Aydın Mirzəzadə: "Bizdə hakimlər var ki, bir ay ərzində 60-80 işə baxır"
Ölkədə məhkəmə fəaliyyətinin təkmilləşdirilməsi, ədalət mühakiməsinin səmərəliliyinin artırılması ilə bağlı məqsədyönlü islahatlar aparılır. Vətəndaşların müraciət imkanlarının asanlaşdırılması, elektron məhkəmə sisteminin tətbiqi üzrə mühüm işlər görülür. Həmçinin, məhkəmə hakimiyyətinin yüksək statusuna uyğun yeni müasir infrastruktur yaradılır. Bu və digər məsələlərlə bağlı mətbuata geniş müsahibə verən ədliyyə naziri, Məhkəmə-Hüquq Şurasının sədri Fikrət Məmmədov bir sıra məqamlara toxunub.
F.Məmmədovun açıqlamasından belə məlum olub ki, Azərbaycanda hakimlərin sayı Avropa ölkələrinə baxanda azdır: "Ötən dövrdə hakimlərin sayının iki dəfə artırılmasına baxmayaraq, ölkəmizdə hakimlərin əhaliyə nisbətdə sayı da Avropa dövlətləri ilə müqayisədə daha azdır, hər 100 min nəfərə 6 hakim düşür. Halbuki, bəzi Avropa dövlətlərində bu göstərici 20-dən artıqdır. Hazırda vakant hakim ştatlarının komplektləşdirilməsi üzrə tədbirlər görülür, 126 nəfər hakimliyə namizəd şəffaf seçim əsasında imtahanlarda uğur qazanaraq Ədliyyə Akademiyasında tədris kursundadır. Sözsüz ki, iş yükünün azaldılmasına təkcə hakimlərin sayının artırılması ilə nail olmaq mümkün deyil. Bununla əlaqədar məhkəmə fəaliyyətinin səmərəliliyinin artırılması, məhkəmələrin iş yükünün azaldılması ilə bağlı təhlillər aparılır, mülki xarakterli işlərin məhkəmədən kənar həlli yolları axtarılır, bu sahədə beynəlxalq təcrübə öyrənilir".
Bütün bunların fonunda Azərbaycanda hakimlərin sayının artırılmasına nə dərəcədə ehtiyac var? Məsələyə münasibət bildirən millət vəkili Aydın Mirzəzadənin sözlərinə görə, Azərbaycanda məhkəmə hakimlərinin sayı artırılmalıdır. O bunu bir sıra arqumentlərlə əsaslandırdı: "Məsələ ondadır ki, Azərbaycanın məhkəmə sistemi keçmiş sovet məhkəmə sisteminin təcrübəsini götürüb. O dövrdə məhkəmə sistemi ancaq və ancaq cinayət və təsərrüfat işlərinə baxırdı. Azad demokratik ölkədə isə mülki işlərin sayı durmadan çoxalır. Bu, vətəndaşların bir-birilə münasibətlərindən, o cümlədən mülkiyyət məsələsi ilə bağlı mübahisədən doğan məsələlərdir. Hakimlər tərəfindən baxılmalı olan işlərin həcmi həddən artıq çoxdur. Məsələn, bizdə hakimlər var ki, bir ay ərzində 60-80 işə baxır. Fiziki baxımdan bunu çatdırmaq məsələsi var. Eyni zamanda, elə işlər var ki, həmin işlərin dərindən araşdırılması vacib hesab olunur. Bir tərəfdən biz hakimlərdən məsələyə obyektiv baxılmasını tələb edirik, digər tərəfdən isə bir günə 2 işə baxan hakimin həmin işi dərindən öyrənməsi, onu müqayisə etməsi və əlavə materiallar istəməsi bəzi hallarda mümkünsüz olur. Ona görə də hesab edirəm ki, Azərbaycanda məhkəmə hakimlərinin sayı artmalıdır. Ancaq bu mexaniki artım olmalı deyil. Sadəcə, boş yerlərin artırılması olmalı deyil. Bu, hakimlik imtahanlarından keçərək, ən yaxşıları sonradan iki il ərzində hazırlayaraq hakim korpusunun sayını artırmaqla mümkündür. Bu gün hakimlərin mütləq əksəriyyəti həmin o sistemdən keçərək yeni təfəkkürlə, yeni üsulla işləyən hakimlərimizdir. Bu baxımdan gənclərimizin məhkəmə sisteminə yolu açıq olmalıdır. Gələcəkdə Azərbaycanda hakimlər ay ərzində 5-10 işə baxmalıdır. Ancaq baxdığı işin keyfiyyəti, obyektivliyi, əlbəttə ki, qat-qat çox olacaq". Vidadi ORDAHALLI
