Ramil Hüseynov: "Günahsız insanlar yaşadıqları ərazilərdə qətlə yetirilirsə və..."
Məlum olduğu kimi, Azərbaycan Prezidenti İlham Əliyev iyulun 4-də Füzulinin Alxanlı kəndində atəşkəsin pozulması nəticəsində ikiyaşlı körpə və nənəsinin ölümünə "Twitter" səhifəsində münasibət bildirib. Prezident bununla bağlı yazıb: "Dünya ictimaiyyəti günahsız insanların qətlinə göz yummamalıdır".
Prezidentin xanımı, Birinci vitse-prezident Mehriban Əliyeva da baş verənlərlə bağlı adıçəkilən sosial şəbəkədə "Azərbaycan erməni işğalına, günahsız insanların qətlə yetirilməsinə qarşıdır!" yazıb.
O daha sonra əlavə edib: "Allah balaca Zəhraya və bütün şəhidlərimizə rəhmət eləsin!".
Məlum olduğu kimi, iyulun 4-də Ermənistan silahlı qüvvələri Füzuli rayonunun Alxanlı kəndini minaatanlardan və dəzgahlı qumbaraatanlardan atəşə tutub. Nəticədə iki dinc sakin - 50 yaşlı Sahibə Quliyeva və onun nəvəsi, ikiyaşlı Zəhra Quliyeva həlak olublar. Səlminaz Quliyeva isə yaralanıb.
Məlum hadisə böyük rezonansa səbəb oldu. Bir daha dünya ictimaiyyəti gördü ki, erməni vəhşiliyi heç bir sərhəd tanımır. Sərhəd tanımadığı üçün də qadın, uşaq, qoca demədən kimi gəldi qətlə yetirirlər. O üzdən, Prezident İlham Əliyev haqlı olaraq dünya ictimaiyyətinə çağırış edərək bildirib ki, günahsız insanların qətlinə göz yumulmamalıdır. Çünki nə qədər ki, dünya ictimaiyyəti buna susur, ermənilərin törətdikləri vəhşiliklər səngiməyəcək.
Məsələyə münasibət bildirən Vətəndaş və İnkişaf Partiyasının sədr müavini Ramil Hüseynovun sözlərinə görə, dünya ictimaiyyəti ölkə başçısının bu çağırışından özünə nəticə çıxarmalıdır: "Heç olmasa bundan sonra onlar sözügedən məsələyə həssaslıqla yanaşmalıdır. Günahsız insanlar yaşadıqları ərazilərdə qətlə yetirilirsə və beynəlxalq təşkilatlar buna lazımi adekvat cavab vermirsə, bunu heç cür qəbul etmək mümkün deyil. İndiyə qədər dünya ictimaiyyəti erməni işğalçılarının dinc insanlara qarşı törətdikləri vəhşiliklərə adekvat münasibət bildirsəydi, vəziyyət bu həddə gəlib çatmazdı. Ermənilərin törətdikləri vəhşiliklər bu dərəcədə əndazəni bəlkə də aşmazdı. Eyni zamanda, torpaqların işğal altında saxlanması bu qədər uzanmazdı. Nəticədə yüz minlərlə insan öz dədə-baba yurdundan didərgin vəziyyətdə yaşamazdı. Belə vəziyyətin hökm sürməsinin bir səbəbi də dünya ictimaiyyətinin biganəliyidir. O üzdən, dünya ictimaiyyəti məlum hadisədən sonra ortaya mövqe qoymalı və bu vəhşiliyə bir dur deməlidir. Eyni zamanda, bu çağırışa dəstək verməlidir".
Vidadi ORDAHALLI
