Aydın Xan Əbilov: "Leyla Əliyevanın 2 yaşlı körpənin faciəsi haqqında yazdığı şeir sənət əsəri kimi Azərbaycan ədəbiyyat tarixinə düşəcək"
Xəyal Rza: "Zəhranın xatirəsinə..." adlı şeir olduqca təsirlidir"
İyulun 4-də Ermənistan silahlı qüvvələrinin Füzulinin Alxanlı kəndinə atdığı mərmi nəticəsində həyatını itirən 2 yaşlı Quliyeva Zəhra Elnur qızının ölümü hər kəsi sarsıdıb. Bu hadisə Heydər Əliyev Fondunun vitse-prezidenti Leyla Əliyevaya da ağır təsir edib. L.Əliyeva 2 yaşlı körpəyə şeir həsr edib. O, rus dilində yazılan şeiri "Zəhranın xatirəsinə..." adlandırıb. Məlumat üçün bildirək ki, şeiri Azərbaycan dilinə Mahir Qarayev tərcümə edib.
Prezidentin qızının Zəhraya ünvanlanan şeirində "Heç mavi dənizdə çimmişdinmi sən?", "Durub baxmışdınmı uçan quşlara?", "İndi hara qaçaq dərdin əlindən?" misraları xüsusilə təsirlidir.
O, "Bağışla ki, mən səni tanımırdım, bağışla ki, bütün ölkə ağlayır" misraları ilə hadisənin təkcə ona deyil, bütün ölkəyə pis təsir etdiyini çatdırmaq istəyib.
L.Əliyevanın 2 yaşlı körpəyə həsr etdiyi şeiri sizlərə təqdim edirik:
Zəhranın xatirəsinə...
Niyə öldürdülər, de, səni axı?
O körpə canına necə qıydılar?
İkiyaşlı qızın nəymiş günahı,
Aparıb soyuq bir qəbrə qoydular!
Dağları, düzləri sevirdin yəqin,
Qaçırdın otluqda ayağıyalın.
Zərif izlərini kim sildi sənin,
O hansı cəlladdır, o hansı zalım?!
Heç mavi dənizdə çimmişdinmi sən,
Durub baxmışdınmı uçan quşlara?
İndi hara qaçaq dərdin əlindən,
Kim bizi qərq etdi göz yaşlarına?
Cəllad gülüşüylə durub yaxından
Tutdular gülləyə, qurşuna səni;
Sənsə köçüb getdin şirin yuxuda...
İlahi, sən özün bağışla məni!
Sıxır ürəyimi, sıxır bu ağrı,
Bu yara heç zaman sağalan deyil!
Nədən o körpəyə qıydınız axı?
Axı neyləmişdi sizə o tifil?
Bağışla məni ki, deyildik tanış!
İndi bütün ölkə yas tutub sənə.
Həyat yollarında addım atmamış
Uçdun mələk kimi uca göylərə!
Niyə öldürdülər, de səni axı?
Nə cavab verəcək zalım, nə üzlə?
Solan çiçəklərin nədir günahı?
O bircə qarışlıq məzarın üstdə...
L.Əliyevanın 2 yaşlı körpənin ölümünə həsr etdiyi şeirin təsir gücü barədə ekspertlər maraqlı fikir bildirdilər.
Yazıçı Aydın Xan Əbilov "Bakı-Xəbər"ə açıqlamasında qeyd etdi ki, L.Əliyevanın Zəhra haqqında yazdığı şeir baş verən hadisəyə dərhal reaksiya verməsinin bir nümunəsidir: "Mən sizə deyim ki, Səməd Vurğun, Rəsul Rza, Əli Kərim, Məmməd Rahim və digərlərinin İkinci Dünya Müharibəsi zamanı istər arxa, istərsə da ön cəbhədə olan azərbaycanlılarla bağlı operativ yazdıqları şeirlərə rast gəlmişik. Süleyman Rüstəmin "Ana və poçtalyon" və digər şeirləri yada salmaq olar. Bu mənada, Leyla xanımın şeirini baş verən faciəyə operativ şəkildə reaksiya verməsi nəticəsində vaxtında yazılmış şeir kimi dəyərləndirilməlidir. Həmçinin, peoetik bir obrazlı, kiçik Zəhranın faciəsi ilə bağlı şairənin ürəyini riqqətə gətirən fikirlərin, emosiaların obrazlı ifadəsi kimi çox gözəl qarşılandı. Bəllidir ki, bütün sosial şəbəkə və internet saytları şairənin Zəhra haqqında yazdığı şeiri yaydı. L.Əliyevanın 2 yaşlı körpənin faciəsi haqqında yazdığı şeir sənət əsəri kimi Azərbaycan ədəbiyyat tarixinə düşəcək".
Azərbaycan Yazıçılar Birliyinin mətbuat xidmətinin rəhbəri, şair-publisist Xəyal Rza qəzetimizə açıqlamasında qeyd etdi ki, L.Əliyevanın yazdığı şeirlər kifayət qədər dəyərlidir: "Bəllidir ki, xanım rus dilində yazır. Ermənilərin qətlə yetirdiyi 2 yaşlı Zəhra haqqında yazdığı şeir də rus dilindədir. Bu şeir Mahir Qarayev tərəfindən tərcümə olunub.
"Zəhranın xatirəsinə..." adlı şeir sosial şəbəkə istifadəçiləri tərəfindən təsirli şeir kimi qarşılanır. Şeirin faciəyə toxunması və onun tərcümə variantı da olduqca təsirlidir".
Günel CƏLİLOVA
