Iyunun 4-də Ermənistanın barbar aqressiyası üzündən Azərbaycanın Füzuli rayonunun Alxanlı kəndində dinc sakinlərin həlak olması ilə ölkədə emosiyaların coşduğu bur vaxtda Rusiya XİN-in Qarabağ məsələsinə yanaşmasının detalları ortaya çıxıb.
Bildiyiniz kimi, bu yaxınlarda xarci işlər naziri Elmar Məmmədyarov Kosta-Rikaya rəsmi səfər edərək bu ölkənin XİN rəhbəri Manuel Qonsales Sansla görüşmüşdü. Azərbaycan XİN-in həmin ərəfədə verdiyi açıqlamada bildirilirdi ki, görüşdə Manuel Qonsales Sans Azərbaycan-Ermənistan Dağlıq Qarabağ münaqişəsinin BMT Təhlükəsizlik Şurasının müvafiq qətnamələrinin tələbləri çərçivəsində və Azərbaycanın beynəlxalq səviyyədə tanınan sərhədləri daxilində ərazi bütövlüyü və suveren hüquqları çərçivəsində həll olunmasının vacibliyini vurğulayıb.
Bu arada isə “news.az” saytı maraqlı məlumat əldə edib. Belə ki, saytın sanballı diplomatik mənbələrdən əldə etdiyi məlumata görə, Kosta-Rika XİN rəhbərinin bu bəyanatı tək Ermənistanın deyil, Rusiya XİN-in də xoşuna gəlməyib və Moskvanın məsələyə reaksiyası özünü gözlətməyib. Diplomatik mənbələrin sayta verdiyi nəlumata görə, Rusiyanın Cənubi və Mərkəzi Amerika ölkələrindəki bütün səfirliklərinə Kosta-Rikanın bu ölkələrdə akkreditə olunmuş diplomatları ilə görüşməklə bağlı Moskvanın şifahi göstərişi çatdırılıb. Məqsəd isə Manuel Qonsales Sansin diqqətinə Moskvanın yuxarıda göstərilən məsələdən narazılığının çatdırılması olub. Analoji təlimat Rusiyanın Kosta-Rikadakı səfiri Aleksandr Doqadinin də ünvanına göndərilib. Təlimatda ona tapşırılır ki, bu ölkə XİN-i ilə müvafiq iş apararaq, onların bəlli məsələdə “daha ehtiyatlı qiymətləndirmə” aparmasına nail olsun.
Nəzərə alınsa ki, söhbət özünü Azərbaycanın bütün sahələrdə bir nömrəli tərəfdaşı elan etmiş Rusiyadan gedir, açıqlanan olaylar bir qədər qəribə görünür. Amma... qəribə deyil, həm də heç...
SAMİRƏ
