Sahib Məmmədov: "Ona görə də Dövlət Departamenti bunu müsbət qiymətləndirib"
ABŞ Dövlət Departamenti dünyada insan alverinə qarşı mübarizə üzrə növbəti illik hesabatını açıqlayıb. Hesabat dövlət katibi Reks Tillerson tərəfindən təqdim olunub. Hesabatda Azərbaycan insan alverinə qarşı mübarizə üzrə ikinci qrupda yer alır. Bildirilir ki, Azərbaycan hökuməti insan alverinin ləğvinə yönələn ciddi addımlar atmaqdadır.
Dövlət Departamenti bildirir ki, 2016-cı il üzrə hesabat müddəti ilə müqayisədə hökumət daha artıq səy göstərdiyi üçün ikinci dərəcəli ölkələr siyahısında qalıb. "Hökumət insan alverçilərinin təqibi, məhkum edilməsi, daha çox qurbanın tanınması yönündə cəhdlərini gücləndirib. Hökumət qurbanların mühafizəsinə, dövlət sığınacağına vəsaiti artırıb. Ancaq bir neçə əsas sahədə minimum standartlar təmin edilməyib", - hesabatda deyilir.
Hesabatda bir sıra tövsiyələr irəli sürülür. İnsan alveri cinayətlərinin hərtərəfli araşdırılması, cinayətkarların cəzalandırılması tövsiyə olunur. Özəlliklə də ölkəiçi insan alveri, məcburi əmək hallarının təhqiq olunması istənilir. Hökumətə tövsiyə edilir ki, QHT-lərin yaratdığı sığınacaqlara zəruri maliyyə ayırsın. Qurbanların təhvil verilmə mexanizminin icrası üçün standart əməliyyat prosedurları yaradılsın. Təhvilvermə prosesində QHT-lərin və digər oyunçuların rolu rəsmiləşdirilsin.
Azərbaycanda insan alverinə qarşı mübarizədə bu cür ciddi nəticələrin əldə olunması nəyin sayəsində mümkün olub?
Məsələyə münasibət bildirən hüquq müdafiəçisi Sahib Məmmədovun sözlərinə görə, Azərbaycanda insan alverinə qarşı 14 dövlət orqanının birləşdiyi mərkəzi koordinasiya şurası var: "Bu koordinasiyanı da DİN həyata keçirir. Daxili işlər nazirinin müavini Vilayət Eyvazov da milli koordinatordur. Əlbəttə, bizdə bu sahədə göstəricilər normaldır. Çünki Azərbaycan bununla bağlı bir sıra məsələlərdə təyinat ölkəsi deyil. Yalnız məcburi əmək var, amma burada azadlığın məhdudlaşdırılması halı yoxdur. Yəni ölkədə insan alverinə gətirməyən məcburi əmək var. Ancaq insan alverinin nəticəsi olan əmək istismarı halları, demək olar, qeydə alınmır. Yalnız bizdən gedən və yaxud da Azərbaycandan tranzit ölkə kimi istifadə edən şəxslər qurbana çevrilə bilir. Burda da Azərbaycan tərəfinin günahı yoxdur. Əsas olan hökumətin müvafiq tədbirlər görməsidir ki, əhali savadlı, məlumatlı olsun. Yəni qurbana çevrilməsin. Ancaq ölkə daxilində bu barədə vəziyyət stabildir. Ona görə də Dövlət Departamenti bunu müsbət qiymətləndirib".
Vidadi ORDAHALLI
