Şəmsəddin Əliyev: "Çünki onlar polis işinin nə dərəcədə çətin və məsuliyyətli olduğunu bilmək istəmir"
1988-ci ildə Azərbaycana yönəlik erməni təcavüzü başlayanda ölkənin ordu birləşmələri yox idi. O zaman erməni təcavüzünün qarşısını alan məhz milis qüvvələri idi. Onların bu işdə böyük rəşadəti var və bunu danmaq olmaz. Yüzlərlə polis əməkdaşı torpaqlarımızın müdafiəsi uğrunda gedən döyüşlərdə şəhid oldu.
İyulun 2-də Azərbaycan polisi yaranmasının 99-cu ildönümünü qeyd edib. Bununla bağlı keçirilən tədbirdə çıxış edən daxili işlər naziri, general-polkovnik Ramil Usubov bir sıra məqamlara toxunub. Onun sözlərinə görə, 1988-ci ildə Ermənistanın Azərbaycana qarşı hərbi təcavüzünü ilk olaraq rəşadətlə dəf edən nizami qüvvə milis, sonrakı illərdə Daxili Qoşun hissələri olub: "Bu döyüşlərdə 1695 əməkdaşımız və hərbi qulluqçumuz şəhidlik zirvəsinə ucaldı, 1710 nəfər isə yaralandı. Göstərdikləri şücaət və igidliklərə görə 67 nəfər "Milli Qəhrəman" adına, 1143 nəfər orden və medallara layiq görülüb. Müstəqilliyimizin sonrakı illərində də daxili işlər orqanlarının fəaliyyəti gərgin olub. Belə ki, cinayətkarlığa qarşı mübarizədə, ictimai qaydanın qorunması və ictimai təhlükəsizliyin təmin edilməsi vəzifələrini yerinə yetirərkən 99 əməkdaşımız və hərbi qulluqçumuz həlak olub, 2640 nəfər xəsarət alıb".
Bu cür fədakarlığı, xidmətləri olan Azərbaycan polisinin gündəlik fəaliyyətində rast gəlinən hansısa xırda çatışmazlığı şişirdib onun işinə kölgə salmağa nə ad vermək olar? Belə ki, bu günlərdə müğənni Nigar Camal bununla bağlı xoşagəlməz cəhdlər etdi.
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, bu cür qarayaxmalar qəbuledilən deyil: "Azərbaycan polisinin salnaməsində polisin fədakarlığı, qəhrəmanlığı ilə bağlı şanlı səhifələr çoxdur. Doğrudan da bunu etiraf etmək lazımdır. Tarix bir daha sübut etdi ki, polis çox gərgin rejimdə çalışır. Cinayətkarlıqla mübarizə, əslində, belə baxanda cinayətkarlıqla müharibədir. Bu müharibə digərlərindən fərqlidir. Azərbaycan polisi ölkənin ərazi bütövlüyünə, suverenliyinə qarşı yönələn qəsdlərin qarşısının alınmasında da çətinlik çəkmədi. Milli Ordunun olmadığı dövrlərdə Azərbaycan polisi düşünülmüş şəkildə torpaqları müdafiə edirdi. Nə qədər polisimiz şəhid oldu, yaralandı. Yetmişədək polis əməkdaşı "Milli Qəhrəman" adı aldı. Təbii ki, fəaliyyət olan yerdə müəyyən səhvlər də ola bilər. Ancaq o səhvi düzəltməyin özü də peşəkarlıq tələb edir. Bu gün polis orqanlarının şəxsi heyəti digər müvafiq qurumların heyətindən daha çoxdur. Belə olan halda, cəmiyyətlə təmasda olmaq şansı da daha çox olur. Bəzən vətəndaşlar polisə qarşı həqarət edir. Hətta özünü ulduz müğənni adlandıranlar polisin ünvanına ağzına gələni deyir. Hesab edirəm ki, belələrinin səviyyəsinə düşmək lazım deyil. Çünki onlar polis işinin nə dərəcədə çətin və məsuliyyətli olduğunu bilmək istəmir. İndi şəhərdə hərarət 40-41 dərəcə istidir. Bu cür istinin altında yollarda xidməti geyimdə olan polislər var. Bu çox çətin işdir. Belə olan halda, polis barəsində o deyilənlər yersizdir". Vidadi ORDAHALLI
