Şəmsəddin Əliyev: "Bütün bunlarla yanaşı, sadalanan cinayətlərlə bağlı mübarizə Daxili İşlər Nazirliyi..."
Azərbaycanda cinayətkarlığa qarşı mübarizənin üstün səviyyələrdə olması barədə çox deyilib. Bunun nəticəsidir ki, bəzi cinayət növləri müəyyən ölkələrdə tüğyan etdiyi halda, Azərbaycanda həmin cinayətlərin kökü kəsilib.
Diqqətçəkən məqamlardan biri də ondan ibarətdir ki, 4 ən qorxulu cinayət növü üzrə vəzifəli dövlət məmurlarının, siyasi elita təmsilçilərinin hansısa formada iştirak etməsi faktları qeydə alınmayıb. Narkoticarət, insan alveri, adam oğurluğu cinayətlərinin və mütəşəkkil cinayətkar dəstələrin vəzifəli şəxslər, məmurlar tərəfindən himayə olunması hallarına, demək olar ki, rast gəlinmir. Yəni indiyə qədər sözügedən cinayətlərin ya kökü tamamilə kəsilib, məsələn, adam oğurluğu cinayətinin, ya da tək-tək hallarda rast gəlinsə də, bu kimi cinayət hadisələrində dövlət məmurlarının, siyasi elita təmsilçilərinin hər hansı formada iştirakına rast gəlinməyib. Sözsüz bu böyük nəticədir, bir tərəfdən dövlət idarəçilik ideologiyasının sağlam əsaslarda qurulmasının, digər tərəfdən isə hüquq-mühafizə orqanlarının, o cümlədən DİN-in məqsədyönlü fəaliyyətinin nəticəsidir.
Bəziləri adi bir yol hərəkəti faktına görə, bəziləri hansısa polis serjantının küçədə xidmət başında məqbul sayılmayan hər hansı xırda hərəkətinə görə bütün daxili işlər orqanları sisteminə qara yaxmağa çalışsa da, Azərbaycan polisinin əsl peşə fəaliyyətinə və əldə etdiyi nəticələrə dediyimiz əsasən bu dörd növ qorxulu cinayətlərin kökünü kəsməsi, ya da hiss olunmayan minimum səviyyəyə endirməsi ilə qiymət vermək lazımdır. Cəmiyyətimiz bu gün adam oğurluğu cinayətlərinin, ya da narkotik alverinin hansısa vəzifəli şəxs tərəfindən idarə olunması barədə söz-söhbətlərin xofundan tam azad yaşayırsa, bu bəzilərinin "xortdan" obrazında təqdim etmək istədiyi polis sisteminin yaratdığı mənzərədir. Bu gün ölkələr var ki, onun nazirinin, parlament sədrinin, deputatının adı göstərdiyimiz bu 4 növ qorxulu cinayətin hansısa birində hallanır. Azərbaycan isə... Məhz Azərbaycan polisinin dövlətçiliyə və Prezidentin siyasətinə sədaqəti, peşəkarlığı sayəsində belə qorxulu reallıqlardan uzaq yaşayır.
Maraqlıdır, bəs ekspertlər əldə olunan bu nəticəni nə ilə əlaqələndirir? Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyev bunu bir sıra amillərlə əlaqələndirdi: "Sadalanan cinayətlər mütəşəkkil cinayətkarlığın mühüm qollarıdır. Yəni arada siyasi sabitlik yoxdursa, idarəçilik naşı insanlar tərəfindən həyata keçirilirsə, orada mütəşəkkil cinayətkarlığın bu növləri geniş vüsət alır. Eyni zamanda, müəyyən vəzifəli şəxslər, məmurlar bu kimi cinayətləri himayə edir. Yəni "siyasi elita" tərəfindən o cinayətlərin himayə olunması, təşkilatçılığı nəticə etibarilə bunu törədənlərin məsuliyyətdən kənarda qalmasına gətirib çıxarır. Bu vəziyyətdə olan ölkədə, əlbəttə ki, belə xoşagəlməz halları gözləmək olar. Kolumbiyada, Ukraynada, bəzi postsovet ölkələrində belə hallar var. Ancaq, bundan fərqli olaraq, Azərbaycanda bənzər hallar yaşanmır. Ona görə ki, ölkədə siyasi sabitlik hökm sürür, kriminogen vəziyyət tam nəzarətdədir. Azərbaycanda cinayətkarlıqla mübarizə siyasəti dövlətin həyata keçirdiyi daxili siyasətlə sıx bağlıdır. Bütün bunlar, təbii ki, öz müsbət nəticəsini verməli idi. Məsələn, insan alveri ilə mübarizədə dövlətin xüsusi proqramı var. Milli koordinator var və bu məsələlərlə bağlı mütəmadi şəkildə Milli Məclisdə hesabat verilir. Eyni zamanda, Avropada da Azərbaycanın bu istiqamətdə mübarizəsi çox maraqla izlənir. Bütün bunlarla yanaşı, sadalanan cinayətlərlə bağlı mübarizə Daxili İşlər Nazirliyi Kollegiyasının hər bir üzvünün nəzarətindədir. Bununla bağlı yüksək tələbkarlıq var. Bu da, təbii ki, öz bəhrəsini verir".
Vidadi ORDAHALLI
