Seyid Camal Əzimbəyli: "Bundan sonra məmurlar da bu cür mövzularda həssas davranmanın vacib olduğunun fərqinə varacaq"
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Bakı şəhərinin "Sovetski" adlanan ərazisində Hacı Cavad məscidinin sökülməsinə Azərbaycan Respublikasının Prezidenti İlham Əliyevin münasibəti barədə açıqlama verib.
Əli Həsənov deyib ki, hələ aprel ayında Prezident İlham Əliyev "Sovetski" adlanan ərazidə Hacı Cavad məscidinin sökülməsini dayandırıb, məsələnin hərtərəfli və obyektiv araşdırılması üçün müvafiq komissiyanın yaradılması barədə göstəriş verib. Komissiya məsələni öyrəndikdən sonra belə qənaətə gəlib ki, həmin məscidin sökülməsi qaçılmazdır və nəticə barədə dövlət başçısına məruzə olunub.
Komissiyanın qənaətinə uyğun olaraq, Prezident İlham Əliyev, yerli icmanın da rəyi nəzərə alınmaqla, yeni məscidin tikilməsi və yalnız bundan sonra Hacı Cavad məscidinin sökülməsi məsələsinə baxılması barədə qərar verib.
Əli Həsənov onu da bildirib ki, Azərbaycan Prezidentinin tapşırığına uyğun olaraq, Yasamal rayonu Şərifzadə küçəsində daha geniş, gözəl və müasir məscidin tikilməsi üçün yer və vəsait ayrılıb, müvafiq tikinti işlərinə başlanıb.
Lakin bəzi vəzifəli şəxslər cənab Prezidentin tapşırığının əksinə olaraq, yeni məscid binasının tikintisi başa çatmamış Hacı Cavad məscidinin sökülməsi barədə özbaşına qərar qəbul edib. Prezident İlham Əliyev məsələ barədə məlumat aldıqdan dərhal sonra həmin vəzifəli şəxslərin ciddi şəkildə cəzalandırılması barədə göstəriş verib.
Prezidentin köməkçisi diqqətə çatdırıb ki, bu işin əsas günahkarı olan rayon icra hakimiyyətinin başçısı artıq tutduğu vəzifədən azad edilib.
Bu fakt Azərbaycan hakimiyyətinin, ölkə başçısı İlham Əliyevin islami dəyərlərə verdiyi önəmin göstəricisi kimi qəbul edilə bilərmi?
Şərqşünas Seyid Camal Əzimbəyli qəzetimizə bildirdi ki, baş verən son hadisə ilə bağlı o təmsil etdiyi qurumun adından ölkə başçısına xüsusi təşəkkür edib: "Biz bunun belə olduğunu bilirdik və əminliklə deyirdik ki, Azərbaycanda din-dövlət münasibətlərində heç bir problem yoxdur. Əksinə, bizim ərsəyə gətirdiyimiz model dünya üçün nümunə ola bilər. Dünyəvi bir ölkənin başçısının dini məsələyə belə həssaslıqla yanaşması, hətta buna görə vəzifəli adamları işdən azad etməsi inanclı kəsim üçün bir nümunə oldu. Onlar bir daha əmin oldular ki, Azərbaycan dövləti, onun Prezidenti həm də dini dəyərlərimizin təəssübkeşidir. Bundan sonra məmurlar da bu cür mövzularda həssas davranmanın vacib olduğunun fərqinə varacaq. Sözügedən nümunə həm də Azərbaycanın beynəlxalq arenada imicinə zərbə vurmaq istəyənlər üçün də gözəl cavab oldu".
Məhəmmədəli QƏRİBLİ
