün deyil, amma ictimai rəyə, ictimai fikrə təsir etmək cəhdləri çoxalır. Bunu necə etməli? Jurnalistika vasitəsilə. Ona görə, Azərbaycan jurnalistikası vətənpərvər olmalıdır. Ölkəmizdə kifayət qədər problemlər, çatışmayan cəhətlər, qüsurlar var və siz bunu işıqlandırırsınız və işıqlandırmalısınız, dövlət orqanlarını, məmurları tənqid edirsiniz, tənqid etməlisiniz. Bu təbii prosesdir. Ancaq eyni zamanda, biz hamımız bilməliyik ki, bu bizim ölkəmizdir və bizdən çox Azərbaycanı sevən insan, qurum və ya ölkə yoxdur, ola da bilməz. Ona görə də biz özümüzü xarici təsirdən qorumalıyıq, gənc nəsli qorumalıyıq ki, daim Azərbaycan müstəqil dövlət kimi inkişaf etsin. Çünki əfsuslar olsun, bizim tariximiz elədir ki, biz müxtəlif dövrlərdə müxtəlif dövlətlərin, imperiyaların tərkibində yaşamışıq, müstəqil olmamışıq. Bu, istər-istəməz, bizim psixologiyamıza da müəyyən dərəcədə təsir edib. Bu gün biz müstəqil, azad dövlət və xalq kimi ləyaqətlə yaşayırıq. Bu həmişə belə olmalıdır, ölkəmizin taleyi Azərbaycan xalqının əlində olmalıdır. Ona görə, xarici təsirdən özümüzü qorumaq üçün Azərbaycan dövləti çox ciddi siyasət aparır və uğurlu siyasət aparır. Deyə bilərəm ki, bizə təsir etmək, bizi nəyəsə sövq etmək, məcbur etmək cəhdləri kəskin şəkildə azalıb. O cümlədən ona görə ki, bu səylərin heç bir nəticəsi yoxdur. Buna görə biz informasiya məkanımızı da qorumalıyıq. Bunu etmək çətindir, çünki biz bu gün internet dövründə yaşayırıq və hər bir hansısa yalan, böhtan, təxribat xarakterli məlumat dərhal özünə yer tapır. Ancaq milli jurnalistikamız, Azərbaycan jurnalistikası vətənpərvər olmalıdır.
Milli maraqlar hər şeydən üstün olmalıdır. Biz xarici informasiya məkanına çıxışımızı daha da genişləndirməliyik. Bu istiqamətdə yaxşı nəticələr var. Mən xatırlayıram, jurnalistlərlə əvvəlki görüşlərimdə də demişdim ki, xarici dillərdə daha çox saytlar açılsın, bizim xarici informasiya məkanına çıxmaq üçün daha çox imkanımız olsun, vacib informasiyanı dərhal aparıcı media qurumlarına çatdırmalıyıq. Əvvəllər bizdə belə imkanlar yox idi və bu bizim üçün problem yaradırdı. Çünki əvvəlki illərdə bizə qarşı koordinasiya edilmiş, çox ciddi və çirkin informasiya kampaniyaları aparılırdı: "Azərbaycan geridə qalmış dövlətdir, Azərbaycanda inkişaf yoxdur, Azərbaycanda demokratiya yoxdur". Burada məqsəd bəllidir, həm bizi öz təsiri altına salmaq, nəyəsə məcbur etmək və ümumiyyətlə, ölkə haqqında mənfi imic yaratmaq və ondan sonra öz maraqlarını rahatlıqla təmin etmək. Ona görə biz çalışırdıq ki, Azərbaycan həqiqətlərini dünya ictimaiyyətinə çatdıraq və o qədər də geniş imkanlarımız yox idi. Bu gün bu imkanlar var və yaxın tarix onu göstərir ki, biz bu istiqamətdə kifayət qədər geniş imkanlara malikik. Həm dövlət orqanları, həm də media orqanları bu istiqamətdə fəal işləyirlər və məni sevindirən hal odur ki, biz vahid siyasət aparırıq. Çünki dövlət və media milli maraqları müdafiə edir. Çünki ümummilli məsələlərdə heç bir kənar fikir ola bilməz. Ona görə də biz bundan sonra çalışmalıyıq ki, Azərbaycan haqqında həqiqətləri dünya ictimaiyyətinə çatdıraq ki, ölkəmizi daha yaxşı tanısınlar, daha çox hörmət etsinlər. Bizi nə qədər çox tanıyarlarsa, o qədər də çox bizə rəğbət artar. Çünki dəfələrlə olub ki, ilk dəfə Azərbaycana gələn və mənimlə görüşən hansısa xarici nümayəndə heyəti öz təəccübünü gizlədə bilməyib. Deyirlər ki, bəs biz tam başqa fikirdə idik, bizə başqa şeylər deyirdilər, amma biz gəldik və gördük ki, Azərbaycan nə qədər inkişaf edir, necə gözəl ölkədir. Azərbaycan vətəndaşları necə qonaqpərvər və gözəl insanlardır. Bir məsələni də xüsusilə bir çoxları qeyd edir ki, cəmiyyətdə çox gözəl ab-hava var. Bu doğrudan da belədir. Biz buna öyrəşmişik, bu bizim üçün adi haldır. Bəzi başqa ölkələrlə müqayisədə Azərbaycanda ictimai vəziyyət, fikir və cəmiyyətdə hökm sürən ab-hava doğrudan çox müsbətdir. Biz Azərbaycan həqiqətlərini daha da geniş şəkildə dünya ictiamiyyətinə çatdırmalıyıq, çatdırırıq. Burada medianın rolunu mən yüksək qiymətləndirirəm. Bu işlər davam etdirilməlidir".
Dövlət başçısı qeyd edib ki, Ermənistan-Azərbaycan, Dağlıq Qarabağ münaqişəsi ilə bağlı ciddi dönüş yarada bildik: "Əvvəlki dövrlərdə vəziyyət belə idi - hökümətlərarası, dövlətlərarası münasibətlərdə mənim həmkarlarımla çoxsaylı görüşlərdə hamı etiraf edirdi, xəritəyə baxanda hər şey bəlli idi ki, kim işğalçıdır, kim işğalın qurbanıdır. Ancaq bu məlumat demək olar ki, siyası elitanın inhisarında qalırdı. İctimai fikir, xarici ölkələrin media nümayəndələri ya bilməyərəkdən, ya qəsdən münaqişə ilə bağlı yalan və təhrif edilmiş informasiyalar ötürürdü. Burada əlbəttə ki, erməni lobbisinin də böyük rolu var. Çünki onlar hər dəqiqə, hər gün bizim əleyhimizə işləyirlər. Onlar üçün birinci hədəf Azərbaycandır. Çünki bilirlər ki, Azərbaycan güclənir, ölkəmizin böyük imkanları var, dövlətimiz və xalqımız heç vaxt bu işğalla barışmayacaq və öz ərazi bütövlüyünü bərpa edəcək. Ona görə də erməni lobbisi və onlara yaxın olan siyasi xadimlər, xüsusilə erməni lobbisinin pulu ilə idarə olunan dırnaqarası siyasətçilər ictimai fikirə Azərbaycanla və Ermənistan-Azərbaycan, Dağlıq Qarabağ münaqişəsi ilə bağlı yalan informasiyalar ötürürlər. Biz bu tendensiyanı, bu meyli sındıra bildik. Bu gün həm dövlətlərarası münasibətlərdə, həm də ictimai rəydə Azərbaycanın mövqeyi daha çox dəyər qazanır. Təsadüfi deyil ki, mənim son səfərlərim çərçivəsində imzalanan sənədlərdə Ermənistan-Azərbaycan, Dağlıq Qarabağ münaqişəsi ilə bağlı xüsusi müddəa var. Orada göstərilir ki, münaqişə ölkələrin ərazi bütövlüyü, suverenliyi, sərhədlərin toxunulmazlığı, BMT Təhlükəsizlik Şurasının qətnamələri əsasında həll olunmalıdır. Bu, artıq o cümlədən həmin ölkələrdəki ictimai fikirdə yaranmış dönüşün təzahürüdür. Əlbəttə ki, biz də ilk növbədə çalışırıq və israrla, təkidlə deyirik ki, sənədlərdə bu bənd mütləq olmalıdır. Yəni ictimai fikirdə bu dönüş yaradıldı və münaqişə ilə bağlı Azərbaycanın haqq işi, haqlı mövqeyi daha da böyük üstünlük təşkil edir".
Azərbaycan Prezidenti vurğulayıb ki, düşmən bundan çox narahatdır: "Demək olar ki, təşvişdədir, döyüş meydanında məğlubiyyətə uğrayıb, hüquqi müstəvidə bizim mövqeyimiz çox möhkəmdir. Tarixi ədalət də bizim tərəfimizdədir. Çünki Dağlıq Qarabağ, nəinki Dağlıq Qarabağ, indiki Ermənistan da bizim tarixi torpağımızdır. İqtisadi cəhətdən səfil, yoxsul, xarici ianələrlə güclə dolanan Ermənistanla bügünkü inkişaf edən güclü Azərbaycanı müqayisə etmək olmaz. Bizim yeganə zəif yerimiz media məkanı idi. Orada da bu zəifliyin təbii səbəbləri var. Çünki erməni diasporu aparıcı ölkələrdə, xüsusilə münaqişə ilə bağlı ölkələrdə güclü imkanlara malikdir, öz biznes şəbəkələri var, onlar bəzi siyasətçiləri ələ alıblar. Belə demək mümkünsə, onlar dövlət qurumlarına soxulublar. Və bu imkanlardan istifadə edib Ermənistan-Azərbaycan, Dağlıq Qarabağ münaqişəsi ilə bağlı öz mövqelərini işıqlandırırlar. Artıq bu istiqamətdə də dönüş yarandı. Biz gərək öz səylərimizi daha da gücləndirək. Dövlət, ictimai və media qurumları bu məsələ ilə bağlı vahid siyasət çərçivəsində fəaliyyət göstərməlidirlər. Bu gün bu belədir, mən çox istəyirəm ki, bu siyasət daha da gücləndirilsin.
Bir sözlə, əziz dostlar, mən bu gün bu fürsətdən istifadə edərək jurnalistikamızın inkişafı ilə bağlı bəzi fikirlərimi sizinlə bölüşmək istədim. Bir daha demək istəyirəm ki, mən Prezident kimi azad medianın inkişafı üçün bundan sonra da səylərimi əsirgəməyəcəyəm, jurnalistlərin məişət problemlərinin həlli üçün bundan sonra da addımlar atacağıq, çünki mən yaxşı başa düşürəm ki, jurnalist biznesmen, iş adamı deyil. Jurnalistika ilə məşğul olan insan üçün mənzil almaq o qədər də asan məsələ deyil. Dövlət burada həmişə sizin yanınızdadır. Azərbaycan dövləti güclü, sosial dövlətdir. Siz görürsünüz ki, sosial məsələlərin həlli üçün bütün lazımi tədbirləri görürük. Baxmayaraq ki, neftin qiyməti qalxıb, düşüb, sosial proqramlarda heç bir geriləmə, yubanma yoxdur. Üçüncü binanı tikən şirkətdən mənim yeganə arzum və xahişim ondan ibarətdir ki, üçüncü binanı daha tez müddətdə tiksinlər. İkinci binanın tikintisinə dörd il vaxt gedib, bu üçüncü binanı da biz maksimum üç ilə tikməliyik. O ki qaldı maliyyə vəsaitinə, burada heç bir problem olmayacaq. Biz sizinlə tezliklə burada üçüncü binanın açılışında görüşəcəyik. Sağ olun".
"Kaspi" qəzetinin baş redaktoru İlham Quliyev, "Azərbaycan Televiziya və Radio Verilişləri" QSC-nin İnformasiya Proqramları Studiyasının direktoru Mehriban Məmmədova və Mətbuat Şurasının sədri Əflatun Amaşov media nümayəndələrinə göstərdiyi yüksək diqqət və qayğıya görə dövlət başçısına minnətdarlıqlarını ifadə ediblər.
Daha sonra Prezident İlham Əliyev binanın istifadəyə verilməsini bildirən rəmzi lenti kəsib və mənzillərdə yaradılan şəraitlə tanış olub.
Bildirilib ki, mənzillərin hamısı müasir tələblər səviyyəsində təmir edilib, sürətli internet, İPTV və fərdi isitmə sistemləri ilə təchiz olunub.
Müstəqil Azərbaycanda milli mətbuatın inkişafı ulu öndər Heydər Əliyevin adı ilə bağlıdır. Xalqın tələbi ilə o zaman hakimiyyətə gələn ulu öndər Heydər Əliyev ölkənin üzləşdiyi ağır ictimai-siyasi şəraitdə, iqtisadiyyatın iflic vəziyyətə düşdüyü bir dövrdə söz və mətbuat azadlığının təmin edilməsi, jurnalistlərin sosial şəraitinin yaxşılaşdırılması məsələlərini daim diqqət mərkəzində saxladı. 2003-cü ildən isə bu proses yeni inkişaf mərhələsinə qədəm qoydu. Prezident İlham Əliyevin hərtərəfli qayğısı nəticəsində Azərbaycanda kütləvi informasiya vasitələrinin inkişafına Dövlət Dəstəyi Konsepsiyası əsasında mühüm layihələr icra edildi. Bu gün Azərbaycanda bütün azadlıqlar, o cümlədən mətbuat, söz və fikir azadlıqları tam təmin edilib. Azərbaycanda genişzolaqlı internet sərbəst şəkildə fəaliyyət göstərir. Ölkəmizdə KİdV nümayəndələrinin rahat və təhlükəsiz fəaliyyət göstərmələri üçün bütün şərait var. Son illərdə isə jurnalistlərin sosial məsələlərinin həlli istiqamətində mühüm layihələr icra edilib. Belə ki, 2010-cu ildə ölkə jurnalistlərinin sosial müdafiəsinin möhkəmləndirilməsi, mətbuat işçilərinin mənzil şəraitinin yaxşılaşdırılması və onlar üçün yaşayış binasının tikilməsi məqsədilə dövlət büdcəsində nəzərdə tutulmuş Prezidentin ehtiyat fondundan Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna ilkin olaraq 5 milyon manat vəsait ayrıldı. Ötən müddətdə həmin vəsait hesabına jurnalistlər üçün 156 mənzildən ibarət 17 mərtəbəli bina inşa olundu və bütün mənzillər yüksək səviyyədə təmir edildi. Bu binanın tikintisinə və ətraf ərazidə abadlıq işlərinin aparılmasına 22 milyon manatdan artıq vəsait sərf olundu.
Azərbaycan dünyada bəlkə də yeganə ölkədir ki, kütləvi informasiya vasitələri nümayəndələri üçün dövlət tərəfindən pulsuz olaraq yaşayış binaları inşa olunur və onlara verilir. Bu bir daha sübut edir ki, ölkəmizdə KİV nümayəndələrinin yüksək səviyyədə fəaliyyət göstərmələri, azad mətbuatın təmin edilməsi ilə yanaşı, dövlətimiz jurnalistlərin mənzil-məişət məsələlərinin həlli, onların yaşayış şəraitinin yaxşılaşdırılmasına da xüsusi diqqətlə yanaşır. Ən əsası isə odur ki, bu tədbirlər ardıcıl xarakter daşıyır.
Sonra Prezident İlham Əliyev jurnalistlər üçün inşa ediləcək üçüncü yaşayış binasının təməlini qoyub.
Dövlət başçısı binanın texniki-iqtisadi göstəricilərini əks etdirən stendə baxıb.
Diqqətə çatdırılıb ki, Azərbaycan Prezidentinin Sərəncamına əsasən inşa ediləcək bu binada da 255 mənzil olacaq. Beləliklə, 2010-2017-ci illərdə tikilib istifadəyə verilmiş iki və hazırda təməli qoyulan üçüncü binada mənzillərin ümumi sayı 665-ə çatacaq.
Sonda xatirə şəkli çəkdirilib.
Jurnalistlər üçün tikilmiş ikinci binada mənzillərin paylanması mərasimi keçirilib
Jurnalistlər üçün tikilmiş ikinci binada mənzillərin paylanması mərasimi keçirilib. APA-nın məlumatına görə, 255 jurnalistə mənzillərin paylanması püşkatma yolu ilə olub.
Qeyd edək ki, Azərbaycan prezidenti İlham Əliyevin "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" 2013-cü il 22 iyul tarixli Sərəncamı ilə tikilən 3 bloklu, 17 mərtəbəli bu binanın ümumi inşaat sahəsi 34 min kvadratmetrdir. Binada 9 bir otaqlı, 144 ikiotaqlı, 93 üçotaqlı və 9 dördotaqlı olmaqla, 255 mənzil var.
