Mehdi Mehdiyev: "Şəkil çəkən zaman hər bir telefon mövqeyi qeydiyyata alaraq dəqiq koordinatlara qədər nöqtələri göstərə bilir"
Müdafiə Nazirliyi əsgər valideynlərinə müraciət edib. Nazirliyin mətbuat xidmətindən mətbuata bildiriblər ki, müraciətdə hərbi qulluqçuların təhlükəsizliyi naminə telefon əlaqəsi və sosial şəbəkələrdən istifadə zamanı hərbi xidmət barədə müzakirələr aparmamaq, hərbi hissə, onların yerləşmə yerləri, silah-sursatı, hərbi texnikası haqqında və hərbi qulluqçulara dair fotoşəkilləri paylaşmamaq tövsiyə olunur:
"Hörmətli vətəndaşlar!
Hərbi qulluqçuların təhlükəsizliyi naminə telefon əlaqəsi və sosial şəbəkələrdən istifadə zamanı hərbi xidmət barədə müzakirələr aparmayın!
Hərbi hissə, onların yerləşmə yerləri, silah-sursatı, hərbi texnikası haqqında və hərbi qulluqçulara dair fotoşəkilləri paylaşmayın!".
Ümumilikdə, belə bir müraciət olunmasına hərbi ekspertlər necə yanaşır? Bunun təhlükəsizlik baxımından nə kimi əhəmiyyəti var? Məsələyə münasibət bildirən hərbi ekspert Mehdi Mehdiyev Müdafiə Nazirliyinin sözügedən tövsiyəsinə əməl etməyin vacib olduğunu bildirdi. O bunu bir sıra arqumentlərlə əsaslandırdı: "Məsələ ondadır ki, müasir texnologiya dövründə buraxılan telefonların əksəriyyətində funksiyalar çoxşaxəlidir. Şəkil çəkən zaman hər bir telefon mövqeyi qeydiyyata alaraq dəqiq koordinatlara qədər nöqtələri göstərə bilir. Eyni zamanda, xidmətdə olan insanlarla, yəni hərbi qulluqçularla bağlı, istər-istəməz, çox halda bilməyərəkdən müəyyən məlumatların yayılmasına şərait yaranır. Ona görə də sözügedən məsələdə diqqətli olmaq lazımdır. Təhlükəsizlik baxımından bu tövsiyələrə əməl etmək faydalıdır. Yaxşı olardı ki, göstərilən istiqamətlər üzrə şəkillər çəkilməsin. Hesab edirəm ki, Müdafiə Nazirliyinin belə bir müraciət etməsi labüd məsələ idi. Onu da qeyd edim ki, bununla bağlı tək Müdafiə Nazirliyi yox, biz də o sahədə müəyyən işlər görürük. Görüşlər keçirəndə valideynlərlə, xüsusən cəbhə bölgəsində yaşayan əhali ilə bu mövzuda maarifləndirmə işi aparırıq".
Vidadi ORDAHALLI
